অসমৰ আগন্তুক বিধানসভা নিৰ্বাচনৰ বাবে তুংগত উঠিছে ৰাজনৈতিক তৎপৰতা। ৰাজ্যৰ শাসনত থকা বিজেপি নেতৃত্বাধীন মৰ্চাক শাসনৰ পৰা ওফৰাই এখন ধৰ্মনিৰপেক্ষ আৰু গণতান্ত্ৰিক চৰকাৰ গঠনৰ লক্ষ্যৰে চি পি আই (এম)-এ আজি দুটা গুৰুত্বপূৰ্ণ সমষ্টিৰ বাবে প্ৰাৰ্থীৰ নাম ঘোষণা কৰিছে। বিৰোধী ঐক্য আৰু আসন বুজাবুজিৰ অংশ হিচাপে দলটোৱে ২১ নং ভৱানীপুৰ-সৰভোগ আৰু ৪৪ নং গোৰেশ্বৰ সমষ্টিৰ বাবে প্ৰাৰ্থী ঘোষণা কৰে।
ভৱানীপুৰ-সৰভোগ সমষ্টিৰ পৰা নিৰ্বাচন খেলিব বৰ্তমানৰ বিধায়ক তথা জ্যেষ্ঠ কমিউনিষ্ট নেতা মনোৰঞ্জন তালুকদাৰ। আনহাতে গোৰেশ্বৰ সমষ্টিৰ পৰা নিৰ্বাচনত অৱৰ্ত্তীণ হ’ব অৱসৰপ্ৰাপ্ত প্ৰধান শিক্ষক তথা দলীয় নেতা বাপু ৰাম বড়ো।
চিপিআই(এম)-ৰ অসম ৰাজ্যিক কমিটিয়ে জনোৱা অনুসৰি, বিজেপি চৰকাৰক ক্ষমতাচ্যুত কৰিবলৈ ধৰ্মনিৰপেক্ষ দলসমূহৰ একত্ৰিত হোৱাটো জৰুৰী। এই লক্ষ্য আগত ৰাখিয়েই ইতিমধ্যে কংগ্ৰেছ, অসম জাতীয় পৰিষদ, এপিএইচএলচি আৰু চি পি আই (এম-এল)-ৰ সৈতে আসন বুজাবুজিৰ প্ৰক্ৰিয়া সম্পূৰ্ণ কৰা হৈছে।
দলটোৰ ৰাজ্যিক কমিটিয়ে এক প্ৰেছ বিবৃতিত উল্লেখ কৰে যে অসমত গণতন্ত্ৰ ৰক্ষা আৰু সাম্প্ৰদায়িকতাৰ বিৰুদ্ধে যুঁজ দিবলৈ এই বিৰোধী মিত্ৰতা অপৰিহাৰ্য। সমষ্টি দুটাৰ উমৈহতীয়া প্ৰাৰ্থী হিচাপে মনোনীত হোৱা এই দুই নেতাক বিপুল ভোটত জয়ী কৰাই বিধানসভালৈ পঠিয়াবলৈ দলটোৱে সৰ্বসাধাৰণ ৰাইজ তথা ভোটাৰসকলৰ প্ৰতি আহ্বান জনাইছে।
ৰাজনৈতিক বিশ্লেষকসকলৰ মতে, বিৰোধীৰ এই আসন বুজাবুজি আৰু প্ৰাৰ্থী ঘোষণাই নিৰ্বাচনী যুঁজখনক অধিক তীব্ৰতৰ কৰি তুলিব।
