বিহাৰত পুনৰ ক্ষমতালৈ আহিছে এন ডি এ মিত্ৰজোঁট। ২৪৩খন আসনৰ ভিতৰত বিজেপি-জনতা দলে (ইউনাইটেড এলায়েন্স) ২০২খন আসন লাভ কৰে। মহাগঠবন্ধনৰ ভয়ংকৰ পতন ঘটিছে। আৰু ইয়াৰ মাজতে মায়াৱতীৰ দল বহুজন সমাজ পাৰ্টিয়ে বিহাৰত একাউণ্ট খুলিছে। মাত্ৰ এখন আসনহে লাভ কৰিছে দলটোৱে। তাকো এই জয় মাত্ৰ ৩০ টা ভোটৰ ব্যৱধানত।
বিহাৰৰ ৰামগড় আসনত মায়াৱতীৰ বহুজন সমাজ পাৰ্টিয়ে জয়লাভ কৰিছে। এই আসনত সতীশ কুমাৰ যাদৱে জয়লাভ কৰে। বিএছপি দলৰ এইগৰাকী প্ৰাৰ্থীয়ে নিজৰ নিকটতম প্ৰতিদ্বন্দ্বী বিজেপিৰ বৰ্তমানৰ বিধায়ক অশোক কুমাৰ সিঙক ৩০টা ভোটত পৰাস্ত কৰি জয়লাভ কৰে। সতীশ কুমাৰ যাদৱ যাদৱে লাভ কৰে ৭২,৬৮৯টা ভোট। এইবাৰৰ বিহাৰ বিধানসভা নিৰ্বাচনত তেওঁ সৰ্বনিম্ন ভোটৰ ব্যৱধানত জয়লাভ কৰিছে।
প্ৰসংগক্ৰমে ২০০৭ চনৰ পৰা ২০১২ চনলৈকে উত্তৰ প্ৰদেশত বিএছপিৰ ক্ষমতা আছিল।কিন্তু যোৱা বছৰৰ লোকসভা নিৰ্বাচনত মায়াৱতীৰ দলটোৱে এখনো আসন লাভ কৰিব নোৱাৰিলে। সাম্প্রতিক সময়ত যিকোনো নির্বাচনত এয়া তেওঁলোকৰ প্রথম জয়৷
মন কৰিবলগীয়া যে ২০০৫ চনৰ পৰা ৰামগড়ৰ আসনখন কেতিয়াবা লালু প্ৰসাদ যাদৱৰ ৰাষ্ট্ৰীয় জনতা দলে আৰু কেতিয়াবা সেইখন বিজেপিয়ে দখল কৰি আহিছে।
২০২০ চনত এই আসনত আৰজেডিৰ সুধাকৰ সিঙে জয়লাভ কৰিছিল। অৱশ্যে বিগত বর্ষৰ উপ-নির্বাচনত অশোক কুমাৰ সিঙে এই আসনত জয়লাভ কৰিছিল৷ ইয়াৰ পূৰ্বেও সতীশ কুমাৰ যাদৱ যাদৱে ৰামগড়ৰ আসনৰ পৰা প্ৰতিদ্বন্দ্বিতা কৰিছিল।
উল্লেখ্য যে শুকুৰবাৰে ঘোষণা কৰা হয় বিহাৰ বিধানসভা নিৰ্বাচনৰ ফলাফল। একক বৃহত্তম দল হিচাপে বিজেপিয়ে ৮৯খন আসন লাভ কৰে। তেওঁলোকৰ মিত্ৰজোঁটৰ অংশীদাৰ নীতিশ কুমাৰৰ জনতা (ইউনাইটেড) দলে ৮৫ খন আসন লাভ কৰে। আনহাতে, মহাগঠবন্ধনে মাত্ৰ ৩৫খন আসনহে লাভ কৰে। ইয়াৰে ২৫খন আসন লাভ কৰে আৰজেডিয়ে। কংগ্ৰেছে পায় মাত্ৰ ৫ খন আসন। বাকী পাঁচখন আসনত জয়ী হয় এ আই এম আই এম।
