মুখ্যমন্ত্ৰী ড: হিমন্ত বিশ্ব শৰ্মাই অসমত আন্দোলন নোহোৱা হৈছে বুলি কৈ থকাৰ মাজতে গুৱাহাটী আৰক্ষীয়ে ইয়াৰ অন্তৰ্গত তিনিখন জিলাত প্ৰতিবাদ, ধৰ্ণা, শ্ল’গান প্ৰদান কৰা আদি কাৰ্যসূচীক প্ৰতিহত কৰিবলৈ ১৪৪ ধাৰা জাৰি কৰিছে।
ভাৰতৰ গণতান্ত্ৰিক যুৱ ফেডাৰেচন(ডি ৱাই এফ আই) অসম ৰাজ্যিক কমিটিয়ে এনে কাণ্ড গণতন্ত্ৰৰ ওপৰত ধাৰাবাহিকভাৱে চলি থকা আক্ৰমণৰ এক অংশ বুলি অভিহিত কৰিছে।
ৰাজ্যখনৰ আইন শৃংখলা ৰক্ষা কৰাত যে গৃহ বিভাগ বাৰুকৈয়ে বিফল হৈছে সেয়া স্পষ্ট। ইতিমধ্যে জোনমণি ৰাভাৰ মৃত্যুৰ ঘটনাই আইনৰ শাসনৰ দুৰৱস্থা উদঙাই দিছে। জোনমণি ৰাভাৰ মৃত্যুৰ নিৰপেক্ষ তদন্তৰ দাবী ৰাইজে স্বতঃস্ফূৰ্তভাৱে উত্থাপন কৰিছে। এক পক্ষপাতমুক্ত তদন্ত হ’ব বুলি অসম চৰকাৰে এতিয়াও ৰাইজক আশ্বস্ত কৰিব পৰা নাই। অন্যহাতে চৰকাৰখনে উন্নয়নৰ বিৰাট ঢাক-ঢোল কোবালেও জনসাধাৰণৰ ক্ৰমবৰ্ধমান ক্ষোভ সম্পৰ্কে হিমন্ত বিশ্ব শৰ্মাৰ নেতৃত্বাধীন ব্যৰ্থ বিজেপি চৰকাৰখন অৱগত। এক বৃহৎ নিযুক্তি মেলাৰ আয়োজন কৰিছে যদিও চৰকাৰ জ্ঞাত যে অ’ভাৰলেপিঙৰ ফলত বঞ্চনাৰ বলি হোৱা পৰীক্ষাত অৱতীৰ্ণ লাখ লাখ যুৱক-যুৱতীও ক্ষোভিত।
ৰাজ্যখনৰ শিক্ষক সংগঠনসমূহেও স্থায়ী প্ৰধান শিক্ষক নিযুক্তি, ঠিকাভিত্তিক শিক্ষকক স্থায়ী কৰা আদি বিষয়লৈও ৰাজ্যখন উত্তাল কৰি আছে। বিজ্ঞান আৰু গণিত মাতৃভাষাৰ সলনি ইংৰাজীত শিক্ষা প্ৰদান আৰু ৰাজহুৱা শিক্ষানুষ্ঠান ধ্বংসৰ অভিযান, স্থানীয় যুৱক-যুৱতীৰ সলনি বহিঃৰাজ্যৰ যুৱক-যুৱতীক নিযুক্তি প্ৰদান আদি বিষয়কলৈ ছাত্ৰ-যুৱ সমাজ প্ৰতিবাদমুখৰ হৈ উঠিছে।
জনসাধাৰণৰ সমস্যাসমূহ সমাধান কৰাত ব্যৰ্থ হোৱা ৰাজ্য চৰকাৰখনে এতিয়া সভা সমিতি, প্ৰতিবাদ, ধৰ্ণা আদি সংবিধান প্ৰদত্ত গণতান্ত্ৰিক অধিকাৰৰ ওপৰত চৰম আক্ৰমণ নমাই আনিবলৈ উদ্যত। তাৰেই প্ৰতিফলন হ’ল ১৪৪ ধাৰা জাৰি কৰা কাণ্ড। এইয়া যেন এক অঘোষিত জৰুৰীকালিন অৱস্থা। অসমৰ উন্নয়নৰ ফোপোলা স্বৰূপ গৃহমন্ত্ৰী অমিত শ্বাহৰ আগমনৰ সময়ত প্ৰতিবাদ, ধৰ্ণাৰ মাজেৰে প্ৰকাশ পাব বুলি মুখ্যমন্ত্ৰী ড০ হিমন্ত বিশ্ব শৰ্মাই ভয় খাইছে নেকি? প্ৰতিবাদ, ধৰ্ণালৈ ভয় নকৰি ৰাইজৰ সমস্যা সমাধান কৰাত হে চৰকাৰখনে মনোনিৱেশ কৰা উচিত ।
১৪৪ ধাৰা জাৰি কৰি যে ৰাইজৰ ক্ষোভ আৰু প্ৰতিবাদ স্তব্ধ কৰিব পৰা নাযায় সেয়া নিশ্চিত । সেয়ে গণতন্ত্ৰ বিৰোধী ১৪৪ ধাৰা জাৰি কৰা নিৰ্দেশ তাৎক্ষণিকভাৱে বাতিল কৰিবলৈ ডি ৱাই এফ আই-এআহ্বান জনাইছে।
