বিজেপি নেতাৰ পুত্ৰৰ গুণ্ডামী : ষ্টেশ্যনৰ পৰা আনিবলৈ বিলাসী বাহনৰ সলনি মাৰুতি চুইফট পঠোৱাৰ বাবে ৰাজভৱনৰ বিষয়াক প্ৰহাৰ কৰিলে ৰাজ্যপালৰ পুত্ৰই
উৰিষ্যাৰ ৰাজ্যপাল তথা বিজেপিৰ প্ৰাক্তন মন্ত্ৰী ৰঘুবৰ দাসৰ পুত্ৰৰ গুণ্ডাগিৰিয়ে কঁপাইছে উৰিষ্যা।
যোৱা সপ্তাহত ৰাষ্ট্ৰপতি দ্ৰৌপদী মুৰ্মুৰ ভ্ৰমণৰ সময়ত উৰিষ্যাৰ ৰাজভৱনত সংঘটিত হৈছে এই ঘটনা।
অভিযোগ অনুসৰি ৰাজ্যপালৰ পুত্ৰ আৰু তেওঁৰ সংগীসকলে ৰাজভৱনৰ ভিতৰতে দুৱাৰত তলা মাৰি ৰাজভৱনত নিযুক্ত ৰাজ্যিক সংসদীয় পৰিক্ৰমা কাৰ্যালয়ৰ সহকাৰী খণ্ড বিষয়া বৈকুণ্ঠনাথ প্ৰধানক তীব্ৰ প্ৰহাৰ কৰে।
এই ঘটনাত বিষয়াগৰাকীৰ পত্নীয়ে আৰক্ষীক এজাহাৰ দাখিল কৰিছে।
বৈকুণ্ঠ নাথ প্ৰধানৰ পত্নীয়ে অভিযোগ কৰিছে যে যোৱা ৭ জুলাইৰ নিশা ৰাজ্যপাল দাসৰ পুত্ৰ ললিত দাসে তেওঁৰ ব্যক্তিগত নিৰাপত্তাৰক্ষীৰ আৰু আন ৫জন লোকৰ সৈতে তেওঁৰ স্বামীক প্ৰহাৰ কৰিছিল।
যেতিয়া ৰাজ্যপালৰ প্ৰধান সম্পাদক স্বস্বত মিশ্ৰৰ ওচৰত অভিযোগ উত্থাপন কৰা হয়, তেতিয়া তেওঁ প্ৰথমে মানি লোৱা নাছিল। ইয়াৰ পিছতে ভুক্তভোগীৰ পত্নীয়ে পুৰি বিচ থানাত খবৰ দিয়ে।
জানিব পৰা মতে, ৰাষ্ট্ৰপতি দ্ৰৌপদী মুৰ্মুৰৰ পুৰী ভ্ৰমণ উপলক্ষে বৈকুণ্ঠ প্ৰধানক ৰাজভৱনৰ প্ৰভাৰী হিচাপে নিযুক্তি দিয়া হৈছিল।
অভিযোগ অনুসৰি ৭ তাৰিখে ৰাজ্যপালৰ পুত্ৰ ললিত কুমাৰ দাসক ষ্টেচনৰ পৰা আনিবলৈ এখন গাড়ী পঠোৱাৰ কথা আছিল। কিন্তু ৰাষ্ট্ৰপতিৰ ভ্ৰমণৰ বাবে সকলো গাড়ী ব্যস্ত থকাৰ বাবে বিলাসী গাড়ীৰ সলনি এখন মাৰুতি চুজুকি গাড়ী ষ্টেচনলৈ প্ৰেৰণ কৰা হয়। সেই কথাত ক্ষুব্ধ হৈ ললিতে বিষয়াজনক প্ৰহাৰ কৰে।
বৈকুণ্ঠনাথে তেওঁৰ এজাহাৰত দিয়া বক্তব্য অনুসৰি যোৱা ৭ জুলাইৰ নিশা প্ৰায় ১১:৪৫ বজাত তেওঁ নিজৰ কাৰ্যালয়ত বহি থকাৰ সময়তে উৰিষ্যাৰ ৰাজ্যপালৰ ব্যক্তিগত ৰান্ধনী আকাশ সিং তালৈ গৈছিল। আকাশে তেওঁক কয় যে ললিতে তেওঁক লগ কৰিব বিচাৰে। তাৰ পিছত বিষয়াগৰাকীক প্ৰহাৰ কৰে ললিত দাসে।