ভাৰতত ইণ্টাৰনেট ব্যৱহাৰ কৰা মহিলাৰ সংখ্যা আগতকৈ বহুত বৃদ্ধি পাইছে। শেহতীয়াকৈ প্ৰকাশ পোৱা ষষ্ঠ ৰাষ্ট্ৰীয় পৰিয়াল স্বাস্থ্য জৰীপৰ প্ৰতিবেদন অনুসৰি, ২০১৯ চনৰ পৰা ২০২১ চনৰ ভিতৰত য’ত মাত্ৰ ৩৩.৩ শতাংশ মহিলাই ইণ্টাৰনেট ব্যৱহাৰ কৰিছিল, এতিয়া ২০২৩-২৪ বৰ্ষত এই সংখ্যা প্ৰায় দুগুণ হৈ ৬৪.৩ শতাংশ হৈছেগৈ। এই কথাই দেশৰ মহিলাসকলৰ মাজত ডিজিটেল মাধ্যমৰ ব্যৱহাৰ বৃদ্ধি পোৱাৰ এক ডাঙৰ পৰিৱৰ্তনক ডাঙি ধৰিছে।
কেৱল ইণ্টাৰনেটেই নহয়, মহিলাসকলৰ বেংক একাউণ্ট আৰু নিজা মোবাইল ফোনৰ ব্যৱহাৰো বৃদ্ধি পাইছে। পূৰ্বৰ জৰীপত ৭৮.৬ শতাংশ মহিলাৰ বেংক একাউণ্ট আছিল, যি এতিয়া ৮৯ শতাংশলৈ বৃদ্ধি পাইছে। ইয়াৰ উপৰি নিজাকৈ মোবাইল থকা মহিলাৰ সংখ্যা ৫৩.৯ শতাংশৰ পৰা বাঢ়ি ৬৩.৬ শতাংশ হৈছে। ইয়াৰ লগতে ১৫ ৰ পৰা ২৪ বছৰ বয়সৰ মহিলাৰ মাজত ঋতুস্ৰাৱৰ সময়ত স্বাস্থ্যসন্মত পদ্ধতি গ্ৰহণ কৰাৰ হাৰো ৭৭.৬ শতাংশৰ পৰা ৭৯.২ শতাংশলৈ বৃদ্ধি পাইছে। বিভিন্ন চৰকাৰী আঁচনি আৰু সুলভ মূল্যত লাভ কৰা চেনিটাৰী সামগ্ৰীৰ বাবেই এই ক্ষেত্ৰত সচেতনতা বৃদ্ধি পাইছে বুলি কেন্দ্ৰীয় স্বাস্থ্য মন্ত্ৰালয়ে জনাইছে।
স্বাস্থ্য মন্ত্ৰালয়ৰ মতে, এই প্ৰতিবেদনে মাতৃ আৰু শিশুৰ স্বাস্থ্য, পুষ্টি আৰু মহিলা সৱলীকৰণৰ ক্ষেত্ৰত এক ইতিবাচক ছবি প্ৰতিফলিত কৰিছে। অৱশ্যে ইয়াৰ মাজতে কিছুমান নতুন প্ৰত্যাহ্বানো দেখা গৈছে। বিশেষকৈ জীৱনশৈলীৰ সৈতে জৰিত বিভিন্ন ৰোগ আৰু মেদবহুলতা আদি সমস্যা এতিয়া বৃদ্ধি পাইছে। ইয়াৰ বাবে সজাগতা আৰু স্বাস্থ্যসন্মত খাদ্য গ্ৰহণৰ ওপৰত গুৰুত্ব দিয়াটো প্ৰয়োজনীয় হৈ পৰিছে। এই সকলোবোৰৰ পাছতো ভাৰতে বহনক্ষম উন্নয়নৰ লক্ষ্যত উপনীত হোৱাৰ দিশত সঠিকভাৱে আগবাঢ়িছে।
এই গুৰুত্বপূৰ্ণ জৰীপখন ২০২৩-২৪ বৰ্ষত কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ে মুম্বাইৰ আন্তঃৰাষ্ট্ৰীয় জনসংখ্যা বিজ্ঞান প্ৰতিষ্ঠানৰ সহযোগত চলাইছিল। দেশৰ ৭১৫ টা জিলাৰ প্ৰায় ৬.৭৯ লাখ পৰিয়ালক সামৰি এই জৰীপ কৰা হৈছিল। ইয়াৰ পৰা পোৱা তথ্যই ভৱিষ্যতে জিলা পৰ্যায়ত বিভিন্ন আঁচনি আৰু কাৰ্যসূচী ৰূপায়ণ কৰাত সহায় কৰিব।
