বৃহস্পতিবাৰে বিৰোধী মিত্ৰজোঁট INDIA ৰ সদস্যসকলৰ বৈঠকত মিলিত হ’ব। বেংগালুৰু আৰু পাটনাৰ পিছত তৃতীয়খন বৈঠক অনুষ্ঠিত হ’বলৈ গৈ আছে বাণিজ্যিক চহৰ মুম্বাইত।
উল্লেখ্য যে পাটনাত অনুষ্ঠিত হোৱা বিৰোধী ঐক্যৰ প্ৰথমখন বৈঠকত১৬ টা বিৰোধী দলে অংশগ্ৰহণ কৰিছিল। ইয়াৰ পিছত বেংগালুৰুত অনুষ্ঠিত হোৱা দ্বিতীয়খন বৈঠকত সেই সংখ্যা ২৬ লৈ বৃদ্ধি পাইছিল। সেই বৈঠকতেই বিৰোধী ঐক্যৰ নাম INDIA (Indian National Developmental Inclusive Alliance) হিচাপে চূড়ান্ত কৰা হৈছিল।
এইবাৰ বিৰোধী ঐক্যৰ তৃতীয়খন মুম্বাইত অনুষ্ঠিত হ’বলগীয়া বৈঠকত আন এটা নতুন দলে যোগদান কৰিবলৈ ওলাইছে বুলি খবৰ প্ৰকাশ পাইছে। অৰ্থাৎ এইবাৰ বিৰোধী মিত্ৰজোঁটৰ দুদিনীয়া বৈঠকত মুঠ ২৭টা বিৰোধী দলে যোগদান কৰিব। বিৰোধী দলসমূহে কয় যে লোকসভা নিৰ্বাচন ২০২৪ৰ ব্লুপ্ৰিণ্ট মুম্বাইৰ পৰাই সৃষ্টি কৰা হ’ব।
খবৰ অনুসৰি আজি আৰু কাইলৈ বিৰোধী মিত্ৰজোঁটৰ বৈঠকত অহা লোকসভা নিৰ্বাচনৰ বাবে বিৰোধী মিত্ৰজোঁটৰ ল’গ’ বা প্ৰতীক চূড়ান্ত কৰিব পাৰে। লগতে এখন সমন্বয় সমিতিও গঠন কৰা হ’ব। ২০২৪ চনৰ নিৰ্বাচনত বিজেপিক কেনেদৰে পৰাস্ত কৰিব পাৰি সেই সন্দৰ্ভতো ‘যৌথ কাৰ্য্য পৰিকল্পনা’ প্ৰস্তুত কৰা হ’ব।
মুম্বাইৰ গ্ৰেণ্ড হায়াট হোটেলত অনুষ্ঠিত হ’ব বিৰোধী মিত্ৰজোঁটৰ বৈঠক। দুদিনীয়া বৈঠকত ২৭টা ৰাজনৈতিক দলৰ ৬৩জন প্ৰতিনিধিয়ে অংশগ্ৰহণ কৰিব। আজি সন্ধিয়াৰ ভিতৰত সকলো বিৰোধী দলৰ প্ৰতিনিধি মুম্বাইত উপস্থিত হ’ব। সন্ধিয়া ৬:৩০ বজাত তেওঁলোকৰ মাজত কথা-বতৰা হ’ব।
খবৰ অনুসৰি, অতিথিসকলৰ বাবে মহাৰাষ্ট্ৰৰ প্ৰাক্তন মুখ্যমন্ত্ৰী উদ্ধৱ থাকৰে নিশা এক বিশেষ ভোজৰ আয়োজন কৰিছে। কাইলৈ ১ ছেপ্টেম্বৰত পুৱা ১০:৩০ বজাৰ পৰা আৰম্ভ হ’ব এই মিত্ৰজোঁটৰ বৈঠক। দুপৰীয়া ২ বজালৈ চলিব এই বৈঠক। বিয়লি প্ৰায় ৩:৩০ বজাত বিৰোধী মিত্ৰজোঁটৰ দ্বাৰা এখন সংবাদমেল অনুষ্ঠিত হ’ব।
মিত্ৰজোঁটৰ প্ৰতীক চিহ্ন এই বৈঠকতে চূড়ান্ত হ’ব পাৰে। ইফালে মিত্ৰজোঁটে প্ৰস্তাৱ কৰা এটা প্ৰতীক ইতিমধ্যে উত্থাপন হৈছে। তাত দেখা গৈছে জাতীয় পতাকাৰ ৰং। অৱশ্যে মুম্বাইত অনুষ্ঠিত হ’বলগীয়া মিত্ৰতাৰ বৈঠকত INDIA ৰ ল’গ’ হিচাপে এইটো উন্মোচন কৰা হ’ব নে নহয় সেয়া এতিয়াও নিশ্চিত হোৱা নাই।
প্ৰতীকটোৰ লগতে ভাৰত মিত্ৰজোঁটৰ সদস্য দলসমূহৰ মাজত সমন্বয় বৃদ্ধিৰ বাবে এখন সমিতিও গঠন কৰা হ’ব। এই বৈঠকত যৌথ আহ্বায়কৰো সিদ্ধান্ত লোৱা হ’ব পাৰে।
