দশমবাৰৰ বাবে মুখ্যমন্ত্ৰী হিচাপে শপত গ্ৰহণ কৰিছে নীতিশ কুমাৰে। কিন্তু কেবিনেটত বিজেপিৰে দপদপনি। অন্ততঃ পৰিসংখ্যাই তাকেই কয়। নীতিশৰ কেবিনেটত বৰ্তমান ২৬ জন সদস্য আছে। ইয়াৰে ১৪ জন বিজেপি বিধায়ক, ৮ জন নীতিশৰ দল জেডিইউ, আৰু ২জন চিৰাগ পাছোৱানৰ দল এলজেপি (ৰাম বিলাস)ৰ।
তাৎপৰ্যপূৰ্ণভাৱে এন ডি এৰ অংশীদাৰ আৰ এল এমৰ এজন বিধায়ক আৰু জিতন ৰাম মাঞ্জীৰ দল ‘হাম’ৰ এজন বিধায়কে নীতিশৰ মন্ত্ৰীসভাত স্থান লাভ কৰিছে। মুঠতে নেতা নীতিশ আপাত দৃষ্টিত কেপ্তেইন হ’লেও কেবিনেটত ‘মেজৰিটি’ বিজেপিৰেই থাকিল। অৱশ্যে ৰাজনৈতিক মহলৰ একাংশৰ মতে পিছত মন্ত্ৰীসভা সম্প্ৰসাৰণৰ সুযোগ আছে।
নীতিশৰ মন্ত্ৰীসভাত কোনে স্থান পাইছে? নীতিশ কুমাৰ নেতৃত্বাধীন পূৰ্বৰ চৰকাৰৰ উপ-মুখ্যমন্ত্ৰী আছিল সম্ৰাট চৌধুৰী আৰু বিজয় সিনহা। নীতিশৰ নতুন মন্ত্ৰীসভাতো তেওঁলোক আছে। এই দুই বিজেপি বিধায়কে পূৰ্বৰ পদতে বাহাল থাকিব বুলি জানিব পৰা গৈছে।
ইয়াৰ উপৰিও নীতিশৰ মন্ত্ৰীসভাৰ জেডিইউৰ সদস্যসকল হ’ল – বিজয় কুমাৰ চৌধুৰী, বিজেন্দ্ৰ প্ৰসাদ যাদৱ, শ্ৰৱণ কুমাৰ, অশোক চৌধুৰী, লেচি সিং, মদন সাহানী, সুনীল কুমাৰ, মহম্মদ জামা খান।
সম্ৰাট চৌধুৰী আৰু বিজয় সিনহাৰ উপৰিও কেবিনেটত বিজেপিৰ আন সদস্যসকল হ’ল মংগল পাণ্ডে, ড০ দিলীপ কুমাৰ জয়ছোৱাল, নীতিন নবীন, ৰামকৃপাল যাদৱ, সঞ্জয় সিনহা টাইগাৰ, অৰুণ শংকৰ প্ৰসাদ, সুৰেন্দ্ৰ মেহতা, নয়ন প্ৰসাদ, ৰামা নিছাদ, লখেন্দ্ৰ কুমাৰ ৰোশন, শ্রেয়াশ্ৰী সিনহা, প্ৰমোদ কুমাৰ।
আনহাতে, চিৰাগৰ দল এল জে পি (ৰাম বিলাস)ৰ বিধায়ক সঞ্জয় কুমাৰ, সঞ্জয় কুমাৰ সিনহা আৰু আৰ এল এমৰ দীপক প্ৰকাশক কেবিনেটত স্থান দিয়া হৈছে। জিতন ৰাম মঞ্জিৰ হামৰ পৰা মন্ত্ৰীসভাত স্থান লাভ কৰিছে সন্তোষ কুমাৰ সুমনে।
প্ৰথম অৱস্থাত এন ডি এৰ সূত্ৰই প্ৰকাশ কৰিছিল যে প্ৰতি ছয়জন বিধায়কৰ বিপৰীতে এজন বিধায়ক মন্ত্ৰী হ’ব। বিহাৰ বিধানসভা নিৰ্বাচনত বিজেপিয়ে ৮৯ খন, জেডিইউয়ে ৮৫ খন, এলজেপিয়ে (ৰাম বিলাস) ১৯ খন, আৰএলএমৰ ৪ খন আসন। ফলত এই ছয়জনৰ বাবে এজন মন্ত্ৰীৰ নীতি যে এইক্ষেত্ৰত পালন কৰা হোৱা নাই সেয়া স্পষ্ট হৈ পৰিছে। যদিও ৰাজনৈতিক মহলৰ দাবী যে পিছত কেবিনেট সম্প্ৰসাৰণৰ স্থান থাকিব।
