মঙলবাৰে পাব্লিক ছেক্টৰ ফুটবল টুৰ্ণামেণ্টৰ ফাইনেল : এফ চি আইৰ বিৰুদ্ধে সমুখ সমৰত নামিব অ’ এন জি চি
গুৱাহাটীৰ নেহৰু ষ্টেডিয়ামত চলি থকা দেশৰ ৰাজহুৱা খণ্ডৰ প্ৰতিষ্ঠান সমূহৰ সৰ্ববৃহৎ ফুটবল প্ৰতিযোগিতা ‘অল ইণ্ডিয়া পাব্লিক ছেক্টৰ ফুটবল টুৰ্নামেন্ট-২০১৯’ৰ চূড়ান্ত খেলখন কাইলৈ অৰ্থাৎ ২৬ ফেব্ৰুৱাৰিত অনুষ্ঠিত হ’ব।
দিনৰ ১১ বজাৰ পৰা আৰম্ভ হ’বলগীয়া এই চূড়ান্ত খেলত টুৰ্নামেন্টৰ আয়োজক দল ভাৰতীয় খাদ্য নিগম (এফ চি আই)ৰ সৈতে খেলপথাৰত মুখামুখি হ’ব তেল আৰু প্ৰাকৃতিক গেছ নিগম (অ’ এন জি চি) দল।
দেশৰ ১২ টা ৰাজহুৱা খণ্ডৰ প্ৰতিষ্ঠানৰ মাজত হোৱা এই প্ৰতিযোগিতাখনৰ আজি অনুষ্ঠিত হোৱা দুখনকৈ ছেমি ফাইনেল খেলৰ ফলাফলৰ পাছত চূড়ান্ত প্ৰতিযোগিতাৰ দল দুটা নিশ্চিত হৈছে।
আজি প্ৰথমখন ছেমি ফাইনেলত অ’ এন জি চি দলে ভাৰতীয় বিমানবন্দৰ প্ৰাধিকৰণক ৭-২ গ’লৰ বৃহৎ ব্যৱধানত পৰাস্ত কৰি ফাইনেলত প্ৰৱেশ কৰে। অ’ এন জি চিৰ হৈ সুনীল লহকৰে সৰ্বাধিক তিনিটা আৰু হিমাংশু পাটিলে দুটা গ’ল দিবলৈ সক্ষম হয়। ইয়াৰ উপৰি দলটোৰ খেলুৱৈ আৰিফ আচলাখ, অভিশেষ টানাৰে এটাকৈ গ’ল দিয়ে।
আনহাতে, বিমানবন্দৰ প্ৰাধিকৰণৰ হৈ গ’ল দুটা দিয়ে অভিশেষ ৰাৱট আৰু সোনম ভূটীয়াই।
ইফালে প্ৰতিযোগিতাখনৰ দ্বিতীয়খন ছেমি ফাইনেলত ভাৰতীয় খাদ্য নিগম (এফ চি আই) আৰু অইল ইণ্ডিয়া লিমিটেডৰ মাজত তীব্ৰ প্ৰতিদ্বন্দ্বিতা হয়। শেষত এফ চি আই দলে অইল ইণ্ডিয়া লিমিটেডক ৩-২ গ’লৰ ব্যৱধানত পৰাস্ত কৰি চুড়ান্ত খেলৰ বাবে নিজৰ স্থান সুনিশ্চিত কৰে।
এফ চি আইৰ সুৰজিৎ ৰয়, কমল সিং আৰু মৃণ্ময়ে এটাকৈ গ’ল প্ৰদান কৰে। আনহাতে, প্ৰতিপক্ষ অইল ইণ্ডিয়া লিমিটেডৰ তুল্য দাস আৰু জয়ন্ত বসুৱে এটাকৈ গ’ল দিবলৈ সক্ষম হয়। খেলখনৰ প্রথমাৰ্ধত অইল ইণ্ডিয়া লিমিটেডে সুন্দৰ প্ৰদৰ্শন দেখুৱাইছিল যদিও হাফ টাইমৰ পাছত এফ চি আই দলৰ দুৰ্দান্ত প্ৰদৰ্শনত তিষ্ঠিব নোৱাৰিলে দলটো।
উল্লেখ্য যে কাইলৈৰ চূড়ান্ত খেলৰ অন্তত নেহৰু ষ্টেডিয়ামতেই প্ৰতিযোগিতাখনৰ বঁটা বিতৰণী আৰু সামৰণি অনুষ্ঠান অনুষ্ঠিত হ’ব বুলি আয়োজক ভাৰতীয় খাদ্য নিগমে জানিবলৈ দিছে।