গুজৰাট এ টি এচ আৰু অন্যান্য কেন্দ্ৰীয় তদন্তকাৰী সংস্থাৰ তৎপৰতাত দেশবাসী এক বৃহৎ সন্ত্ৰাসবাদী আক্ৰমণৰ পৰা ৰক্ষা পৰিল। আইছিছ (ISIS)-ৰ সৈতে জড়িত থকাৰ অভিযোগত এ টি এছে শেহতীয়াকৈ তিনিজন প্ৰশিক্ষিত সন্ত্ৰাসবাদীক গ্ৰেপ্তাৰ কৰিছে, যিকেইজনে দেশত ভয়ংকৰ কূটঘাটমূলক পৰিকল্পনা কৰাৰ সন্দেহ কৰা হৈছে।
গ্ৰেপ্তাৰ হোৱা সন্ত্ৰাসবাদী কেইজন হ’ল ক্ৰমে- ডাঃ মহিউদ্দিন চৈয়দ, মহম্মদ চুহেল, আৰু আজাদ। ইয়াৰে দুজন উত্তৰ প্ৰদেশৰ আৰু এজন হায়দৰাবাদৰ বাসিন্দা। সূত্ৰ অনুসৰি, এই তিনিওজনৰ বয়স প্ৰায় ৩০ ৰ পৰা ৩৫ বছৰৰ ভিতৰত।
গুজৰাট এ টি এছে গোপন সূত্ৰৰ ভিত্তিত অভিযান চলাই অস্ত্ৰ বিনিময় কৰিবলৈ অহাৰ সময়তে তিনিওজনক গ্ৰেপ্তাৰ কৰে। এ টি এছে তেওঁলোকৰ পৰা দুটা গ্লক পিষ্টল, এটা বেৰেটা পিষ্টল, ৩০টা সজীৱ কাৰ্টিজ, আৰু ৪ লিটাৰ কেষ্টাৰ অইল উদ্ধাৰ কৰে।
বৰ্তমান সন্ত্ৰাসবাদীকেইজনক জেৰা চলাই থকা হৈছে। প্ৰাৰম্ভিক সূত্ৰ অনুসৰি, গ্ৰেপ্তাৰ হোৱা কেইজনে লক্ষ্ণৌৰ আৰ্ন এছ এছৰ কাৰ্যালয়ত নজৰ ৰখাৰ লগতে দিল্লীৰ আজাদপুৰ মণ্ডীৰ বিভিন্ন অঞ্চলত ঘূৰি ফুৰিছিল। তদন্তকাৰী সংস্থাই সন্দেহ কৰিছে যে এই গ্ৰুপটো এটা ডাঙৰ সন্ত্ৰাসবাদী নেটৱৰ্কৰ অংশ, যাৰ ভিতৰত বহুতো ‘শ্লিপাৰ চেল’ সক্ৰিয় হৈ আছে। মন কৰিবলগীয়া যে এই তিনিওজন সন্ত্ৰাসবাদীয়ে বিগত এক বছৰ ধৰি গুজৰাট এ টি এচৰ ৰাডাৰত আছিল।
ইফালে আন এক সফল অভিযানত হাৰিয়ানা আৰক্ষী আৰু জম্মু-কাশ্মীৰ আৰক্ষীয়ে যৌথভাৱে ফৰিদাবাদত অভিযান চলাই আন দুজনক গ্ৰেপ্তাৰ কৰে।
এই গোচৰত দুগৰাকী চিকিৎসক ক্ৰমে- ডাঃ আদিল আহমেদ ৰাথেৰ (অনন্তনাগৰ বাসিন্দা) আৰু ডাঃ মুজাম্মিল শ্বাকিল (পুলৱামাৰ বাসিন্দা)ৰ নাম পোহৰলৈ আহিছে। এজন আন অভিযুক্ত বৰ্তমান পলাতক হৈ আছে।
