মহাপুৰুষ শ্ৰীমন্ত শংকৰদেৱৰ অপূৰ্ব সৃষ্টি, ১৫শ শতিকাৰ বৃন্দাবনী বস্ত্ৰ অসমলৈ অনাৰ যাৱতীয় ব্যৱস্থা গ্ৰহণৰ বাবে মুখ্যমন্ত্ৰী ড° হিমন্ত বিশ্ব শৰ্মা শনিবাৰে লণ্ডন অভিমুখে ৰাওনা হৈছে। এই অমূল্য ঐতিহাসিক সম্পদটোৰ বিষয়ে সামাজিক মাধ্যমযোগে মুখ্যমন্ত্ৰীয়ে নিজেই সদৰী কৰে।
তেওঁ জনায় যে বহু প্ৰজন্মই এই বস্ত্ৰভাগ চাবলৈ পোৱা নাই, যি কালক্ৰমত অসমৰ পৰা তিব্বত হৈ লণ্ডন আৰু পেৰিছৰ দৰে স্থানলৈ গৈছিল। বৰ্তমান ই লণ্ডনৰ মিউজিয়ামত সংৰক্ষিত হৈ আছে।
কাইলৈৰ দিনটোত লণ্ডন মিউজিয়াম কৰ্তৃপক্ষৰ সৈতে আলোচনা আছে আৰু সম্ভৱতঃ এখন বুজাবুজিৰ চুক্তি স্বাক্ষৰিত হ’ব। জে এছ ডব্লিউ (JSW) গ্ৰুপৰ সজ্জন জিন্দালে এই ক্ষেত্ৰত আগভাগ লৈছে আৰু মিউজিয়াম কৰ্তৃপক্ষই বিচৰা ধৰণে সকলো সুবিধা থকা এক অত্যাধুনিক সংগ্ৰহালয় গুৱাহাটীৰ খানাপাৰাত নিৰ্মাণ কৰি দিব।
এই মিউজিয়ামৰ স্বত্বাধিকাৰ অসম চৰকাৰেই হ’ব। চুক্তিমতে, ২০২৭ চনত বৃন্দাবনী বস্ত্ৰ অসমলৈ অনাৰ লক্ষ্য স্থিৰ কৰা হৈছে, যাতে অসমবাসীৰ লগতে সমগ্ৰ ভাৰতবাসীয়ে এই ঐতিহাসিক সম্পদ দৰ্শন কৰি অসমীয়া সভ্যতাৰ চহকী ইতিহাসৰ বিষয়ে জানিব পাৰে।
মুখ্যমন্ত্ৰী ১৮ নৱেম্বৰত অসমলৈ উভতি আহিব,। সেইদিনা জুবিন গাৰ্গৰ জন্মদিন উপলক্ষে ৰাজ্যজুৰি বৃহৎ ৰক্তদান শিবিৰৰ আয়োজন কৰা হৈছে।
