অত্যাৱশ্যকীয় সামগ্ৰীৰ মূল্যবৃদ্ধিয়ে সৰ্বসাধাৰণক জুৰুলা কৰি তোলাৰ সময়তে মহানগৰীত পুনৰ বৃদ্ধি পালে গাখীৰৰ দাম।
বৃহত্তৰ গুৱাহাটী দুগ্ধ বিক্ৰেতা সন্থাই প্ৰতি লিটাৰ গাখীৰৰ দাম ৩ টকাকৈ বৃদ্ধি কৰিছে।
ইয়াৰ পূৰ্বে প্ৰতি লিটাৰ গাখীৰ ৪৮ টকা দৰত ক্ৰয় কৰা হৈছিল আৰু পাইকাৰী প্ৰতি লিটাৰত ৫১ টকা আৰু খুচুৰা ব্যৱসায়ত ৫৩ টকাকৈ বিক্ৰী কৰা হৈছিল।
কিন্তু এতিয়াৰে পৰা প্ৰতি লিটাৰ গাখীৰ ক্ৰয় কৰিব লাগিব ৫১ টকাকৈ আৰু পাইকাৰী প্ৰতি লিটাৰত ৫৪ টকা আৰু সেইদৰে খুচুৰা ব্যৱসায়ত প্ৰতি লিটাৰ ৫৬ টকাত বিক্ৰী হ’ব।
গুৱাহাটী মহানগৰীত দৈনিক মুঠ ১ লাখ ৬০ হাজাৰ লিটাৰ গাখীৰ বিক্ৰী হয়। মহানগৰীখনত মুঠতে ৫২০ গৰাকী লোক গাখীৰ ব্যৱসায়ৰ সৈতে জড়িত হৈ আছে।
আনহাতে, গাখীৰৰ দাম বৃদ্ধি পোৱাৰ বাবে এতিয়া স্বাভাৱিকতে মিঠাই আৰু অন্যান্য গাখীৰৰ পৰা উৎপাদিত সামগ্ৰীসমূহৰ দামো বৃদ্ধি পাব।
