ৰোগীৰ লগত আৰু কিমান কিমান হেতালী খেলিব একাংশ চিকিৎসকে? এইবাৰ চিকিৎসালয়ত মৃত বুলি ঘোষণা কৰা শিশু জী উঠিল শেষকৃত্য কৰাৰ সময়ত। এই ঘটনা সংঘটিত হৈছে পশ্চিমবংগৰ মেদিনীপুৰ জিলাত।
মেদিনীপুৰ জিলাৰ ছুপাৰ স্পেচিয়েলিটি হস্পিতালৰ বিৰুদ্ধে উত্থাপন হৈছে এই ভয়ানক অভিযোগ।
অভিযোগ অনুসৰি শনিবাৰে পুৱা প্ৰসৱ বেদনা আৰম্ভ হোৱাৰ বাবে ৰাস্কুণ্ডু অঞ্চলৰ এগৰাকী প্ৰসূতিক দিনৰ ১২ মান বজাত হাস্পতালখনত ভৰ্তি কৰোৱা হয়। দুপৰীয়া ২ মান বজাত প্ৰসূতিগৰাকীয়ে এটি পুত্ৰ সন্তান জন্ম দিয়ে। সন্ধিয়া ৫ বজাত পৰিয়ালৰ লোকক চিকিৎসকে জানিবলৈ দিয়ে যে জন্ম হোৱাৰ ২০ মিনিট মানৰ পিছতেই তেওঁলোকৰ সন্তানটিৰ মৃত্যু ঘটিছে।
নিশা ৯ মান বজাত আনুষ্ঠানিকতা শেষ কৰি মৃত্যুৰ প্ৰমাণ পত্ৰসহ হাস্পাতাল কৰ্তৃপক্ষই নৱজাতকটিক পৰিয়ালৰ হাতত গতাই দিয়ে । নিশা ১০.৩০ মান বজাত নৱজাতটিক লৈ ঘৰলৈ উভটি যায় পৰিয়ালটো।
ঘৰলৈ গৈ পৰিয়ালটোৱে শিশুটিৰ শেষকৃত্য কৰাৰ কথা চিন্তা কৰি থকাৰ সময়তে হঠাতে শিশুটিৰ শাৰীৰিক প্ৰতিক্ৰিয়া লক্ষ্য কৰে। লগে লগেই বিপাঙত পৰা পৰিয়ালটোৱে পুনৰ চিকিৎসালয়লৈ লৈ যায় মৃত্যুৰে সৈতে যুঁজি থকা শিশুটিক। পুনৰ চুপাৰ স্পেচিয়েলিটি হাস্পাতালত ভৰ্তি কৰা হয় শিশুটিক। কিন্তু চিকিৎসালয় পোৱাৰ পিছত এইবাৰ সঁচাকৈয়ে শেষ নিশ্বাস ত্যাগ কৰে শিশুটিয়ে।
এই ঘটনাক অভূতপূৰ্ব ঘটনা আখ্যা দি পৰিয়ালটোৱে পশ্চিম মেদিনীপুৰ জিলাৰ ছুপাৰ স্পেচিয়েলিটি হস্পিতালৰ চিকিৎসাৰ গাফিলতিৰ অভিযোগ উত্থাপন কৰি তদন্তৰ দাবী জনাইছে।
জিলা স্বাস্থ্য বিভাগে জনোৱা মতে, নৱজাতকটোৰ মৃত্যু কেনেকৈ আৰু কেতিয়া হ’ল তাৰ তদন্তৰ বাবে দুখন উচ্চ পৰ্যায়ৰ তদন্ত সমিতি গঠন কৰা হৈছে।
পৰিয়ালৰ লোকে দাবী কৰে যে দ্বিতীয়বাৰ শিশুটিয়ে সঁচাকৈয়ে শেষ নিশ্বাস ত্যাগ কৰাৰ পিছত চিকিৎসালয়খনৰ পৰা দ্বিতীয়বাৰৰ বাবে মৃত্যুৰ প্ৰমাণ পত্ৰ প্ৰদান কৰা হোৱা নাছিল।
নৱজাতকৰ এজন সম্বন্ধীয় বকুল খানে কয়, “শিশুটোক ৮ ঘণ্টা ধৰি চিকিৎসা অবিহনে ৰখা হৈছিল। এই চিকিৎসালয়ৰ চিকিৎসকেই শিশুটিৰ মৃত্যুৰ বাবে দায়ী। আমি তেওঁৰ বাবে আদৰ্শ শাস্তি বিচাৰো।”
শিশুটিৰ পিতৃ আলী আহমেদ খানে দাবী কৰা মতে, দেওবাৰে পুৱা যেতিয়া তেওঁ চিকিৎসালয়খনত অধীক্ষকক লগ কৰিবলৈ গৈছিল তেতিয়া তেওঁ তাত উপস্থিত নাছিল।
দেওবাৰে বিয়লি চিকিৎসালয়ৰ অধীক্ষক সুব্ৰত দে আৰু জিলা মুখ্য স্বাস্থ্য বিষয়া সৌম্যশংকৰ ছাংগীয়ে মৃতকৰ পৰিয়ালৰ সৈতে এক বৈঠকত মিলিত হয়। সভাত বিজেপিৰ বিধায়ক শীতল কাপতো উপস্থিত থাকে।
ইতিমধ্যে এই ঘটনাৰ তদন্ত আৰম্ভ কৰা হৈছে।
