অসম চৰকাৰৰ বিত্ত, স্বাস্থ্য, শিক্ষা, লোকনিৰ্মাণ আদি বিভাগৰ মন্ত্ৰী ডঃ হিমন্ত বিশ্ব শৰ্মাই দেওবাৰে সদৌ তাই আহোম ছাত্ৰ সন্থাৰ শিৱসাগৰ জিলা সমিতিৰ উদ্যোগত তথা নিমাইজান, দৰিকাপাৰ-হাতীমূৰীয়া, চেৰেকাপাৰ আৰু বেতবাৰীবাসী ৰাইজৰ সহযোগত আয়োজিত মে-ডাম-মে-ফী অনুষ্ঠানত মুখ্য অতিথিৰূপে অংশগ্ৰহণ কৰে।
অনুষ্ঠানটিত অংশগ্ৰহণ কৰি পোনপ্ৰথমে মন্ত্রী গৰাকীয়ে পৰম্পৰাগত মে-ডাম-ফী পূজাত অংশগ্ৰহণ কৰি পূৰ্বপুৰুষৰ প্ৰতি শ্ৰদ্ধাৰ্ঘ নিবেদন কৰে।
অনুষ্ঠানটিত মন্ত্ৰী গৰাকীয়ে উপস্থিত সকলোকে মে- ডাম-মে-ফীৰ শুভকামনা জনাই কয় যে, এই অনুষ্ঠানত পূৰ্ব পুৰুষৰ প্ৰতি সেৱা জনাই তেওঁলোকৰ আশিস বিচৰা হয়। পূৰ্বপুৰুষৰ আশীৰ্বাদ লাভৰ জৰিয়তে বৰ্তমানৰ প্ৰজন্মই শান্তি-সমৃদ্ধি- উন্নতি লাভ কৰিব পাৰিব।
সতী জয়মতী, মূলা গাভৰু, লাচিত বৰফুকনৰ লগতে আলাবইৰ ৰণত দেশ-তথা জাতিৰ হকে প্ৰাণ আহুতি দিয়া দহ সহস্ৰাধিক সেনানীৰ ত্যাগক মন্ত্ৰী গৰাকীয়ে শ্ৰদ্ধাৰে সোঁৱৰে।
স্বৰ্গদেউ চাওলুং চুকাফাই বৰ অসম নিৰ্মাণৰ মাধ্যমেৰে অসমীয়া জাতিৰ সত্তা সুদৃঢ় কৰি থৈ গৈছে বুলিও তেওঁ মতপ্ৰকাশ কৰে।
অনুষ্ঠানত মন্ত্ৰী গৰাকীয়ে অঞ্চলটোৰ ২২০০ বিঘা মাটিত বিশ্ববিদ্যালয়কে আদি কৰি অন্যান্য প্ৰকল্প নিৰ্মাণৰ পৰিকল্পনা হাতত লোৱাৰ বিষয়ে চিন্তা-চৰ্চা কৰিব বুলিও উল্লেখ কৰে।
তেওঁ জিলাখনৰ ভালেকেইটা ঐতিহাসিক পথ যেনে, ৫ কিলোমিটাৰ দৈৰ্ঘৰ আতন বুঢ়াগোহাঁই পথ, ৩.৫ কিলোমিটাৰ দৈৰ্ঘৰ নিমাইজান আলি, ২ কিলোমিটাৰ দৈৰ্ঘৰ বৰপাত্ৰ আলি, ৪.৫ কিলোমিটাৰ দৈৰ্ঘৰ দাধৰা আলি আৰু ১ কিলোমিটাৰ দৈৰ্ঘৰ দিহিঙীয়া আলি নিৰ্মাণৰ বাবে মুঠ ১৭.৫০ কোটি টকাৰ অনুমোদন আগবঢ়াইছে বুলি সদৰি কৰে। লগতে তেওঁ স্থানীয় ঈগল ক্লাৱক ১০ লাখ টকাৰ আৰ্থিক অনুদান আগবঢ়োৱাৰ কথাও ঘোষণা কৰে।
অনুষ্ঠানত ঢেকীয়াজুলিৰ বিধায়ক অশোক সিংঘালৰ লগতে ভালে কেইগৰাকীমান বিশিষ্ট সমাজসেৱী আৰু স্থানীয় ৰাইজ উপস্থিত থাকে।
