মুখ্যমন্ত্ৰীৰ পত্নীৰ স্বাৰ্থত আৰু কি কি নীতি সলনি হ’ব অসমত? এইবাৰ প্ৰেক্ষাপটত ৰিণিকি ভূঞা শৰ্মা আৰু চাৰিলেন পথৰ প্ৰসংগ।কলিয়াবৰ তিনিআলিৰপৰা নুমলীগড়ৰ মাজৰ ৭১৫ নং ৰাষ্ট্ৰীয় ঘাইপথটো বিকল্প পথেৰে নিৰ্মাণ কৰা সিদ্ধান্তক লৈ গৰজি উঠিছে ফ‘ৰলেনযুক্ত ৰাষ্ট্ৰীয় ঘাইপথ নির্মাণ দাবী সমিতি। চাৰিলেনযুক্ত পথৰ দিশ সলনিক লৈ গুৱাহাটী উচ্চ ন্যায়ালয়ত ৰাজহুৱা স্বার্থজড়িত আবেদন দাখিল হোৱাৰ মাজতে বৃহস্পতিবাৰে দাবী সমিতিয়ে প্ৰভাৱশালী ৰাজনৈতিক নেতাৰ স্বাৰ্থতে প্ৰস্তাৱিত ৭১৫ নং ৰাষ্ট্ৰীয় ঘাইপথৰ দিশ সলনি কৰা বুলি বিস্ফোৰক তথ্য সদৰী কৰে। দাবী সমিতিৰ সভাপতি মিনু শইকীয়া, সম্পাদক প্রদীপ লস্কৰৰ উপস্থিতিত প্রাদেশিক মহিলা সমিতিৰ কাৰ্যালয়ত সংবাদমেল সম্বোধন কৰি উচ্চতম ন্যায়ালয়ৰ জ্যেষ্ঠ অধিবক্তা তথা প্ৰব্ৰজনবিৰোধী মঞ্চৰ নেতা উপমন্যু হাজৰিকাই কয় যে প্ৰস্তাৱিত ৭১৫ নং ৰাষ্ট্ৰীয় ঘাইপথটো যি নতুন দিশেৰে নিবলৈ বিচৰা হৈছে সেই দিশত বহুখিনি প্ৰভাৱশালী ৰাজনীতিবিদ আৰু আমোলাই মাটি ক্ৰয় কৰিছে।
অসমীয়া দৈনিক সংবাদপত্ৰ অসমীয়া প্ৰতিদিনত প্ৰকাশিত বাতৰি অনুসৰি- প্রস্তাৱিত নতুন বিকল্প পথৰ আটাইতকৈ ডাঙৰ হিতাধিকাৰী হৈছে প্রাইড ইষ্ট ইষ্ট এণ্টাৰটেইনমেণ্টৰ পৰিচালন সঞ্চালক তথা মুখ্যমন্ত্ৰীৰ পত্নী ৰিণিকি ভূঞা শর্মা। মুখ্যমন্ত্ৰীৰ পত্নী ৰিণিকি ভূঞা শৰ্মাই উক্ত অঞ্চলত কিছুবছৰ পূৰ্বে ক্ৰয় কৰিছে ১০৬ বিঘা ভূমি। এই ভূমিৰ দাম বৃদ্ধিৰ বাবেই এতিয়া ষড়যন্ত্রমূলকভাৱে ৰাষ্ট্ৰীয় ঘাইপথটো নতুন বিকল্প পথেৰে নিবলৈ বিচৰা হৈছে বুলি সংবাদমেলত ব্যক্ত কৰে জ্যেষ্ঠ অধিবক্তা হাজৰিকাই।
সংবাদমেলত আন কেতবোৰ গুৰুতৰ তথ্য দাঙি ধৰি জ্যেষ্ঠ অধিবক্তা হাজৰিকাই কয় যে কলিয়াবৰ তিনিআলিৰ পৰা নতুনকৈ বিকল্প পথ নিৰ্মাণ কৰি কুঁৱৰীটোল, হাটবৰ আৰু জখলাবন্ধা অঞ্চলক সম্পূর্ণ এলাগী কৰি সেই অঞ্চলৰ ব্যৱসায়ী আৰু বাসিন্দাসকলক চৰকাৰে আৰ্থিক দুৰ্যোগৰ ফালে ঠেলি দিছে। এইক্ষেত্রত দাবী সমিতিৰ ফালৰ পৰা জৰীপ চলোৱাৰ কথা উল্লেখ কৰি জ্যেষ্ঠ অধিবক্তা হাজৰিকাই কয়- ‘সমগ্র অঞ্চলটোৰ ৯১.২২ শতাংশ ব্যৱসায়ীয়ে জনায় যে তেওঁলোকৰ অধিকাংশৰ জীৱন-জীৱিকা নিৰ্ভৰ কৰে ঘাইপথৰ যাত্ৰী আৰু যান-বাহনৰ ওপৰত। এনেদৰে ৯৫.৬৪ শতাংশ ব্যৱসায়ীয়ে জনায় যে নতুন বিকল্প পথ নির্মাণ আৰু সেই ঠাইসমূহ এলাগী কৰাত চৰকাৰে তেওঁলোকৰ পৰা কোনোধৰণৰ মত লোৱা নাই। এশ শতাংশ ব্যৱসায়ীয়ে মতপোষণ কৰে যে এনে পদক্ষেপে তেওঁলোকৰ ব্যৱসায় সম্পূর্ণৰূপে ধ্বংস কৰিব।’
তেওঁ পুনৰ কয় যে প্ৰস্তাৱিত নতুন বিকল্প পথ সম্পূর্ণ চৈধ্য কিলোমিটাৰ দৈৰ্ঘৰ হ‘ব। নতুন বিকল্প পথ নির্মাণত অতিৰিক্ত যিমান ধন ব্যয় হ’ব, তাতকৈ বৰ্তমানৰ পথ উন্নীতকৰণেৰে বহু কম খৰচতে এটা ভাল পথ নির্মাণ হ’ব আৰু স্থানীয় বাসিন্দাসকলো আর্থিক দুৰ্গতিৰ পৰা ৰক্ষা পৰিব। কিন্তু নতুন বিকল্প পথ নির্মাণত প্রাকৃতিক পৰিবেশ বেয়াকৈ বিনষ্ট হ’ব। কিয়নো এই পথ ‘হস্তী দণ্ডী’ৰ মাজেৰে যাব, যাৰ ফলত হাতী-মানুহৰ সংঘাত বৃদ্ধি পাব বুলি ব্যক্ত কৰে ।
