পশ্চিম কাৰ্বি আংলঙৰ খেৰণীত হোৱা ভূমি বিবাদক কেন্দ্ৰ কৰি সৃষ্টি হোৱা অশান্তি নিৰাময়ৰ বাবে জনতা ভৱনত এখন ত্ৰিপাক্ষিক বৈঠক অনুষ্ঠিত হয়। মুখ্যমন্ত্ৰী ড° হিমন্ত বিশ্ব শৰ্মাৰ অধ্যক্ষতাত বহা এই বৈঠকত কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, কাৰ্বি ৰজা আৰু প্ৰতিবাদকাৰী সংগঠনসমূহৰ প্ৰতিনিধিয়ে অংশগ্ৰহণ কৰে।
বৈঠকত সিদ্ধান্ত লোৱা হয় যে অহা ৫ জানুৱাৰীৰ ভিতৰত স্বায়ত্তশাসিত পৰিষদে ভূমি বিবাদ সংক্ৰান্তীয় এক বিতং প্ৰতিবেদন দাখিল কৰিব লাগিব। একে সময়তে স্থানীয় কাৰ্বি জনসাধাৰণেও নিজৰ অধিকাৰ আৰু দাবীসমূহ চৰকাৰৰ ওচৰত দাখিল কৰাৰ সুযোগ পাব। বিষয়টো যিহেতু বৰ্তমান ন্যায়ালয়ৰ অধীনত, সেয়েহে ইয়াৰ সংবেদনশীলতাৰ প্ৰতি লক্ষ্য ৰাখি চৰকাৰে আদালতক সোনকালে শুনানি প্ৰক্ৰিয়া সম্পূৰ্ণ কৰিবলৈ অনুৰোধ জনাইছে।
উক্ত বৈঠকত ভূমি বেদখলমুক্ত কৰাৰ বাবে কেইবাটাও কঠোৰ নিৰ্দেশনা প্ৰদান কৰা হৈছে। খেৰণীৰ চৰকাৰী চৰণীয়া পথাৰ আৰু গাঁও চৰণীয়া পথাৰ এলেকাত থকা প্ৰায় ৮ হাজাৰ বিঘা ভূমিত পৰিষদে কাঁইটীয়া তাৰৰ বেৰ দি বনানীকৰণ কৰিব যাতে ভৱিষ্যতে কোনেও তাত বেদখল কৰিব নোৱাৰে। এই এলেকাত থকা সকলো চৰকাৰী কাৰ্যালয় আন স্থানলৈ স্থানান্তৰ কৰাৰ সিদ্ধান্ত লোৱাৰ লগতে তাত চলি থকা সকলো ব্যৱসায়িক অনুজ্ঞাপত্ৰ বাতিল কৰাৰ নিৰ্দেশ দিয়া হৈছে।
ইয়াৰ উপৰিও বোকালিয়া জলসিঞ্চন প্ৰকল্পৰ ভূমিত চলি থকা বেদখলৰ বিৰুদ্ধেও অতি সোনকালে উচ্ছেদ অভিযান আৰম্ভ কৰা হ’ব। আৰক্ষীৰ গুলীচালনাত নিহত হোৱা যুৱকজনৰ পৰিয়ালক ১০ লাখ টকাৰ এককালীন সাহায্য আৰু পৰিষদৰ অধীনত চাকৰি প্ৰদানৰ কথা ঘোষণা কৰা হৈছে।
এই সমস্যাটো সমাধানৰ বাবে অহা ১৭ জানুৱাৰীত পুনৰ এখন বৈঠক অনুষ্ঠিত হ’ব য’ত পৰিষদৰ ভূমি নীতি আৰু হস্তান্তৰৰ নিয়মসমূহৰ ওপৰত চৰ্চা কৰা হ’ব।
