হিচাপহীন সম্পত্তিৰ গোচৰত সোমবাৰে পাঞ্জাৱ ভিজিলেন্স ব্যুৰোৰ জালত পৰিছে বিজেপিৰ নেত্ৰী সতকৰ কৌৰ আৰু তেখেতৰ স্বামী জছমাইল সিঙ ওৰফে লাডী গেহৰী।
অৱশ্যে এই সমগ্ৰ বিষয়টো ৰাজনৈতিক ষড়যন্ত্ৰ বুলি মন্তব্য কৰে বিজেপি নেত্ৰীগৰাকীয়ে। সতকৰ কৌৰে কয় যে তেওঁলোকে কোনো অবৈধ কাম কৰা নাই আৰু সেয়ে তেওঁলোকে ভয় খোৱা নাই।
উল্লেখ্য যে দুৰ্নীতিৰ গোচৰত আৰক্ষীৰ জালত পৰা এইগৰাকী বিজেপিৰ নেত্ৰী এগৰাকী প্ৰাক্তন কংগ্ৰেছী। কেপ্তেইন অমৰিন্দৰ সিঙৰ চৰকাৰৰ দিনত ২০১৭ চনত ফিৰোজপুৰ গ্ৰাম্যৰ পৰা কংগ্ৰেছৰ টিকটত প্ৰথমবাৰৰ বাবে বিধায়ক হিচাপে নিৰ্বাচিত হৈছিল সতকৰ কৌৰ।
বিধায়ক হৈ থকাৰ সময়ত সতকৰ আৰু তেওঁৰ স্বামীয়ে বক্ৰপথেৰে সম্পত্তি আহৰণ কৰাৰ অভিযোগ উত্থাপন হৈছিল। পঞ্জাৱ ভিজিলেন্স ব্যুৰোৱে বিগত কেইমাহমানৰ পৰা এই অভিযোগৰ তদন্ত কৰি আছিল।
ইতিমধ্যে ভিজিলেন্স ব্যুৰোৰ দলটোৱে প্ৰাক্তন বিধায়ক সতকৰ কৌৰ আৰু তেওঁৰ স্বামী লাডী গেহৰীক জেৰা কৰি তেওঁলোকৰ ঘৰত তালাচী চলাইছে।
প্ৰাক্তন বিধায়ক সতকৰ কৌৰৰ স্বামী লাডী গেহৰীও পঞ্জাৱৰ ৰাজনীতিত যথেষ্ট প্ৰভাৱশালী ব্যক্তি। তেওঁ কেপ্তেইন অমৰিন্দৰ সিং নেতৃত্বাধীন চৰকাৰত জিলা পৰিষদৰ সদস্য আছিল। কংগ্ৰেছ চৰকাৰৰ বিৰোধীয়ে তেওঁৰ কাৰ্যকালত তেওঁৰ বিৰুদ্ধে বিভিন্ন দুৰ্নীতিৰ অভিযোগ উত্থাপন কৰিছিল।
বৰ্তমান ভিজিলেন্স ব্যুৰোৱে সমগ্ৰ বিষয়টোৰ তদন্ত কৰি আছে। অৱশ্যে এতিয়াও প্ৰকাশ পোৱা নাই তদন্তৰ প্ৰতিবেদন।
উল্লেখ্য যে পাঞ্জাৱৰ বিগত বিধানসভা নিৰ্বাচনত লাডী গেহৰী আৰু তেওঁৰ পত্নী সতকৰ কৌৰ গেহৰীক কংগ্ৰেছে টিকট প্ৰদান নকৰাত বাবে তেওঁলোকে পোনপটীয়াকৈ খং প্ৰকাশ কৰিছিল। ইয়াৰ পিছত কংগ্ৰেছে সতকৰ কৌৰক দলৰ পৰা বহিষ্কাৰ কৰে। ইয়াৰ পিছতে সতকৰে কংগ্ৰেছ দল ত্যাগ কৰি বিজেপিত যোগদান কৰে।
