পুনৰ হ’ব নেকি লকডাউন! ছেপ্টেম্বৰৰ দ্বিতীয় সপ্তাহত তিনিদিনৰ বাবে সম্পূৰ্ণ ‘লক’ হৈ থাকিব দিল্লী। কভিড বা আন কোনো কাৰণত নহয়, ৮ ছেপ্টেম্বৰৰ পৰা দিল্লীত অনুষ্ঠিত হ’ব তিনিদিনীয়া জি-২০ সন্মিলন । এই বৈঠকত আমেৰিকাৰ ৰাষ্ট্ৰপতি জো বাইডেনকে ধৰি বিভিন্ন দেশৰ ৰাষ্ট্ৰপতিসকলে অংশগ্ৰহণ কৰিব। তেওঁলোকৰ সুৰক্ষা নিশ্চিত কৰিবলৈ কেন্দ্ৰীয় চৰকাৰ আৰু দিল্লী চৰকাৰে যৌথভাৱে ৮ ছেপ্টেম্বৰৰ পৰা ১০ ছেপ্টেম্বৰলৈ ৰাজধানীখন ‘লক’ কৰাৰ সিদ্ধান্ত লৈছে।
উল্লেখ্য যে দিল্লীৰ যান-বাহন ব্যৱস্থা অতি বেয়া। জি-২০ বৈঠকৰ সময়ত যাতে বিভিন্ন দেশৰ ৰাষ্ট্ৰপতিসকলে যান-বাহন সমস্যাৰ সন্মুখীন হ’ব নালাগে, তাৰ প্ৰতি লক্ষ্য ৰাখিছে কেন্দ্ৰীয় চৰকাৰে। সেয়েহে কেন্দ্ৰটোৱে অহা ৮ ছেপ্টেম্বৰৰ পৰা ১০ ছেপ্টেম্বৰলৈ সকলো চৰকাৰী বিদ্যালয়, বিভিন্ন চৰকাৰী কাৰ্যালয় বন্ধৰ ঘোষণা কৰিছে। আনকি কেন্দ্ৰীয় চৰকাৰেও সকলো মন্ত্ৰালয় আৰু বিভাগ বন্ধ কৰাৰ সিদ্ধান্ত লৈছে।
ইতিমধ্যে দিল্লী চৰকাৰে বিভিন্ন বিদ্যালয়, কাৰ্যালয় আদিৰ বন্ধৰ সন্দৰ্ভত নিৰ্দেশনা জাৰি কৰিছে। এই নিৰ্দেশনা অনুসৰি দিল্লীৰ সকলো ব্যক্তিগত কাৰ্যালয় আৰু ব্যক্তিগত বিদ্যালয়-মহাবিদ্যালয় ৮ ছেপ্টেম্বৰৰ পৰা ১০ ছেপ্টেম্বৰলৈ বন্ধ থাকিব। অৰ্থাৎ চৰকাৰী কাৰ্যালয়, বিদ্যালয়ৰ লগতে দিল্লীৰ সকলো ব্যক্তিগত কাৰ্যালয় আৰু বিদ্যালয় এই তিনিদিনৰ বাবে বন্ধ থাকিব। অৱশ্যে মেট্ৰ’ৰ চলাচলত কোনো ধৰণৰ নিষেধাজ্ঞা আৰোপ কৰা হোৱা নাই। কিন্তু কেৱল গুৰুত্বপূৰ্ণ ষ্টেচনসমূহতহে প্ৰৱেশ আৰু প্ৰস্থান পথত কটকটীয়া নিৰাপত্তা থাকিব।
আনহাতে দিল্লীৰ সকলো ব্যক্তিগত বেংক ৮ ছেপ্টেম্বৰৰ পৰা ১০ ছেপ্টেম্বৰলৈ বন্ধ থাকিব। অৰ্থাৎ এই তিনিদিন নেট বেংকিং আৰু এ টি এম সেৱা খোলা থাকিলেও বেংকত কাম নাথাকিব। আনকি দিল্লী চৰকাৰেও পথৰ বিভিন্ন দোকান-পোহাৰ আৰু ব্যৱসায়িক প্ৰতিষ্ঠান বন্ধ কৰাৰ বাবে নিৰ্দেশনা জাৰি কৰিছে। যদি বেংকত কোনো বিশেষ প্ৰয়োজনীয়তা আছে তেন্তে ৮ ছেপ্টেম্বৰৰ আগতে কৰিব লাগে।
জানিব পৰা মতে, দিল্লীত আয়োজিত জি-২০ বৈঠকলৈ আহিব বিভিন্ন দেশৰ প্ৰতিনিধি। তেওঁলোক থকাৰ বাবে দিল্লীৰ ৩৫ খন বিলাসী হোটেল বুকিং কৰিছে বৈদেশিক পৰিক্ৰমা মন্ত্ৰালয়ে। য’ত আছে টাচ পেলেচ, হোটেল তাজমহল, লো মেৰিডিয়ানৰ দৰে পঞ্চতাৰকাযুক্ত হোটেল। এই হোটেলসমূহ বৈদেশিক পৰিক্ৰমা মন্ত্ৰালয়ে ৮ পৰা ১০ তাৰিখলৈকে তিনিদিনৰ বাবে বুকিং কৰিছে। স্বাভাৱিকতে এই তিনিদিনৰ বাবে এই হোটেলসমূহে আন অতিথি নিষিদ্ধ কৰিছে।
ভাৰতৰ ৰাষ্ট্ৰপতিয়ে অংশগ্ৰহণ কৰা এইবাৰৰ জি-২০ বৈঠকত আমেৰিকা, কানাডা, মেক্সিকো, আৰ্জেণ্টিনা, দক্ষিণ কোৰিয়া, ব্ৰাজিল, দক্ষিণ আফ্ৰিকা, চীন, জাপান, ইণ্ডোনেছিয়া, ৰাছিয়া, তুৰস্ক, ফ্ৰান্স, জাৰ্মানী, ইটালী, ব্ৰিটেইন, চৌদি আৰব আৰু অষ্ট্ৰেলিয়া দেশে অংশগ্ৰহণ কৰিব। ইয়াৰ উপৰিও বাংলাদেশ, ওমান, ছিংগাপুৰ, স্পেইন, নাইজেৰিয়াকে ধৰি কেইবাখনো দেশ অতিথি দেশ হিচাপে উপস্থিত থাকিব।
