কোনো কোভিড ৰোগীৰ সংস্পৰ্শলৈ নহাকৈ বঙাইগাওঁৰ চাৰিগৰাকী লোকৰ দেহত ধৰা পৰিছে মাৰাত্মক কোভিদ-১৯ পজিটিভ ভাইৰাচ। বঙাইগাওঁ অসামৰিক চিকিৎসালয় পৰিদৰ্শনৰ পাছতে এই কথা সদৰী কৰে মন্ত্ৰী ড০ হিমন্ত বিশ্ব শৰ্মাই।
‘আজিৰ চাৰিওটা কেচৰে কোনো সংস্পৰ্শলৈ অহাৰ ৰেকৰ্ড নাই। তেওঁলোক কোনো পজিটিভ ৰোগীৰ সংস্পৰ্শলৈ অহা নাছিল। সাধাৰণ জ্বৰ হোৱাৰ বাবে সন্দেহবশতঃ এওঁলোকৰ চেম্প’ল বিলাক পৰীক্ষাৰ বাবে পঠিওৱা হৈছিল।‘ মন্ত্ৰীগৰাকীয়ে এইদৰে কয়।
ইপিনে, কোনো ৰোগীৰ সংস্পৰ্শলৈ নহাকৈ ধৰা পৰা অসমত এইটো প্ৰথম ঘটনা বুলি জানিবলৈ দি মন্ত্ৰীগৰাকীয়ে কয়, ‘চাৰিগৰাকীৰ দেহলৈ কেনেকৈ এই ভাইৰাছ আহিল এই সম্পৰ্কে গভীৰভাৱে অনুসন্ধান কৰিব লাগিব। কেনেকৈ সংস্পৰ্শলৈ আহিল সেইটোৰ তথ্য আজিলৈকে আমাৰ হাতত নাই।‘
‘কাইলৈৰ ভিতৰত এই চাৰিজন ৰোগীয়ে কাৰোবাক লগ পাইছিল নেকি বা কোনোবা বাহিৰৰ পৰা অহা লোকৰ সৈতে সংস্পৰ্শ হৈছিল নেকি সেয়া গম পোৱা যাব।‘ মন্ত্ৰীগৰাকীয়ে লগতে কয়।
ইপিনে, এই মুহূৰ্তত বঙাইগাওঁৰ ৰাইজ অত্যন্ত সাৱধান হৈ থকাটো প্ৰয়োজন বুলি উনুকিয়াই দি তেওঁ লগতে কয়, ‘বঙাইগাওঁৰ লোকসকলে এতিয়া যিমান ভয় খাই আছে তাতকৈ বেছি ভয় খাব লাগিব।‘
মন্ত্ৰীগৰাকীয়ে জনোৱা অনুসৰি আজি বঙাইগাওঁৰ চাপ্ৰাকাটাৰ অনুপম ঠাকুৰীয়া, আমগুৰি পাৰ্ট ২ ৰ দীপক মল্লিক, চহিদ বেদীৰ ববিতা বাচফৰ, ৰেইলৱে কলনীৰ ৰীণা বিশ্বকৰ্মাৰ দেহত এই মাৰাত্মক ভাইৰাছ ধৰা পৰিছে।
ইয়াৰে তিনিটা কেচ বঙাইগাওঁ নগৰৰ পৰা লাভ কৰিছে বুলি উল্লেখ কৰি মন্ত্ৰীগৰাকীয়ে কয়, ‘তিনিওটা কেচৰে তিনি কিল’মিটাৰ দূৰত্বলৈকে জিলা উপায়ুক্তই কন্টেইনমেন্ট জ’ন ঘোষণা কৰিব। বঙাইগাওঁ জিলাখন ৰেড জ’ন হিচাপে ঘোষণা কৰাৰ সিদ্ধান্ত লোৱা হৈছে। জিলাখনত একেৰাহে ৫ টাকৈ কোভিদ-১৯ পজিটিভ কেচ পোৱা গৈছে।‘
কাইলৈৰ পৰা ৰেণ্ডম বেচিছত এই ৰোগ ধৰা পৰা বঙাইগাওঁৰ পাঁচখন ঠাইৰ পৰা ২৫ টাকৈ চেম্প’ল সংগ্ৰহ কৰা হ’ব বুলি তেওঁ জানিবলৈ দিয়ে।
ইপিনে, ‘যিখন প্ৰদেশত এটাও কেচ নাছিল, জিলাসমূহত এতিয়া এটা এটাকৈ বাঢ়ি গৈ আছে, চৰকাৰৰ আগত প্ৰত্যাহ্বান কি আছে?’ বুলি এজন সাংবাদিকে প্ৰশ্ন কৰাত মন্ত্ৰীগৰাকীয়ে কয়, ‘কেচটো বাঢ়েগা জবতক ভেকছিন ঔৰ মেডিচিন নেহি মিলেগা কেচটো বাঢ়েগা। লেকিন কম কিটনা কৰ সকতা হে। জবতক মেডিচিন ঔৰ ভেকচিন নেহি নিকালেগা তবতক নটিছ মে ৰেহনাহি পৰেগা।‘
