বৃহস্পতিবাৰে গুৱাহাটী ৰেডিছন ব্লু- হোটেলত কেন্দ্ৰীয় বিত্তমন্ত্ৰী নিৰ্মলা সীতাৰমণে এক সংবাদমেল সন্মোধন কৰি কয় যে, ‘ভাৰতৰ অৰ্থনীতি বিশ্বৰ ভিতৰতে দ্ৰুত গতিত আগবঢ়া অৰ্থনীতি’।
বিৰোধীয়ে কোৱাৰ দৰে ভাৰতীয় অৰ্থনীতি কোনোধৰণৰ লেহেমীয়া হোৱা নাই বৰঞ্চ দ্ৰুতগতিত আগবাঢ়িহে গৈছে বুলি উল্লেখ কৰে বিত্তমন্ত্ৰী গৰাকীয়ে।
কংগ্ৰেছে কৰা ‘আন- ফিট্’ চৰকাৰৰ মন্তব্যৰ উত্তৰত তেওঁ কয়, ‘’কংগ্ৰেছ শাসনত থকা সময়ত দেশৰ মুদ্ৰাস্ফীতিৰ হাৰ দহ বছৰ ধৰি দুগুণ বৃদ্ধি পাইছিল লগতে মূল্যবৃদ্ধিৰ হাৰো অত্যাধিক হাৰত বাঢ়ি গৈছিল।‘’
বিত্ত মন্ত্ৰীগৰাকীয়ে কংগ্ৰেছক উদ্দেশ্যি কয়,’’কিন্তু এতিয়া তেওঁলোকেই সমালোচনা কৰে, আচলতে তেওঁলোকৰ এই বিষয়ত প্ৰশ্ন কৰাৰ অধিকাৰ নাই। তেওঁলোকে এতিয়া তেওঁলোকে কৰি যোৱা ভুলবোৰৰ আত্মবিশ্লেষণ কৰাৰ সময়।‘’
ভাৰতীয় ব্যৱসায়ী সকলৰ কথা উল্লেখ কৰি তেওঁ কয়, ‘’ক্ষুদ্ৰ, মজলীয়া আৰু বৃহৎ যিয়েই নহওক আমি সকলোকে উৎসাহিত কৰি যাম।‘’
আনহাতে, সীতাৰমণে কয় যে চৰকাৰে আন্ত:গাঁথনিত এক বুজন পৰিমানৰ ধন ব্যয় কৰিব।
কেন্দ্ৰীয় বিত্ত মন্ত্ৰীগৰাকীয়ে প্ৰত্যক্ষ কৰ আৰু জিএছটিৰ লগতে উত্তৰ-পূৰ্বাঞ্চলৰ উন্নয়নমূলক আঁচনিৰ বিষয়েও উল্লেখ কৰে।
সীতাৰমণে ইয়াৰ মাজতে জিজিটেল মিডিয়া আৰু একক খুচুৰা ব্ৰেণ্ড,কয়লা খনন তথা চুক্তিবদ্ধ নিৰ্মাণৰ ক্ষেত্ৰত প্ৰত্যক্ষ বিদেশী বিনিয়োগৰ নিয়ম কেন্দ্ৰই শিথিল কৰিছে বুলিও জানিব দিয়ে।
চৰকাৰে ‘ৰিয়েল ইষ্টেট’ খণ্ডৰ সহায়ক আন এক ব্যৱস্থাৱলী অনাৰ সম্ভাৱনাও ব্যক্ত কৰে কেন্দ্ৰীয় বইত্ত মন্ত্ৰীগৰাকীয়ে।
উল্লেখ্য যে আজিৰ সংবাদমেলত সীতাৰমণৰ লগতে কেন্দ্ৰীয় ৰাজ্যিক বিত্ত মন্ত্ৰী অনুৰাগ ঠাকুৰো উপস্থিত থাকে।
