পেহেলগামত নিৰাপত্তাৰ সুৰুঙাক লৈ কেন্দ্ৰ চৰকাৰক প্ৰশ্ন কৰাৰ বাবেই সাংবাদিকক আক্ৰমণ বিজেপি কৰ্মীৰ
জম্মু-কাশ্মীৰৰ কথুৱা জিলাৰ পেহেলগামত হোৱা সন্ত্ৰাসবাদী আক্ৰমণ আৰু নিৰাপত্তা ব্যৱস্থাৰ সুৰুঙাক লৈ কেন্দ্ৰ চৰকাৰ প্ৰশ্ন কৰাৰ বাবে এগৰাকী সাংবাদিকক আক্ৰমণ বিজেপিৰ একাংশ নেতা-কৰ্মীৰ। জানিব পৰা মতে ইতিমধ্যে চিকিৎসালয়ত ভৰ্তি কৰোওৱা হৈছে সাংবাদিকগৰাকীক।
জানিব পৰা মতে, আক্ৰমণৰ বলি হোৱা সাংবাদিকজন হৈছে দৈনিক জাগৰণৰ সাংবাদিক ৰাকেশ শৰ্মা।
সূত্ৰ অনুসৰি, হিমাংশু শৰ্মা নামৰ বিজেপিৰ এজন সদস্যই সাংবাদিকজনে “বিচ্ছিন্নতাবাদী ভাষা” কোৱা বুলি অভিযোগ উত্থাপন কৰি আক্ৰমণ কৰে। হিমাংশু শৰ্মাৰ লগত উপস্থিত আছিল বিজেপিৰ বিধায়ক দেৱীন্দৰ মন্যাল, ৰাজীৱ যশৰতীয়া আৰু ভাৰত ভূষণ।
সাংবাদিক ৰাকেশ শৰ্মাই বিজেপিৰ বিধায়ক দেৱীন্দৰ মন্যালক বিশেষভাৱে সুধিছিল যে পেহেলগাম সন্ত্ৰাসবাদী আক্ৰমণ সীমান্তৰ অনুপ্ৰৱেশ নীৰিক্ষণ ব্যৰ্থ হোৱাৰ বাবেই হৈছিল নেকি?
ইয়াৰ পিছতে হিমাংশু শৰ্মা, ৰবিন্দৰ সিং, অশ্বনী শৰ্মা, মঞ্জিত সিং, টনি আৰু পাৰবীন চুনা বুলি চিনাক্ত হোৱা বিজেপি কৰ্মীসকলে সাংবাদিক ৰাকেশ শৰ্মাক আক্ৰমণ কৰে।
ৰাকেশ শৰ্মাই জনোৱা মতে, উপ-আৰক্ষী অধীক্ষক ৰবিন্দৰ সিঙে তেওঁক ৰক্ষা কৰে আৰু পিছত তেওঁক চৰকাৰী চিকিৎসা মহাবিদ্যালয়ত চিকিৎসাৰ বাবে ভৰ্তি কৰে।
এই ঘটনাক লৈ কথুৱাৰ শ্বহীদী চ’ক আৰু জম্মুৰ প্ৰেছ ক্লাৱতো পৃথক পৃথক সাংবাদিকসকলে প্ৰতিবাদ সাব্যস্ত কৰে।
সাংবাদিকসকলেও ঘোষণা কৰে যে বিজেপি দলে অভিযুক্তসকলৰ বিৰুদ্ধে ব্যৱস্থা নোলোৱালৈকে বিজেপিৰ সকলো কাৰ্যসূচী বৰ্জন কৰিব।