মুঠ ৭ টা পৰ্যায়ত অনুষ্ঠিত হ’ব লগা দেশৰ সাধাৰণৰ নিৰ্বাচন(২০২৪)ৰ ভোটগ্ৰহণ প্ৰক্ৰিয়াৰ প্ৰথমটো পৰ্যায় আজি(১৯ এপ্ৰিল) ৫ বজাত সামৰণি পৰিল।
প্ৰথম পৰ্যায়ৰ এই ভোটগ্ৰহণ অনুষ্ঠিত হ’ল দেশৰ মুঠ ১৭ খন ৰাজ্য আৰু ৪ খন কেন্দ্ৰীয় শাসিত অঞ্চলত।
আজি ভোটগ্ৰহণ অনুষ্ঠিত হ’ল – অৰুণাচল প্ৰদেশ, আন্দামান আৰু নিকোবৰ, অসম, বিহাৰ, ছত্তিশগড়, জন্মু-কাশ্মীৰ, লক্ষ্যদ্বীপ, মধ্যপ্ৰদেশ, মহাৰাষ্ট্ৰ, মণিপুৰ, মিজোৰাম, মেঘালয়, নাগালেণ্ড, পুডুচেৰী, ৰাজস্থান, চিকিম, তামিলনাডু, ত্ৰিপুৰা, উত্তৰ প্ৰদেশ, উত্তৰাখণ্ড আৰু পশ্চিমবংগত।
এই আটাইকেইখন ৰাজ্য আৰু কেন্দ্ৰীয় শাসিত অঞ্চলৰ মুঠ ১০২ টা অঞ্চলত আজি অনুষ্ঠিত হ’ল ভোটগ্ৰহণ। ১০২ টা সমষ্টিত প্ৰাৰ্থীত্ব আগবঢ়ালে দেশৰ মুঠ ১,৬২৫ গৰাকী প্ৰাৰ্থীয়ে। এই ১,৬২৫ গৰাকী প্ৰাৰ্থীৰ ভিতৰত আছিল ১,৪৯১ গৰাকী পুৰুষ আৰু ১৩৪ গৰাকী মহিলা।
উল্লেখ্য যে এই প্ৰাৰ্থীসকলৰ ভিতৰত আছে কিৰেজ ৰিজিজু, নীতিন গাডকাৰীসহ মুঠ ৯ গৰাকী কেন্দ্ৰীয় মন্ত্ৰী আৰু দুগৰাকী প্ৰাক্তন মুখ্যমন্ত্ৰী। দুগৰাকী প্ৰাক্তন মুখ্যমন্ত্ৰী হ’ল সৰ্বানন্দ সোণোৱাল আৰু বিপ্লৱ কুমাৰ দেৱ।
এতিয়ালৈকে লাভ কৰা তথ্য অনুসৰি প্ৰথম পৰ্যায়ত সমগ্ৰ দেশৰ ১০২ টা সমষ্টিত প্ৰায় ৬০ শতাংশ ভোটাৰে ভোটদান কৰিছে।
ভোটদানৰ হাৰৰ ক্ষেত্ৰত ৮০.০৬% শংতাশ ভোটদানেৰে সমগ্ৰ দেশৰ ভিতৰতে শীৰ্ষত আছে ত্ৰিপুৰা।
ঠিক তেনেদৰে ভোটদানৰ হাৰ অৰুণাচল প্ৰদেশত ৬৫.৪৯%, আন্দামান আৰু নিকোবৰত ৫৬.৮৭%, অসমত ৭১.৪৬%, বিহাৰত ৪৭.৭৪%, ছত্তিশগড়ত ৬৩.৪১%, জন্মু-কাশ্মীৰত ৬৫.০৮%, লক্ষ্যদ্বীপত ৫৯.০২%, মধ্যপ্ৰদেশত ৬৩.৫০%, মহাৰাষ্ট্ৰত ৫৫.৩৫%, মণিপুৰত ৬৮.৮১%, মিজোৰামত ৫৪.২৩%, মেঘালয়ত ৭৩.৬৯%, নাগালেণ্ডত ৫৬.৯১%, পুডুচেৰীত ৭৩.৩৭%, ৰাজস্থানত ৫২.২৫%, চিকিমত ৬৮.০৬%, তামিলনাদুত ৬২.২৯%, ত্ৰিপুৰাত ৮০.০৬%, উত্তৰ প্ৰদেশত ৫৭.৯০%, উত্তৰাখণ্ডত ৫৩.৭৭% আৰু পশ্চিমবংগত ৭৭.৫৭%।
উল্লেখ্য যে অসমত প্ৰথম পৰ্যায়ত ৫ টা সমষ্টিত অনুষ্ঠিত হয় ভোটগ্ৰহণ। ডিব্ৰুগড়, যোৰহাট, শোণিতপুৰ, লখিমপুৰ আৰু কাজিৰঙা সমষ্টিত অনুষ্ঠিত হয় ভোটগ্ৰহণ প্ৰক্ৰিয়া। ৭৬.২০ % ভোটদানেৰে অসমৰ ভিতৰত সৰ্বাধিক ভোটদানৰ হাৰ সৃষ্টি কৰে যোৰহাট সমষ্টিৰ ভোটাৰে।
প্ৰসংগক্ৰমে, ভাৰতীয় জনতা পাৰ্টিৰ মিত্ৰজোঁটে এইবাৰ লোকসভা নিৰ্বাচনত অসমত ১৩টা সমষ্টি দখল কৰিব বুলি দাবী কৰাৰ বিপৰীতে সমগ্ৰ ভাৰতত ৪০০তকৈও অধিক আসন দখল কৰিব বুলি দাবী কৰিছে। কিন্তু যোৱা ২০১৯ চনত অনুষ্ঠিত হোৱা লোকসভা নিৰ্বাচনৰ প্ৰথম পৰ্যায়ত ১০২ খন আসনৰ ভিতৰত ৪০ খন আসনহে লাভ কৰিবলৈ সক্ষম হৈছিল বিজেপি দলে।
(বিঃদ্ৰঃ প্ৰথম পৰ্যায়ৰ ভোটগ্ৰহণ সম্পৰ্কে নতুন আৰু অধিক তথ্য লাভ কৰিলে বাতৰিটোত নতুন তথ্য সমূহ সংযুক্ত কৰা হ’ব।)
