এইবাৰ দাবী কৰা হৈছে যে মণিপুৰত দুগৰাকী মহিলাক বিবস্ত্ৰা কৰি ৰাজপথত খোজ কঢ়োৱাৰ ঘটনাৰ ভিডিঅ’ আৰু দলবদ্ধ ধৰ্ষণৰ অভিযোগ বহু আগতেই ৰাষ্ট্ৰীয় মহিলা আয়োগলৈ গৈছিল। কিন্তু বিজেপি চৰকাৰৰ নিয়ন্ত্ৰিত মহিলা আয়োগে এই অভিযোগক আওকাণ কৰা বুলি দাবী কৰা হৈছে।
বুধবাৰে ছ’চিয়েল মিডিয়াত বিয়পি পৰা মণিপুৰৰ এই ভিডিঅ’টোৱে সমগ্ৰ দেশতে তীব্ৰ প্ৰতিক্ৰিয়াৰ সৃষ্টি কৰিছে। মণিপুৰ আৰক্ষীয়ে দাবী কৰিছে যে সেই ছবি ৪ মে’ত তোলা হৈছিল।
শুকুৰবাৰে ইণ্ডিয়া টুডেত প্ৰকাশিত এক প্ৰতিবেদনত দাবী কৰা হৈছে যে মহিলাৰ ওপৰত হোৱা সেই নিৰ্যাতনৰ ঘটনা সন্দৰ্ভত ১২ জুনত ৰাষ্ট্ৰীয় মহিলা আয়োগক লিখিত অভিযোগ উত্থাপন কৰা হৈছিল। প্ৰকাশিত প্ৰতিবেদনৰ সৈতে অভিযোগ পত্ৰৰ প্ৰতিলিপিও প্ৰকাশ কৰা হৈছে। তিনিগৰাকী মহিলাৰ ওপৰত যৌন নিৰ্যাতন চলোৱাৰ অভিযোগ উত্থাপন হৈছে আৰু ইয়াৰে দুগৰাকী মহিলাক বিবস্ত্ৰা হৈ থকাৰ অভিযোগ উত্থাপন হৈছে।
ৰাষ্ট্ৰীয় মহিলা আয়োগৰ অধ্যক্ষ ৰেখা শৰ্মাই শুকুৰবাৰে কাৰ্যতঃ স্বীকাৰ কৰে যে মণিপুৰত মহিলাৰ ওপৰত হোৱা বহু হিংসাৰ অভিযোগ তেওঁলোকৰ দৃষ্টিগোচৰ হৈছে। সেই ৰাজ্যৰ বিজেপি চৰকাৰৰ কান্ধত দায় জাপিছে মহিলা আয়োগৰ অধ্যক্ষগৰাকীয়ে।
শুকুৰবাৰে ৰেখা শৰ্মাই কয় যে, যোৱা তিনিমাহত আমি মণিপুৰ চৰকাৰক এই বিষয়ে তিনিবাৰকৈ সুধিছো। কিন্তু কোনো সঁহাৰি পোৱা নগ’ল।’ অৱশ্যে মণিপুৰৰ এই ঘটনা সন্দৰ্ভত তেওঁলোকৰ ওচৰলৈ বহু ভুৱা অভিযোগ আহিছিল বুলিও কয় ৰাষ্ট্ৰীয় মহিলা আয়োগৰ অধ্যক্ষই। তেওঁ কয় যে বহু ক্ষেত্ৰত অভিযোগকাৰী মণিপুৰৰ নাছিল, আনকি ভাৰতৰো নাছিল।
উল্লেখ্য যে যোৱা ৩ মে’ত জনজাতীয় ছাত্ৰ সংগঠন ‘অল ট্ৰাইবেল ষ্টুডেণ্টছ ইউনিয়ন অৱ মণিপুৰ’ (আটছুম)ৰ কাৰ্যসূচীক কেন্দ্ৰ কৰি মণিপুৰত অশান্তিৰ সৃষ্টি হয়। পিছদিনা থৌবাল জিলাৰ নংপক ছেকমাই থানাৰ সমীপত মহিলা দুগৰাকীক আক্ৰমণ কৰাৰ অভিযোগ উঠিছে। ঘটনাস্থলীৰ ওচৰতে কাংপাকপি জিলাৰ সীমান্ত।
ইতিমধ্যে উচ্চতম ন্যায়ালয়ে এই বিষয়ত সক্ৰিয় ভূমিকা গ্ৰহণ কৰিছে। মুখ্য ন্যায়াধীশ ডি ৱাই চন্দ্ৰচুদৰ নেতৃত্বত এখন বিচাৰপীঠে শুকুৰবাৰৰ ভিতৰত কেন্দ্ৰ আৰু মণিপুৰ চৰকাৰৰ পৰা এই ঘটনাৰ প্ৰতিবেদন বিচাৰিছে।
ইপিনে, বিজেপি শাসিত মণিপুৰৰ এই ভিডিঅ’ ৰাজহুৱা হোৱাৰ পিছতে সক্ৰিয় হৈ পৰে আৰক্ষী। ৰাজ্যৰ মুখ্যমন্ত্ৰী এন বীৰেণ সিঙে কয় যে শুকুৰবাৰে পুৱালৈকে চাৰিজন অভিযুক্তক গ্ৰেপ্তাৰ কৰা হৈছে।
ইতিমধ্যে ৪ মে’ত হোৱা ভয়ংকৰ অভিজ্ঞতাৰ বিষয়ে এগৰাকী নিৰ্যাতিতাই বৰ্ণনা কৰিছে। তেওঁ দাবী কৰে যে সেইদিনা দুস্কৃতিকাৰীয়ে তেওঁলোকক হত্যাৰ ভাবুকি দি ৰাজহুৱা স্থানত কাপোৰ খুলিবলৈ বাধ্য কৰাইছিল। ১৮ মে’ত কাংপাকোপি জিলাৰ বি ফিনেম গাঁৱৰ মুৰব্বীৰ সহযোগত একেখন জিলাৰ ছাইকুল আৰক্ষী থানাত এজাহাৰ দাখিল কৰে নিৰ্যাতিতাই। ‘জিৰ’ এফআইআৰ’ দাখিল কৰা হয়।
উল্লেখ্য যে ‘সাধাৰণ এফ আই আৰ’ ঘটনা সংঘটিত হোৱা থানা এলেকাত এফ আই আৰ দাখিল কৰিবলগীয়া হয়। কিন্তু যিকোনো থানাত ‘জিৰ’ এফ আই আৰ’ দাখিল কৰিব পাৰি। অপৰাধ সংঘটিত হোৱা ঘটনা যি থানাৰ এলেকাতে নঘটক কিয়। তাৰ পিছত সেই থানাখনে সংশ্লিষ্ট থানালৈ অভিযোগ প্ৰেৰণ কৰে। অৰ্থাৎ এনে অপৰাধৰ ক্ষেত্ৰত ভুক্তভোগী বা তেওঁৰ পৰিয়ালৰ লোকে ঘটনা স্থলীৰ থানালৈ যাব নালাগে।
