মোদী চৰকাৰে নাগৰিকত্ব সংশোধনী বিধেয়ক আজি লোকসভাত উত্থাপন কৰে। লোকসভাত বিজেপিৰ সংখ্যাগৰিষ্ঠতা আছে। গতিকেই লোকসভাত বিধেয়কখন গৃহীত কৰাটো সহজ হৈ পৰিছে।
কিন্তু মোদী চৰকাৰৰ বাবে প্ৰত্যাহ্বানটো আহিব ৰাজ্যসভাতহে। অৱশ্যেই জনতা দল য়ুনাইটেড, টী আৰ এছ, ৱাই এছ আৰ আৰু শিৱসেনাৰ ওপৰত বহুখিনি নিৰ্ভৰ কৰিছে।
ৰাজ্যসভাত এনডিএৰ সংখ্যাগৰিষ্ঠতা নথকাৰ বাবে নাগৰিকত্ব সংশোধনী বিধেয়ক গৃহীত কৰাবলৈ অন্য দলৰ সহায়ৰ প্ৰয়োজন হ’ব।
বিগত দুটা বছৰত ৰাজ্যসভাত বিজেপি তথা এন ডি এৰ শক্তি বৃদ্ধি পাইছে। তদুপৰি, বিৰোধী দলৰ ভিতৰত বিজু জনতা দল আৰু এআইএডিএমকে দলে নাগৰিকত্ব সংশোধনী বিধেয়কৰ প্ৰতি সমৰ্থন দিব পাৰে।
ৰাজ্যসভাত বৰ্তমান মুঠ সদস্যৰ সংখ্যা ২৩৯গৰাকী। যদি সদনৰ প্ৰত্যেকেই ভোটদান কৰে তেতিয়াহ’লে সংখ্যাগৰিষ্ঠতাৰ বাবে ১২০টা ভোটৰ প্ৰয়োজন হ’ব।
এন ডি এক সমৰ্থন কৰিব পৰা দলকেইটাৰ কথা বিবেচনা কৰিলে সম্ভাৱ্য সংখ্যা হয়গৈ ১১৪। ইয়াৰ মাজত বিজেপিৰ ৮৩, বিজেডিৰ ৭, এআইএডিএমকেৰ ১১ আৰু আকালি দলৰ ৩গৰাকী সদস্য আছে।
নাগৰিকত্ব সংশোধনী বিধেয়ক সন্দৰ্ভত বিৰোধীৰ যি ক্ষোভ তালৈ চাই ৰাজ্যসভাত চৰকাৰ তীব্ৰ প্ৰত্যাহ্বানৰ সন্মুখীন হোৱাৰ সম্ভাৱনা আছে। কংগ্ৰেছৰ ৪৬, তৃণমূল কংগ্ৰেছৰ ১৩, সমাজবাদী পাৰ্টিৰ ৯, চিপিআইএম আৰু ডিএমকেৰ ৫গৰাকীকৈ আৰু আৰ জে ডি, এনচিপি আৰু বহুজন সমাজবাদী পাৰ্টিৰ ৪গৰাকীকৈ সদসস্যকে ধৰি বিপক্ষই ১০৮সংসদৰ সমৰ্থন লাভ কৰি আছে।
জেডিয়ু, ৱাইএছআৰ কংগ্ৰেছ আৰু টী আৰ এছৰ দৰে দলৰ স্থিতি এতিয়াও স্পষ্ট নহয়। এনেক্ষেত্ৰত এই দলকেইটাৰ ওপৰত সকলোৰে দৃষ্টি নিবদ্ধ হৈছে। এই দলকেইটাই চৰকাৰৰ বিৰুদ্ধে ভোটদান কৰাৰ সম্ভাৱনা কম আছে। দলকেইটাই ইয়াৰ পৰিৱৰ্তে চৰকাৰৰ সপক্ষে ভোট দিব পাৰে অথবা ভোটদান পৰা বিৰত তাকিব পাৰে। দল তিনিটাৰ মুঠতে ১৩গৰাকী সাংসদ আছে।
ইপিনে, শিৱসেনাই বিধেয়কখনৰ সমৰ্থনৰ বাবে এক চৰ্ত ৰাখিছে। তেওঁলোকে কৈছে যে দলটোৱে তেতিয়াহে চৰকাৰক সমৰ্থন জনাব যদি ২৫ বছৰ পৰ্যন্ত নাগৰিকত্ব লাভ কৰাসকলক ভোটদানৰ অধিকাৰ দিয়া নহয়। ৰাজ্যসভাত শিৱসেনাৰ ৪গৰাকী সাংসদ আছে।
দৰাচলতে, যদিহে দলকেইটা এন ডি এৰ সৈতে যায় তেতিয়া সংখ্যা বৃদ্ধি পাই হ’বগৈ ১২৭। এয়া সংখ্যাগৰিষ্ঠতাতকৈয়ো অধিক। কিন্তু যদি এওলোকে বোটদানত ভাগ নলয় তেতিয়াহ’লে সংখ্যাগৰিষ্ঠতা ১১১তে সীমিত হৈ ৰ’ব। তেনেক্ষেত্ৰত বিধেয়ক গৃহীত হোৱাৰ সম্ভাৱনা নাথাকিব।