বিজেপি চৰকাৰৰ দিনত দেশত ক্ৰমাগতভাবে বৃদ্ধি পাইছে ঘৃণা বিয়পোৱা ভাষণৰ সংখ্যা। বিগত এবছৰত দেশত ঘৃণামূলক ভাষণ ৪৫ শতাংশ বৃদ্ধি হৈছে। শেহতীয়াকৈ প্ৰকাশ পোৱা নেশ্যনেল ক্ৰাইমছ ৰেকৰ্ডছ ব্যুৰোৰ প্ৰতিবেদনত প্ৰকাশ পাইছে এই তথ্য ।
সোমবাৰে প্ৰকাশিত এনচিআৰবিৰ প্ৰতিবেদন অনুসৰি ২০২১ চনত দেশত ঘৃণামূলক ভাষণৰ গোচৰৰ সংখ্যা ৯৯৩টা হোৱাৰ বিপৰীতে ২০২২ চনত এই সংখ্যা ১৪৪৪টালৈ বৃদ্ধি পাইছে। অৰ্থাৎ ঘৃণামূলক ভাষণৰ সৈতে জড়িত গোচৰৰ সংখ্যা এবছৰত ৪৫ শতাংশ বৃদ্ধি পাইছে।
উল্লেখ্য ২০২২ চনত সৰ্বাধিক ঘৃণামূলক ভাষণৰ গোচৰ ৰুজু হৈছিল উত্তৰ প্ৰদেশত। বিগত বৰ্ষত যোগীৰাজ্যত ৰুজু হৈছে ২১৭ টাকৈ ঘৃণাসূচক ভাষণৰ গোচৰ। ইয়াৰ পিছতে ক্ৰমে ৰাজস্থানত ১৯১ টা আৰু মহাৰাষ্ট্ৰত ৰুজু হৈছে ১৭৮টা গোচৰ।
শেহতীয়াকৈ নিৰ্বাচন অনুষ্ঠিত হোৱা পাঁচখন ৰাজ্যৰ ভিতৰত যোৱা বছৰৰ তুলনাত ২খন ৰাজ্যত ঘৃণামূলক ভাষণৰ ঘটনা ১০০ শতাংশতকৈ অধিক বৃদ্ধি পাইছে। মধ্যপ্ৰদেশত ২০২১ চনত মাত্ৰ ৩৭টা এনে গোচৰ ৰুজু হোৱাৰ বিপৰীতে ২০২২ চনত এই সংখ্যা আছিল ১০৮টা। অৰ্থাৎ ১৯১ শতাংশ বৃদ্ধি পাইছে গোচৰৰ সংখ্যা।
আনহাতে ৰাজস্থানত ১৩৮ শতাংশ বৃদ্ধি পাইছে এনে গোচৰৰ সংখ্যা। ৰাজস্থানত ২০২২ চনত ১৯১টা গোচৰ ৰুজু হৈছে।
উল্লেখ্য যে যোৱা দুবছৰত মিজোৰামত কোনো গোচৰ ৰুজু হোৱা আনহাতে অসমত ৪৪ টা ঘৃণাৰ বক্তব্যৰ গোচৰ ৰুজু হৈছে।
এই প্ৰতিবেদন সন্দৰ্ভত সমাজকৰ্মী তথা চিপিআই নেতা সমৰ ভাণ্ডাৰীয়ে কয় যে ‘একাংশ ৰাজনৈতিক দলে নিজৰ স্বাৰ্থপৰ এজেণ্ডাৰ বাবে সমাজখনক মেৰুকৰণ কৰিছে। ঘৃণামূলক ভাষণ বৃদ্ধিৰ এটা ডাঙৰ কাৰণ এইটোৱেই।”
