অসমৰ ভ্ৰাম্যমাণ থিয়েটাৰৰ এগৰাকী পুৰোধা ব্যক্তি ‘আৱাহন’ থিয়েটাৰৰ প্ৰতিস্থাপক প্ৰযোজক কৃষ্ণ ৰয়ৰ বৰ্ণাঢ্য জীৱন সামৰি ড॰ পৰাগ বৰ্মন আৰু কিশোৰ কুমাৰ কলিতাই যুটীয়াভাৱে প্ৰণয়ণ কৰা জীৱন-ভিত্তিক উপন্যাস ‘আৱাহন’ আজি গুৱাহাটী প্ৰেছ ক্লাৱত উন্মোচন কৰা হয়৷ গ্ৰন্থখন উন্মোচন কৰে পাঠশালাস্থিত ভট্টদেৱ বিশ্ববিদ্যালয়ৰ উপাচাৰ্য অধ্যাপক ধনপতি ডেকা , সাহিত্য অকাডেমীৰ অসমীয়া ভাষা উপদেষ্টা পৰিষদৰ আহ্বায়ক দিগন্ত বিশ্ব শৰ্মা, অসমীয়া প্ৰতিদিন কাকতৰ মুখ্য সহযোগী সম্পাদক অচ্যুত পাটোৱাৰী, প্ৰয়াত ড॰ ভবেন্দ্ৰ নাথ শইকীয়াৰ পত্নী প্ৰীতি শইকীয়া আৰু আৱাহন থিয়েটাৰৰ বৰ্তমানৰ প্ৰযোজক বিশিষ্ট অভিনেত্ৰী প্ৰস্তুতি পৰাশৰে৷
গ্ৰন্থখনৰ উন্মোচনৰ আগে আগে উপস্থিত সুধীবৃন্দ আৰু সাংবাদিকৰ আগত নিজৰ অনুভৱ ব্যক্ত কৰি কৃষ্ণ ৰয়ে কয় যে ভ্ৰাম্যমাণ থিয়েটাৰৰ পিতামহ অচ্যুত লহকৰৰ হাতত ধৰি এদিন তেওঁ এক ভ্ৰাম্যমাণী জীৱন গ্ৰহণ কৰিছিল আৰু সেই পৰিক্ৰমাত ‘পাৰ্টনাৰ’ প্ৰয়াত ৰতন লহকৰৰ লগত একেলগে ‘কহিনুৰ থিয়েটাৰ’ যুটীয়াভাৱে প্ৰযোজনা কৰিছিল৷ পাছলৈ আৱাহন থিয়েটাৰৰ জন্ম দি তেওঁ অসমৰ নাট্য জগতত এক নতুন ধাৰাৰ সুচনা কৰিবলৈ অহোপুৰুষাৰ্থ কৰিছিল আৰু সেই প্ৰচেষ্টা আজিও আৱাহনে ধৰি ৰাখিব পাৰিছে৷ ভ্ৰাম্যমাণৰ প্ৰথম দিনটোৰ কথা মনত পেলাই তেওঁ আবেগবিহ্বল সুৰত কয় যে নিজ চহৰ পাঠশালাৰ দুগৰাকী লেখকে তেওঁৰ জীৱন সামৰি প্ৰণয়ণ কৰা এই উপন্যাসখনে তেওঁৰ জীৱন পৰিক্ৰমাৰ লগতে ভ্ৰাম্যমাণৰ সামগ্ৰিক ইতিহাস সামৰি লৈছে, যি সঁচাকৈয়ে এক বিৰল প্ৰচেষ্টা৷
গ্ৰন্থখন উন্মোচন কৰি সাহিত্য অকাডেমিৰ অনুবাদ সাহিত্যৰ বঁটা প্ৰাপক দিগন্ত বিশ্ব শৰ্মাই কয় যে এনে এখন উপন্যাসৰ জৰিয়তে কৃষ্ণ ৰয়ৰ বৰ্ণাঢ্য জীৱনৰ লগতে লেখকদ্বয়ে অসমৰ ভ্ৰাম্যমাণ থিয়েটাৰৰ বৰ্ণিল পৰিক্ৰমা সামৰি লৈছে৷ অসমীয়া প্ৰতিদিন কাকতৰ মুখ্য সহযোগী সম্পাদক অচ্যুত পাটোৱাৰীয়ে কৃষ্ণ ৰয়ৰ লগত থকা দীৰ্ঘকালীন সম্পৰ্কৰ কথা ৰোমন্থন কৰি এই উপন্যাসখন অসমীয়া সাহিত্যৰ প্ৰতি এক অনবদ্য অৱদান বুলি অভিহিত কৰে৷ ভট্টদেৱ বিশ্ববিদ্যালয়ৰ উপাচাৰ্য্য অধ্যাপক ধনপতি ডেকাই কৃষ্ণ ৰয়ৰ বৰ্ণাঢ্য জীৱনৰ ওপৰত আলোকপাত কৰি লিখা এই উপন্যাসখনে আমাৰ উঠি অহা প্ৰজন্মক নতুন দিশৰ সন্ধান দিব পাৰিব বুলি মত প্ৰকাশ কৰে।আৱাহন থিয়েটাৰৰ বৰ্তমানৰ প্ৰযোজক প্ৰস্তুতি পৰাশৰে কৃষ্ণ ৰয়ৰ প্ৰত্যাহবানপূৰ্ণ জীৱন পৰিক্ৰমাই তেওঁক কেনেদৰে অনুপ্ৰাণিত কৰিছে আৰু ৰয়ৰ উদগণিত কেনেদৰে থিয়েটাৰখনে বিভিন্ন ঘাত-প্ৰতিঘাতৰ মাজত চলাই আছে তাক গ্ৰন্থ উন্মোচনী অনুষ্ঠানত ব্যক্ত কৰে৷
প্ৰয়াত ড॰ ভবেন্দ্ৰ নাথ শইকীয়া কেনেদৰে আৱাহন থিয়েটাৰৰ লগত জড়িত হ’ল সেই কথা সোঁৱৰি প্ৰীতি শইকীয়াই কৃষ্ণ ৰয়ৰ জীৱন প্ৰৰিক্ৰমাই হাজাৰজন অসমীয়াক অনুপ্ৰাণিত কৰিব বুলিও অভিহিত কৰে৷ এই গ্ৰন্থ উন্মোচনী সভাত ৰবেন্দ্ৰ কুমাৰ দাস, অভিজিৎ ভট্টাচাৰ্য,ডা:জয়ন্ত দাস,ড৹ মনোজ কুমাৰ মহন্ত, ড৹ যোগেশ কাকতি,ড৹ মনোৰঞ্জন দাস,ড৹ বিজয় শৰ্মা,প্ৰফুল্ল বৰ্মণ,,অৰূপজ্যোতি দাস,হুমায়ুন চৌধুৰী,গোপাল জালান,সত্যেন তালুকদাৰ, কনক চন্দ্ৰ গগৈ,জয়ন্ত গগৈ,ড৹ সন্দীপণ তালুকদাৰ ,নিখিল বৰ্মন,পংকজ শৰ্মা,মৃদুল তালুকদাৰকে আদি কৰি ভলেমান বিশিষ্ট ব্যক্তি উপস্থিত থাকে৷
