কাম কি কৰিছে নকৰিছে সেয়া বাদ দিয়ক। কিন্তু খোৱা বোৱা আৰু লাস বিলাসত হিমন্ত বিশ্ব শৰ্মাৰ চৰকাৰে পানীৰ দৰে খৰচ কৰিছে ৰাইজৰ ধন। বাজেট চালে ধৰিবই নোৱাৰি এয়া বিলাসী পিকনিক পাৰ্টি নে কেবিনেট বৈঠক। চৰকাৰে ৩,৬৮,৩০,১১৬ কোটি টকা খৰচ কৰিলে মাত্ৰ ৯ খন কেবিনেটত।
এইয়া অসমৰ চৰকাৰৰ কেবিনেট বৈঠকৰ খৰচ। বিগত সময়ত অসমৰ বিভিন্ন জিলাত হৈ যোৱা কেবিনেট বৈঠকৰ খোৱা বোৱাকে ধৰি অন্যান্য শিতানৰ খৰচ এয়া। খোদ চৰকাৰেই দাঙি ধৰিছে এই তথ্য। বিধান সভাত কমলাক্ষ দে পুৰকায়স্থই সোধা এটা লিখিত প্ৰশ্নৰ উত্তৰত মন্ত্ৰী ৰঞ্জিত দাসে দাঙি ধৰিছে এই তথ্য।
বিগত সময়ত ক্ৰমে যোৰহাট, শিলচৰ, ডিমা হাচাও, কোকৰাঝাৰ, বঙাইগাঁও, শোণিতপুৰ, ধেমাজী, ডিব্ৰুগড় আৰু কামৰূপত অনুষ্ঠিত হোৱা ৰাজ্যিক কেবিনেটৰ ৯ খন বৈঠকৰ বাবে চৰকাৰে খৰচ কৰিছে ৩,৬৮,৩০,১১৬ কোটি টকা ।
যিসময়ত ৰাজ্যৰ অৰ্থনীতি কোটি কোটি টকাৰ ঋণত বুৰ গৈ আছে। যি সময়ত আৰ্থিক অনাটৰ বাবে বন্ধ কৰি দিয়া হৈছে ইখনৰ পিছত সিখনকৈ আঁচনি। যি সময়ত কাৰ্যকৰী নোহোৱাকৈ পৰি আছে বহু পৰিকল্পনা। সেই সময়ত ১৬ জন কেবিনেট মন্ত্ৰীয়ে ৯ খন বৈঠক অনুষ্ঠিত কৰাৰ নামত খৰচ কৰিছে এই বিশাল ধন ৰাশি। ৰাইজৰ টকাৰেই মন্ত্ৰী সকলে বিলাসী কেবিনেট বৈঠক উদযাপন কৰি ইটোৰ পিছত সিটোকৈ ৰাজ্যবাসীৰেই অহিতে লৈছে কেতবোৰ সিদ্ধান্ত। এফালে ৰাইজৰ টকাৰে কেবিনেট বৈঠক উদযাপন আৰু আনফালে ৰাইজৰ ওপৰতেই জাপি দিয়া হৈছে ইটোৰ পিছত সিটো কৰ। দৰিদ্ৰ ৰাইজৰ কৰৰ টকাৰে কেবিনেটত মাছে মঙহে খাই উগাৰটো মাৰি কৈছে উচ্ছেদৰ দৰে জনবিৰোধী কথা।
মাত্ৰ ৯ খন বৈঠকত ১৬ গৰাকী মন্ত্ৰীৰ খোৱা বোৱা, অহা যোৱাৰ নামত কেনেকৈ ৩,৬৮,৩০,১১৬ কোটি টকা খৰচ হ’ল সেই কথা এতিয়া চৰকাৰৰ পৰা জানিবলৈ বিচাৰিছে সচেতন ৰাজ্যবাসীয়ে।
