ৰাজ্যখনত অপৰাধজনিত ঘটনা, যেনে হত্যা, ধৰ্ষণ আৰু লুণ্ঠনৰ বৃদ্ধি পৰিলক্ষিত হৈছে। ইয়াৰ ভিতৰত, বিশেষকৈ পৰকীয়া সম্পৰ্কৰ ফলত সংঘটিত অপৰাধৰ সংখ্যা বিগত কেইবছৰমানৰ পৰা বৃদ্ধি পাইছে।
শেহতীয়াকৈ গোলাঘাটৰ মেৰাপানীৰ চাউদাং পথাৰ দ-চুক গাঁৱত আন এক লোমহৰ্ষক হত্যাকাণ্ড সংঘটিত হৈছে।
সোমবাৰে নিশা পত্নীৰ দাৰ ঘাপত স্বামী নৰেশ্বৰ ঠেঙাৰ মৃত্যু হয়।
অভিযোগ অনুসৰি, স্বামীৰ পৰকীয়া প্ৰেমৰ সন্দেহতে মহিলাগৰাকীয়ে এই নৃশংস কাণ্ড সংঘটিত কৰে। হত্যাকাণ্ডৰ পূৰ্বে নিশা দুয়োৰে মাজত প্ৰথমে কাজিয়া হৈছিল।
হত্যাকাণ্ড সংঘটিত কৰাৰ পিছতেই মহিলাগৰাকীয়ে মেৰাপানী আৰক্ষী থানাত আত্মসমৰ্পণ কৰে। ইমানেই নহয়, কাণ্ডটো সংঘটিত কৰাৰ পাছত মহিলাগৰাকীয়ে নিজে বিহপান কৰিছিল।
আৰক্ষীয়ে আত্মসমৰ্পণ কৰা মহিলাগৰাকীক ততাতৈয়াকৈ গোলাঘাটৰ চিকিৎসালয়লৈ প্ৰেৰণ কৰে, আৰু বৰ্তমান তেওঁ চিকিৎসালয়ত চিকিৎসাধীন হৈ আছে।
ঘটনাৰ পাছত আৰক্ষীৰ উচ্চপদস্থ বিষয়া ঘটনাস্থলীত উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। বৰ্তমান এই সমগ্ৰ ঘটনা সন্দৰ্ভত আৰক্ষীৰ তদন্ত অব্যাহত আছে।
এই ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে। অৱশ্যে, আৰক্ষীৰ তদন্তৰ অন্ততহে ঘটনাৰ সবিশেষ তথ্য পোহৰলৈ অহাৰ সম্ভাৱনা আছে।
