নিৰ্বাচনত জয়ী হোৱাৰ কেইঘণ্টামানৰ ভিতৰতে ৰাজস্থানৰ হাৱা মহলৰ বিজেপি বিধায়ক বালমুকুন্দ আচাৰ্যই নিজৰ বিতৰ্কিত মন্তব্যৰে শিৰোনাম দখল কৰিছে। এতিয়া অনুসূচিত জাতিৰ এজন ব্যক্তিৰ গাত থু পেলোৱা আৰু আক্ৰমণ কৰাৰ অভিযোগত বিজেপিৰ বিধায়কগৰাকীৰ বিৰুদ্ধে গোচৰ ৰুজু হৈছে।
ৰাজস্থানৰ পিঠাৱাছ গাঁৱত সুৰজমল ৰেগাৰ নামৰ এজন লোকক আক্ৰমণৰ বালমুকুন্দই আক্ৰমণ কৰাৰ অভিযোগ উত্থাপন হৈছে।
সুৰজমলে কয় যে সুৰজ শৰ্মা ওৰফে বালমুকুন্দ আচাৰ্যই অবৈধভাৱে তেওঁৰ মাটি দখল কৰিবলৈ চেষ্টা কৰিছিল। তেওঁ বালমুকুন্দক বাধা দিয়াৰ বাবে বালমুকুন্দই তেখেতক আক্ৰমণ কৰে।
আদালতৰ নিৰ্দেশৰ পিছতে বালমুকুন্দ আচাৰ্যৰ বিৰুদ্ধে অনুসূচিত জাতি/জনজাতি আইন আৰু ভাৰতীয় দণ্ডবিধিৰ ৩২৩ আৰু ৩৪১ ধাৰাত এফআইআৰ দাখিল কৰা হৈছে।
আৰক্ষীয়ে বালমুকুন্দৰ বিৰুদ্ধে এজাহাৰ দাখিল কৰিবলৈ অস্বীকাৰ কৰাৰ বাবে আদালতৰ কাষ চাপিবলৈ বাধ্য হয় ভুক্তভোগী সুৰজমল।
নিউজ পৰ্টেল দ্য ৱাৰক সুৰজমলে কয়, ‘আমি বালমুকুণ্ড আচাৰ্যৰ বিৰুদ্ধে এজাহাৰ দাখিল কৰিবলৈ জয়পুৰৰ কাৰ্ধনী থানালৈ গৈছিলো। কিন্তু আৰক্ষীয়ে অভিযোগ ল’বলৈ সন্মত নহ’ল। অৱশেষত আমি আদালতলৈ গৈ আমাৰ অভিযোগ আদালতৰ জৰিয়তে পঞ্জীয়ন কৰিব লগা হ’ল। হাৱা মহলৰ আসনৰ পৰা জয়ী হোৱাৰ এদিন পিছত ৪ ডিচেম্বৰত বালমুকুণ্ড আচাৰ্যৰ বিৰুদ্ধে এফআইআৰ দাখিল কৰা হৈছিল।”
এফ আই আৰত উল্লেখ আছে যে সুৰজমলৰ মাটি তেওঁ অবৈধভাৱে দখল কৰিবলৈ চেষ্টা কৰিছিল, তেওঁক প্ৰহাৰ কৰাৰ লগতে তেওঁক থু পেলাই নিৰ্যাতন চলাইছিল।
ইয়াৰ পূৰ্বে নিৰ্বাচনত জয়ী হোৱাৰ পিছত বালমুকুণ্ডে পথৰ দাঁতিত আমিষ খাদ্য বন্ধ কৰিবলৈ নিৰ্দেশ দিয়ে। তেওঁৰ সেই নিৰ্দেশনাৰ ভিডিঅ’ ভাইৰেল হৈ পৰে ছ’চিয়েল মিডিয়াত। ৰাজপথৰ ব্যৱসায়ী আইন উলংঘা কৰাৰ অভিযোগত ৰাষ্ট্ৰীয় মানৱ অধিকাৰ আয়োগতো তেওঁৰ বিৰুদ্ধে গোচৰ ৰুজু কৰা হৈছে।
