অসম ৰাজ্যিক অংগনবাড়ী কৰ্মী আৰু সহায়িকা সন্থাৰ শিৱসাগৰ জিলা সমিতিয়ে সোমবাৰে তেওঁলোকৰ বিভিন্ন দাবী লৈ শিৱসাগৰত ধৰ্ণা কাৰ্যসূচী ৰূপায়ণ কৰে। ইয়াৰ অংশ হিচাপে জিলাখনৰ কেইবা হাজাৰ অংগনবাড়ী কৰ্মীয়ে জিলা উপায়ুক্ত কাৰ্যালয়ৰ সন্মুখত উত্তাল প্ৰতিবাদ সাব্যস্ত কৰে।
প্ৰতিবাদকাৰীসকলে অংগনবাড়ী কৰ্মী, সহায়িকাক নিয়মীয়া কৰ্মচাৰী হিচাপে স্বীকৃতি দিয়া, নূন্যতম মজুৰি ১৮,০০০ টকা দিয়াৰ ব্যৱস্থা কৰা আৰু অংগনবাড়ী কৰ্মী আৰু সহায়িকাক নিশ্চিত পেঞ্চন দিয়াৰ ব্যৱস্থা কৰাৰ দাবীত জিলা উপায়ুক্তৰ জৰিয়তে প্ৰধান মন্ত্ৰী নৰেদ্ৰ মোদীলৈ স্মাৰকপত্ৰ প্ৰেৰণ কৰে।
সন্থাৰ সভাপতি টুটুমণি বৰুৱা আৰু সম্পাদিকা নন্দিতা বৰুৱাই কয় যে কেন্দ্ৰীয় চৰকাৰৰ সংহত শিশু বিকাশ আঁচনিত কাম কৰা অংগনবাড়ী কৰ্মী আৰু সহায়িকা সকলৰ অৱস্থা অতি দুখজনক। সামান্য কেইটামান মাননি লাভ কৰা এইসকল কৰ্মচাৰীয়ে অত্যাধিক কামৰ বোজাৰ বাবে আৰু অৰ্থৰ অভাৱত ৰক্তহীনতা, পুষ্টিহীনতাত ভূগীবলগীয়া হৈছে।
যাৰ ফলত আজি এইসকল অংগনবাড়ী কৰ্মী আৰু সহায়িকাই ৰাজপথলৈ ওলাই আহিবলৈ বাধ্য হৈছে বুলি তেওঁ লগতে উল্লেখ কৰে।