নিৰ্বাচনী গৰম বতাহৰ মাজতে অসমৰ ৰাজনীতিত এক বিশেষ চৰ্চাই লাভ কৰিছে, য’ত ইউ পি পি এলৰ ভৱিষ্যতক লৈ মুখ্যমন্ত্ৰী ড° হিমন্ত বিশ্ব শৰ্মা আৰু বি পি এফৰ মুৰব্বী হাগ্ৰামা মহিলাৰীৰ মাজত এক গোপন বুজাবুজি হোৱাৰ ইংগিত পোৱা গৈছে। শেহতীয়া খবৰ অনুসৰি, বি টি চিৰ ৰাজনীতিত প্রমোদ বড়োৰ শক্তি হ্রাস কৰাৰ লক্ষ্যৰে তেওঁক ৰাজ্যসভালৈ প্ৰেৰণ কৰাৰ এক বিশেষ পৰিকল্পনা যুগুতোৱা হৈছে। আগন্তুক ৰাজ্যসভা নিৰ্বাচনত বি পি এফৰ প্ৰাপ্য আসনখন কৌশলেৰে প্রমোদ বড়োক উপহাৰ দি তেওঁক ৰাজ্যৰ সক্ৰিয় ৰাজনীতিৰ পৰা আঁতৰাই নিবলৈ বিচাৰিছে বিজেপি আৰু বি পি এফে।
ইয়াৰ বিনিময়ত বি টি চিৰ অন্তৰ্গত ১৫টা বিধানসভা সমষ্টিৰ ভিতৰত ১১টাত বি পি এফ আৰু ৪টাত বিজেপিয়ে প্ৰতিদ্বন্দ্বিতা কৰাৰ যো-জা চলাইছে, যাৰ ফলত ইউ পি পি এলৰ বৰ্তমানৰ সাতগৰাকী বিধায়কৰ ৰাজনৈতিক কেৰিয়াৰ সংকটৰ মুখত পৰাৰ সম্ভাৱনা দেখা দিছে। ইতিমধ্যে প্রমোদ বড়োৱে ৰাজ্যসভা নিৰ্বাচনৰ বাবে মনোনয়ন পত্ৰ সংগ্ৰহ কৰা কাৰ্যই এই চৰ্চাক অধিক প্ৰসাৰিত কৰিছে। আনহাতে, বি টি চিৰ অন্তৰ্গত গোৰেশ্বৰ, টংলা, তামুলপুৰ আৰু বিজনী সমষ্টিত বিজেপিৰ প্ৰাৰ্থিত্বক লৈও তীব্ৰ তৎপৰতা আৰম্ভ হৈছে, য’ত অধ্যক্ষ বিশ্বজিৎ দৈমাৰীকে ধৰি বহুকেইজন জ্যেষ্ঠ নেতাৰ নাম উচ্চাৰিত হৈছে।
আন এক শোকাৱহ খবৰে দিল্লীত থকা অসমীয়া সমাজক জোকাৰি গৈছে। দিল্লীৰ মহিপালপুৰত কৰ্মৰত ত্ৰিদিশা বৰা নামৰ এগৰাকী অসমীয়া যুৱতীৰ ৰহস্যজনক মৃত্যুৰ পিছত দিল্লী আৰক্ষীৰ চৰম অৱহেলাৰ অভিযোগ উত্থাপন হৈছে। যোৱা শুকুৰবাৰে নিশা যুৱতীগৰাকীৰ মৃত্যু হোৱাৰ পিছতো তিনিদিন অতিবাহিত হোৱাৰ পাছতো আৰক্ষীয়ে মৰণোত্তৰ পৰীক্ষাৰ ব্যৱস্থা নকৰাত দিশহাৰা হৈ পৰিছে শোকসন্তপ্ত পৰিয়ালটো। ত্ৰিদিশাৰ ভাতৃয়ে অভিযোগ কৰিছে যে আৰক্ষীয়ে বিভিন্ন আইনী প্ৰক্ৰিয়াৰ দোহাই দি তেওঁক হাৰাশাস্তি কৰিছে আৰু এবাৰৰ বাবেও ভনীয়েকৰ মৃতদেহটো চাবলৈ অনুমতি দিয়া নাই। ইয়াৰোপৰি উত্তৰ-পূবৰ লোকৰ প্ৰতি দিল্লী আৰক্ষীয়ে বৈষম্যমূলক আচৰণ কৰাৰো অভিযোগ উত্থাপন হৈছে। ঘৰত মাতৃ চিকিৎসাধীন হৈ থকাৰ সময়তে এনে বিপৰ্যয়ৰ সন্মুখীন হোৱা ভাতৃয়ে এতিয়া মুখ্যমন্ত্ৰী ড° হিমন্ত বিশ্ব শৰ্মাৰ জৰুৰী হস্তক্ষেপ বিচাৰিছে যাতে সকলো আইনী কাম সম্পূৰ্ণ কৰি ভনীয়েকৰ নশ্বৰ দেহটো অসমলৈ ওভোতাই আনিব পৰা যায়।
