পুৱাৰ পৰা ৰাতিলৈকে কেৱল মিটিং, ডেডলাইন আৰু লক্ষ্য পূৰণৰ দৌৰত আজিৰ বহুতো মহিলা ক্লান্ত হৈ পৰিছে। বাহিৰৰ পৰা সকলোবোৰ স্বাভাৱিক যেন লাগিলেও, শৰীৰৰ ভিতৰত নিশব্দে এক ডাঙৰ সমস্যাৰ সৃষ্টি হৈ আছে। চিকিৎসকসকলে সতৰ্ক কৰি দিছে যে দীৰ্ঘদিনীয়া মানসিক চাপ, ভাগৰ আৰু অনিয়মীয়া জীৱনযাপনে মহিলাৰ প্ৰজনন স্বাস্থ্যৰ ওপৰত গুৰুতৰ প্ৰভাৱ পেলাব পাৰে। স্ত্ৰীৰোগ বিশেষজ্ঞসকলৰ মতে, দীৰ্ঘ সময় ধৰি কাম কৰা, পৰ্যাপ্ত জিৰণিৰ অভাৱ আৰু ক্ৰমাগত মানসিক চাপে শৰীৰত হৰমনৰ ভাৰসাম্য নষ্ট কৰিব পাৰে। ইয়াৰ প্ৰভাৱ ঋতুস্ৰাৱ, ডিম্বাণু নিৰ্গত হোৱা প্ৰক্ৰিয়া আৰু আনকি গৰ্ভধাৰণৰ সম্ভাৱনাৰ ওপৰতো পৰিব পাৰে।
চিকিৎসকসকলৰ মতে, মহিলাৰ প্ৰজনন ব্যৱস্থা পোনে পোনে মগজুৰ সেই অংশবোৰৰ সৈতে সংযুক্ত যিবোৰে শৰীৰৰ হৰমন নিয়ন্ত্ৰণ কৰে। অত্যধিক মানসিক চাপৰ সময়ত শৰীৰত কৰ্টিছলকে ধৰি বিভিন্ন ষ্ট্ৰেছ হৰমনৰ মাত্ৰা বৃদ্ধি পায়। দীৰ্ঘদিন ধৰি এনে পৰিস্থিতি চলি থাকিলে শৰীৰৰ স্বাভাৱিক হৰমন চক্ৰ ভাঙি পৰিব পাৰে। ইয়াৰ ফলত হৰমনৰ ভাৰসাম্যহীনতা দেখা দিয়ে আৰু অনিয়মীয়া ঋতুস্ৰাৱ, ডিম্বাণু নিৰ্গত হোৱাত সমস্যা, হঠাতে ঋতুস্ৰাৱ বন্ধ হৈ যোৱা, প্ৰিমেনষ্ট্ৰুৱেল চিনড্ৰম আৰু গৰ্ভধাৰণত পলম হোৱা আদি সমস্যাৰ সৃষ্টি হ’ব পাৰে। বিশেষজ্ঞসকলৰ মতে, মানসিক চাপেই গৰ্ভধাৰণত বাধাৰ একমাত্ৰ কাৰণ নহ’লেও ই সম্ভাৱনা বহুখিনি হ্ৰাস কৰিব পাৰে।
যিসকল মহিলাই নিয়মীয়াকৈ নিশাৰ ভাগত কাম কৰে বা দীৰ্ঘ সময় ধৰি অফিচত থাকে, তেওঁলোকৰ শৰীৰৰ বায়লজিকেল ঘড়ী বা চাৰ্কাডিয়ান ৰিদম বাধাগ্ৰস্ত হ’ব পাৰে। এই জৈৱিক ঘড়ীটোৱেই টোপনি, হৰমন আৰু শৰীৰৰ বিভিন্ন গুৰুত্বপূৰ্ণ কাম নিয়ন্ত্ৰণ কৰে। স্বাস্থ্য সেৱা, মিডিয়া, কৰ্পৰেট আদি খণ্ডত কাম কৰা মহিলাসকল এই ক্ষেত্ৰত বেছি আশংকাত থাকে। একেৰাহে কামৰ হেঁচাৰ ফলত সৃষ্টি হোৱা ভাগৰে কেৱল মানসিক ক্লান্তিয়েই নহয়, শৰীৰৰ স্বাভাৱিক কাৰ্যক্ষমতাও নষ্ট কৰে। ইয়াৰ লগত পৰ্যাপ্ত টোপনি নোহোৱা, অনিয়মীয়া খাদ্যাভ্যাস, ব্যায়ামৰ অভাৱ, অত্যধিক কফি সেৱন আৰু প্ৰচেছড খাদ্যৰ ওপৰত নিৰ্ভৰশীলতা আদি ক্ষতিকাৰক অভ্যাসবোৰো যোগ হয়। এইবোৰৰ ফলত ওজন বৃদ্ধি আৰু প্ৰজনন জনিত জটিলতাৰ আশংকা বৃদ্ধি পায়।
বৰ্তমান সময়ত বহু মহিলাই নিজৰ কেৰিয়াৰক অগ্ৰাধিকাৰ দি পলমকৈ মাতৃত্বৰ সিদ্ধান্ত গ্ৰহণ কৰে। যদিও ত্ৰিশ বছৰৰ পাছতো সুস্থভাৱে মাতৃ হোৱাটো সম্ভৱ, তথাপিও বয়স বঢ়াৰ লগে লগে স্বাভাৱিকভাৱেই প্ৰজনন ক্ষমতা কমি আহে। তাৰ ওপৰত যদি অত্যধিক মানসিক চাপ যোগ হয়, তেন্তে সমস্যা অধিক বৃদ্ধি পাব পাৰে। অৱশ্যে চিকিৎসকসকলে স্পষ্টকৈ কয় যে মানসিক চাপযুক্ত চাকৰি মানেই যে বন্ধ্যাত্ব, তেনে নহয়। সময়মতে শৰীৰৰ যত্ন ল’লে বহু সমস্যা এৰাই চলিব পাৰি। ইয়াৰ বাবে প্ৰতিদিনে পৰ্যাপ্ত টোপনি, পুষ্টিকৰ খাদ্য, নিয়মীয়া ব্যায়াম, ধ্যান আৰু মানসিক জিৰণিৰ প্ৰয়োজন। কামৰ মাজত সৰু বিৰতি লোৱা আৰু কৰ্মজীৱন তথা ব্যক্তিগত জীৱনৰ মাজত ভাৰসাম্য বজাই ৰখাটো অতি গুৰুত্বপূৰ্ণ। দীৰ্ঘদিন ধৰি ঋতুস্ৰাৱৰ সমস্যা বা গৰ্ভধাৰণত সমস্যা হ’লে পলম নকৰি চিকিৎসকৰ পৰামৰ্শ লোৱাটো অতি আৱশ্যক।
