অসম প্ৰদেশ কংগ্ৰেছৰ সভাপতি তথা সাংসদ গৌৰৱ গগৈয়ে আজি ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে এক গুৰুতৰ অভিযোগ উত্থাপন কৰিছে।
সংবাদমেল সম্বোধন কৰি গগৈয়ে কয় যে মুখ্যমন্ত্ৰীয়ে মুছলমানসকলৰ বিৰুদ্ধে গণহত্যাৰ উচতনি দিছে। তেওঁ লগতে এই বিষয়ত আৰক্ষীক স্বতঃস্ফূৰ্তভাৱে গোচৰ ৰুজু কৰি ব্যৱস্থা ল’বলৈ আহ্বান জনায়।
গৌৰৱ গগৈয়ে ৰাজ্যিক বিজেপিয়ে শেহতীয়াকৈ সামাজিক মাধ্যমত শ্বেয়াৰ কৰি পিছত ডিলিট কৰা এটা ভিডিঅ’ৰ উদ্ধৃতি দি এই মন্তব্য কৰে। তেওঁৰ মতে সেই ভিডিঅ’টোত মুখ্যমন্ত্ৰীয়ে টুপি পিন্ধা আৰু দাড়ি থকা দুজন ব্যক্তিলৈ লক্ষ্য কৰি ৰাইফল চলোৱা দেখা গৈছিল য’ত পইণ্ট ব্লেংক শ্বট বুলি লিখা আছিল।
গগৈয়ে স্পষ্টকৈ কয় যে মুখ্যমন্ত্ৰীয়ে এনে ভিডিঅ’ৰ জৰিয়তে এটা বিশেষ সম্প্ৰদায়ক লক্ষ্য কৰি লৈছে আৰু সমাজত বিভাজন আনিবলৈ চেষ্টা কৰিছে।
ইফালে মুখ্যমন্ত্ৰীয়ে গৌৰৱ গগৈ আৰু তেওঁৰ পৰিয়ালৰ পাকিস্তানৰ সৈতে সম্পৰ্ক থকা বুলি কৰা অভিযোগকো গগৈয়ে সম্পূৰ্ণৰূপে নাকচ কৰে। তেওঁ জনায় যে তেওঁৰ পত্নী ২০১৩ চনত কামৰ সূত্ৰে পাকিস্তানলৈ গৈছিল আৰু সেই সময়ত তেৱোঁ দহ দিনৰ বাবে পত্নীৰ সৈতে তালৈ গৈছিল। এই বিষয়ত তদন্ত কৰিবলৈ গঠন কৰা বিশেষ তদন্তকাৰী গোট চমুকৈ এছ আই টিয়ে তেওঁক কেতিয়াও কোনো প্ৰশ্ন কৰা নাই বুলিও তেওঁ উল্লেখ কৰে।
গগৈয়ে অভিযোগ কৰে যে যিহেতু তেওঁৰ বিৰুদ্ধে কোনো প্ৰমাণ নাই সেইবাবেই মুখ্যমন্ত্ৰীয়ে যোৱা ছমাহ ধৰি তদন্তকাৰী গোটৰ প্ৰতিবেদনটো লুকুৱাই ৰাখিছে। ইয়াৰ উপৰি মুখ্যমন্ত্ৰীয়ে গগৈৰ নাবালক সন্তানকো এই বিতৰ্কৰ মাজলৈ টানি অনাৰ বাবে তেওঁ আইনী ব্যৱস্থা গ্ৰহণ কৰাৰ কথা চিন্তা কৰিছে বুলি জানিবলৈ দিয়ে। তেওঁৰ মতে এজন সাংবিধানিক পদত থকা ব্যক্তিৰ পৰা এনে আচৰণ আশা কৰিব নোৱাৰি আৰু আইন শৃংখলা ৰক্ষাকাৰী বাহিনীয়ে এনে কাৰ্যৰ বিৰুদ্ধে কঠোৰ হোৱা উচিত।
