বাংলাদেশৰ ফেনী জিলাত পুনৰ এজন হিন্দু লোকৰ মৃতদেহ উদ্ধাৰ হোৱাক লৈ তীব্ৰ উত্তেজনাৰ সৃষ্টি হৈছে। এই ঘটনাই চুবুৰীয়া দেশখনত সংখ্যালঘুসকলৰ নিৰাপত্তাক লৈ নতুনকৈ উদ্বেগৰ সৃষ্টি কৰিছে। মৃত ব্যক্তিজনৰ নাম শমীৰ কুমাৰ দাস বুলি জানিব পৰা গৈছে আৰু তেওঁ ফেনীৰ দাগনভূঞা অঞ্চলৰ বাসিন্দা আছিল।
আৰক্ষীৰ সূত্ৰ অনুসৰি ১১ জানুৱাৰীৰ নিশা শমীৰ কুমাৰ দাসে নিজৰ অটোৰিক্সাখন লৈ ঘৰৰ পৰা ওলাই গৈছিল। তাৰ পিছত নিশা প্ৰায় ২ বজাত তেওঁৰ মৃতদেহ উদ্ধাৰ কৰা হয়।
ফেনী জিলাৰ আৰক্ষী মুৰব্বী শফিকুল ইছলামে সংবাদ মাধ্যমক জনাইছে যে শমীৰ কুমাৰ দাসে নিশা ৮ বজাৰ পিছত ঘৰৰ পৰা ওলাই যোৱাৰ পিছতে নিখোজ হৈছিল। তথ্য লাভ কৰাৰ লগে লগে আৰক্ষীয়ে ঘটনাস্থলীত উপস্থিত হৈ মৃতদেহটো উদ্ধাৰ কৰে আৰু এই সংক্ৰান্তত এটা গোচৰ ৰুজু কৰে। যদিও বৰ্তমানলৈকে এই ঘটনাত জড়িত কোনো লোকক গ্ৰেপ্তাৰ কৰা হোৱা নাই, তথাপিও আৰক্ষীয়ে ঘটনাটোৰ তদন্ত অব্যাহত ৰাখিছে আৰু দোষীক চিনাক্ত কৰিবলৈ চেষ্টা চলাই আছে। অভিযোগ উঠিছে যে আক্ৰমণকাৰীয়ে শমীৰ কুমাৰ দাসৰ উপাৰ্জনৰ একমাত্ৰ উৎস হিচাপে থকা অটোৰিক্সাখনো লুটি লৈ গৈছে।
এই হত্যাকাণ্ডৰ পিছতে বিজেপি নেতা অমিত মালব্যই বাংলাদেশৰ অন্তৱৰ্তীকালীন চৰকাৰক তীব্ৰ সমালোচনা কৰিছে। তেওঁ সামাজিক মাধ্যম এক্সৰ জৰিয়তে কয় যে বাংলাদেশৰ চৰকাৰে হিন্দু, খ্ৰীষ্টান আৰু বৌদ্ধ ধৰ্মৰ লোকসকলৰ ওপৰত হোৱা নিৰ্যাতন ৰোধ কৰিবলৈ কোনো ধৰণৰ পদক্ষেপ লোৱা নাই।
ইয়াৰ উপৰিও অমিত মালব্যই পশ্চিম বংগৰ ৰাজনীতিৰ প্ৰসংগ টানি আনি কয় যে যদি ২০২৬ চনত মমতা বেনাৰ্জী পুনৰ ক্ষমতালৈ আহে, তেন্তে পশ্চিম বংগৰ হিন্দুসকলৰ অৱস্থাও বাংলাদেশৰ দৰেই হ’ব পাৰে। তেওঁ হৰগোবিন্দ দাস আৰু তেওঁৰ পুত্ৰ চন্দন দাসৰ হত্যাকাণ্ডৰ কথা উল্লেখ কৰি সকীয়াই দিয়ে যে হিন্দু বঙালীসকলে কোনো ভ্ৰমৰ মাজত থকা উচিত নহয়। বৰ্তমান এই ঘটনাই দুয়োখন দেশৰ ৰাজনৈতিক মহলত যথেষ্ট চৰ্চা লাভ কৰিছে। ইফালে ফেনী আৰক্ষীয়ে আশ্বাস দিছে যে তেওঁলোকে ঘটনাটোৰ সঠিক তদন্ত কৰি অপৰাধীক অতি সোনকালে কৰায়ত্ত কৰিব।
