অসমৰ ৰাজনীতিত আজি এক অতি আচৰিত ঘটনা দেখিবলৈ পোৱা গৈছে। ৰাজ্যসভা নিৰ্বাচনৰ বাবে এনডিএৰ প্ৰাৰ্থী তথা ইউপিপিএল দলৰ মুৰব্বী প্ৰমোদ বড়োৱে বৃহস্পতিবাৰে তেওঁৰ মনোনয়ন পত্ৰ দাখিল কৰে। কিন্তু সকলোকে আচৰিত কৰি তেওঁৰ সমৰ্থনত আগবাঢ়ি আহিছে বিৰোধী দল এআইইউডিএফৰ তিনিগৰাকীকৈ বিধায়ক। বিজেপিৰ দুজন প্ৰাৰ্থীৰ সৈতে প্ৰমোদ বড়োৱে আজি মনোনয়ন দাখিল কৰে। নিয়ম অনুসৰি এজন প্ৰাৰ্থীক মনোনয়নৰ বাবে অন্ততঃ ২০ গৰাকী বিধায়কৰ সমৰ্থনৰ প্ৰয়োজন হয় আৰু প্ৰমোদ বড়োৰ সমৰ্থনকাৰীৰ তালিকাত এআইইউডিএফৰ বিধায়কৰ নাম থকাটোৱে এতিয়া ৰাজ্যজুৰি চৰ্চাৰ সৃষ্টি কৰিছে।
সূত্ৰৰ পৰা জানিব পৰা মতে এআইইউডিএফৰ যি তিনিগৰাকী বিধায়কে প্ৰমোদ বড়োক সমৰ্থন জনাই স্বাক্ষৰ কৰিছে তেওঁলোক হ’ল কৰিম উদ্দিন বৰভূঞা, নিজাম উদ্দিন চৌধুৰী আৰু জাকিৰ হুছেইন লস্কৰ। ইয়াৰ ভিতৰত আটাইতকৈ গুৰুত্বপূৰ্ণ কথাটো হ’ল কৰিম উদ্দিন বৰভূঞাই প্ৰমোদ বড়োক সমৰ্থন জনোৱাৰ পাছতেই আজি এআইইউডিএফ দলৰ প্ৰাথমিক সদস্য পদৰ পৰা পদত্যাগ কৰিছে। বদৰুদ্দিন আজমলৰ নেতৃত্বত থকা এআইইউডিএফৰ বিধায়কে বিজেপি মিত্ৰজোঁটৰ প্ৰাৰ্থীক এনেদৰে সমৰ্থন জনোৱা কথাটোৱে বহুতো প্ৰশ্নৰ সৃষ্টি কৰিছে। কাৰণ দলৰ নেতৃত্বৰ সন্মতি নোহোৱাকৈ বিধায়কসকলে এনে পদক্ষেপ লোৱাটো প্ৰায় অসম্ভৱ বুলি বহুতে ধাৰণা কৰিছে।
মন কৰিবলগীয়া যে ইয়াৰ আগতে এআইইউডিএফৰ তৰফৰ পৰা বদৰুদ্দিন আজমলক বিৰোধীৰ উমৈহতীয়া প্ৰাৰ্থী হিচাপে প্ৰক্ষেপ কৰিবলৈ চেষ্টা কৰা হৈছিল। কিন্তু এতিয়া দলটোৰ নিজৰ বিধায়কেই চৰকাৰী পক্ষৰ প্ৰাৰ্থীক সমৰ্থন কৰাত অসমৰ ৰাজনৈতিক সমীকৰণ সম্পূৰ্ণ সলনি হৈ পৰিছে। প্ৰমোদ বড়োৱে অলপতে বিটিচি নিৰ্বাচনত হাগ্রামা মহিলাৰীৰ হাতত পৰাজয়বৰণ কৰিছিল যদিও তেওঁ এতিয়াও ৰাজ্যত বিজেপিৰ এজন অতি ঘনিষ্ঠ সহযোগী হৈ আছে।
