কৃত্ৰিম বুদ্ধিমত্তা বা এআইৰ অপব্যৱহাৰক লৈ এইবাৰ অত্যন্ত কঠোৰ স্থিতি গ্ৰহণ কৰিছে কেন্দ্ৰীয় চৰকাৰে। ছচিয়েল মিডিয়া প্লেটফৰ্ম এক্স বা পূৰ্বৰ টুইটাৰক এক গুৰুত্বপূৰ্ণ জাননী প্ৰেৰণ কৰিছে দেশৰ তথ্যপ্ৰযুক্তি মন্ত্ৰালয়ে।
চৰকাৰৰ অভিযোগ অনুসৰি, এক্স কৰ্পোৰেচনে ২০০০ চনৰ তথ্যপ্ৰযুক্তি আইন আৰু ২০২১ চনৰ আইটি নিয়ম অনুসৰি যিবোৰ আইনী দিশ মানি চলিব লাগে, সেইবোৰ সঠিকভাৱে পালন কৰা নাই। সেইবাবেই আগন্তুক ৭২ ঘণ্টাৰ ভিতৰত এই সন্দৰ্ভত কি ব্যৱস্থা গ্ৰহণ কৰা হৈছে তাৰ এক বিতং প্ৰতিবেদন জমা দিবলৈ কেন্দ্ৰই নিৰ্দেশ দিছে।
তথ্যপ্ৰযুক্তি মন্ত্ৰালয়ে জনোৱা মতে, এক্সৰ এআই সেৱা গ্ৰ’কৰ জৰিয়তে অশ্লীল আৰু যৌন উত্তেজক সমল তৈয়াৰ কৰি ছচিয়েল মিডিয়াত বিয়পাই দিয়াৰ বহুতো অভিযোগ লাভ কৰা হৈছে। বিশেষকৈ মহিলাসকলক লক্ষ্য কৰি এই ধৰণৰ আপত্তিকৰ সমল বা ফটো-ভিডিঅ’ প্ৰস্তুত কৰা কাৰ্যক চৰকাৰে অতি গুৰুতৰ বিষয় হিচাপে গণ্য কৰিছে।
কেন্দ্ৰীয় চৰকাৰৰ জাননীত স্পষ্টকৈ কোৱা হৈছে যে গ্ৰ’কৰ এআই প্ৰযুক্তি ব্যৱহাৰ কৰি কাৰোবাৰ ব্যক্তিগত গোপনীয়তা ভংগ কৰা আৰু কাৰোবাক অপমান কৰাটো কোনো কাৰণতে গ্ৰহণযোগ্য নহয়।
চৰকাৰৰ মতে এনেধৰণৰ সমল কেৱল বেআইনিয়েই নহয়, ই সমাজত যৌন উৎপীড়নৰ দৰে ঘটনাক সহজ কৰি তোলাৰ এক ভয়ংকৰ প্ৰৱণতা সৃষ্টি কৰিছে। ইয়াৰ ফলত দেশৰ আইনী সুৰক্ষা ব্যৱস্থা দুৰ্বল হোৱাৰ আশংকা আছে। সেয়েহে এক্স কৰ্পোৰেচনক তেওঁলোকৰ গ্ৰ’ক প্ৰযুক্তিৰ গাঁথনি আৰু নীতি-নিয়মসমূহ পুনৰ পৰীক্ষা কৰিবলৈ নিৰ্দেশ দিয়া হৈছে যাতে ভৱিষ্যতে এনে কোনো বেআইনি কাম কৰিব নোৱাৰে।
ইয়াৰ উপৰিও এক্সক তেওঁলোকৰ ব্যৱহাৰকাৰী নীতি অধিক কঠোৰ কৰিবলৈ কোৱা হৈছে। যদি কোনোবাই নিয়ম উলংঘা কৰে, তেন্তে তেওঁৰ একাউণ্ট সাময়িকভাৱে বা স্থায়ীভাৱে বন্ধ কৰিবলৈ চৰকাৰে নিৰ্দেশ দিছে। যিবোৰ আপত্তিকৰ সমল ইতিমধ্যে ইণ্টাৰনেটত আছে, সেইবোৰ ততালিকে আঁতৰাবলৈ কোৱা হৈছে যদিও এই কাম কৰোঁতে যাতে কোনো প্ৰমাণ নষ্ট নহয় তাৰ প্ৰতিও লক্ষ্য ৰাখিবলৈ কোৱা হৈছে।
কেন্দ্ৰীয় চৰকাৰে এক্সৰ পৰা জানিব বিচাৰিছে যে তেওঁলোকৰ মুখ্য কমপ্লায়েন্স অফিচাৰৰ ভূমিকা কি আছিল আৰু তেওঁলোকে ভাৰতীয় নাগৰিক সুৰক্ষা সংহিতাৰ নিয়মসমূহ পালন কৰিছে নে নাই।
মন্ত্ৰালয়ে সকীয়াই দিছে যে যদিহে এই নিৰ্দেশ মনা নহয়, তেন্তে তথ্যপ্ৰযুক্তি আইনৰ ৭৯ নং ধাৰাৰ অধীনত এক্স-এ লাভ কৰা বিশেষ সুৰক্ষা ব্যৱস্থা প্ৰত্যাহাৰ কৰা হ’ব। ইয়াৰ উপৰিও ভাৰতীয় ন্যায় সংহিতা আৰু পকচো আইনৰ দৰে কঠোৰ ধাৰাত ফৌজদাৰী গোচৰ ৰুজু কৰা হ’ব পাৰে। কেন্দ্ৰৰ এই পদক্ষেপে এআইৰ জৰিয়তে চলি থকা অশ্লীলতা আৰু হাৰাশাস্তিৰ বিৰুদ্ধে এক ডাঙৰ অভিযানৰ ইংগিত দিছে।
