প্ৰধানমন্ত্ৰী হৈ থকা সময়ত দিয়া অন্তিমটো সাংবাদিক মেলত ড০ মনমোহন সিঙে কৈছিল যে বৰ্তমানৰ সংবাদ মাধ্যম আৰু বিৰোধী দলবোৰতকৈ ইতিহাসে তেওঁৰ প্ৰতি অধিক দয়ালু আচৰণ কৰিব। সময় পাৰ হোৱাৰ লগে লগে তেওঁৰ আন আন ভৱিষ্যদ্বাণীৰ দৰেই এই কথাষাৰো সত্য প্ৰমাণিত হ’বলৈ ধৰিছে। কমনৱেলথ গেমছ আৰু টু-জি কেলেংকাৰিৰ পাছত এইবাৰ আন এক দুৰ্নীতিৰ অভিযোগৰ পৰা সম্পূৰ্ণভাৱে ৰেহাই পালে প্ৰাক্তন প্ৰধানমন্ত্ৰীগৰাকীয়ে।
২০১২ চনত প্ৰধানমন্ত্ৰীৰ পদত থকাৰ শেষৰ ফালে ড০ সিঙৰ বিৰুদ্ধে কয়লা ব্লক কেলেংকাৰি বা কোলগেট কেলেংকাৰিৰ অভিযোগ উঠিছিল। সেই সময়ত ওড়িশাৰ তালবিৰাত অবৈধভাৱে কয়লা ব্লক আবণ্টন কৰাৰ অভিযোগ উত্থাপন হৈছিল তৎকালীন ইউপিএ চৰকাৰৰ বিৰুদ্ধে। অভিযোগ পোহৰলৈ অহাৰ পাছত বহুতো কয়লা ব্লক আবণ্টন বাতিল কৰা হৈছিল। বিৰোধী দলসমূহে মনমোহন সিং চৰকাৰৰ বিৰুদ্ধে ব্যাপক হুলস্থুলৰ সৃষ্টি কৰিছিল। তৎকালীন কয়লা মন্ত্ৰী আৰু চৰকাৰৰ বহু উচ্চপদস্থ বিষয়াক এই কেলেংকাৰিত অভিযুক্ত কৰা হৈছিল। আনকি এই অভিযোগৰ আঙুলি পোনপটীয়াকৈ প্ৰধানমন্ত্ৰীৰ কাৰ্যালয়লৈকে সম্প্ৰসারিত হৈছিল।
সেই কয়লা কেলেংকাৰিৰ পৰাই এইবাৰ ড০ মনমোহন সিঙক ৰেহাই দিলে উচ্চতম ন্যায়ালয়ে। জীৱিত কালত প্ৰাক্তন প্ৰধানমন্ত্ৰীগৰাকীৰ গায়ে দাগ লগা একমাত্ৰ দুৰ্নীতিৰ অভিযোগ আছিল এই কয়লা কেলেংকাৰি। ইয়াৰ বাহিৰে আন কোনো দুৰ্নীতিত তেওঁৰ নাম পোনপটীয়াকৈ সাঙোৰ খোৱা নাছিল। একমাত্ৰ কোলগেট কেলেংকাৰিতেই নিম্ন আদালতে তেওঁক অভিযুক্ত হিচাপে চমন প্ৰেৰণ কৰিছিল। কিন্তু পৰৱৰ্তী সময়ত চিবিআইয়ে তদন্ত কৰি জনায় যে প্ৰাক্তন প্ৰধানমন্ত্ৰীগৰাকীক অভিযুক্ত হিচাপে দেখুৱাবলৈ কোনো উপযুক্ত প্ৰমাণ পোৱা নাই। অৱশেষত চিবিআইৰ ক্লোজাৰ ৰিপোৰ্টত মনমোহন সিঙক অভিযুক্ত হিচাপে ৰখা নহ’ল।
উচ্চতম ন্যায়ালয়ে চিবিআইৰ সেই ক্লোজাৰ ৰিপোৰ্ট গ্ৰহণ কৰিলে। শীৰ্ষ আদালতে জানিবলৈ দিয়ে যে চিবিআইৰ এই ক্লোজাৰ ৰিপোৰ্ট গ্ৰহণ নকৰাৰ কোনো সংগত কাৰণ দেখা পোৱা নাই। দেশৰ মুখ্য ন্যায়াধীশ সূৰ্য কান্তৰ নেতৃত্বাধীন বেঞ্চে স্পষ্টভাৱে কয় যে চিবিআইৰ নিম্ন কোনো আদালততে এই গোচৰৰ নিষ্পত্তি হ’ব লাগিছিল। ২০২৪ চনতে মনমোহন সিঙৰ মৃত্যু ঘটাৰ বাবে গোচৰটো এমনিও নিষ্প্ৰভ হৈ পৰিছিল। তাৰ উপৰি চিবিআইৰ ৰিপোৰ্ট খাৰিজ কৰিবলৈ কোনো শক্তিশালী প্ৰমাণো নাই। ইয়াৰ অৰ্থ হ’ল মৃত্যুৰ দুবছৰ পাছত অৱশেষত কয়লাৰ দাগৰ পৰা সম্পূৰ্ণ মুক্ত হ’ল ড০ মনমোহন সিং।
