বৃহস্পতিবাৰে বছৰৰ প্ৰথমটো সূৰ্যগ্ৰহণ দেখা পোৱা যাব। এই সূৰ্যগ্ৰহণ বেছিভাগ স্থানতে দুপৰীয়া ১.৪২বজাত আৰম্ভ হ’ব আৰু সন্ধিয়া ৬.৪১বজালৈ থাকিব। গ্ৰহণৰ মুঠ সময় হ’ব ৩মিনিট ৫১ছেকেণ্ড।
বিজ্ঞানীসকলৰ মতে, আজিৰ সূৰ্যগ্ৰহণ ভাৰত, বাংলাদেশ, পাকিস্তানকে ধৰি দক্ষিম এছিয়াৰ দেশসমূহত সঠিকভাৱে দেখা পোৱা নাযাব।
আজিৰ সূৰ্যগ্ৰহণ হ’ব বলয়গ্ৰাস সূৰ্যগ্ৰহণ। সূৰ্য আৰু পৃথিৱীৰ মাজলৈ আহিব চন্দ্ৰ। ফলত ঢাক খাই পৰিব সূৰ্য। কিন্তু মাত্ৰ এটা বলয়হে দৃশ্যমান হ’ব। বাকী অন্ধকাৰত সূৰ্যৰ প্ৰায় ৯৪.৩শতাংশ ঢাক খাই পৰিব।
ইয়াকে কোৱা হয় ‘ৰিং অফ ফায়াৰ’। আকাশত বিচ্ছুৰিত হ’ব এক মহাজাগতিক সৌন্দৰ্য। ৰাছিয়া, কানাডা, গ্ৰীনলেণ্ড তথা উত্তৰ মেৰুৰ পৰা অগ্নিবলয় প্ৰত্যক্ষ কৰিব পৰা যায়। ইয়াৰ ভিতৰত গ্ৰীনলেণ্ডৰ পৰাই গ্ৰহণৰ সম্পূৰ্ণ দৃশ্য দেখা পোৱা যাব।
তদুপৰি, ইউৰোপ আৰু এছিয়াৰ উত্তৰ অংশৰ পৰাও গ্ৰহণ দেখা পোৱা যাবষ অৱশ্যে, ইয়াত আংশিকভাৱেহে গ্ৰহণ দেখা পোৱা যাব।
উল্লেখ্য যে সাধাৰণতে সূৰ্যৰ খণ্ডগ্ৰাস, পূৰ্ণগ্ৰাসৰ লগতে বলয়গ্ৰাস গ্ৰহণ দেখা যায়। বছৰৰ এই প্ৰথমটো সূৰ্যগ্ৰহণ হৈছে বলয়গ্ৰাস সূৰ্যগ্ৰহণ। বছৰৰ দ্বিতীয়তো পূৰ্ণগ্ৰাস সূৰ্যগ্ৰহণ অহা ৪ ডিচেম্বৰত হ’ব পাৰে বুলি কোৱা হৈছে।
আজিৰ বলয়গ্ৰাস সূৰ্যগ্ৰহণত দেখা পাবলগীয়া ‘ৰিং অফ ফায়াৰ’ চাবলৈ বিজ্ঞানীসকল উদগ্ৰীৱ হৈ ৰৈছে।