নগাঁও বন্যপ্ৰাণী বিভাগৰ চূড়ান্ত গাফিলতিৰ বাবেই সংস্থাপনৰ পিছতো পুনৰ গঁড় শূন্য হৈ পৰিল ঐতিহাসিক লাওখোৱা- বুঢ়াচাপৰি অভ্যাৰণ্য। ফলত তৃতীয়বাৰৰ বাবে গঁড়শূন্য হৈ পৰিল অভয়াৰণ্য দুখন।
চলিত বৰ্ষৰ ছয় ফেব্ৰুৱাৰীত ওৰাং ৰাষ্ট্ৰীয় উদ্যানত প্ৰাপ্ত:বয়স্ক গঁড়ৰ খেদা খাই ঠেলামৰাৰ পৰা শিঙৰী হৈ নগাঁৱৰ বৰালিমাৰীত এটা কম বয়সীয়া গঁড়ে জনাঞ্চলত বিচৰণ কৰি ফুৰিছিল। তাৰ পিছত বন্যপ্ৰাণী বিভাগ আৰু প্ৰকৃতি প্ৰেমী সংগঠনৰ তৎপৰতাত গড়টোৱে প্ৰৱেশ কৰিছিল লাওখোৱা-বুঢ়াচাপৰিত। কিন্তু শেহতীয়াকৈ এই একমাত্ৰ গঁড়টোক সুৰক্ষা দিব নোৱাৰিলে বন বিভাগে।
এই ঘটনাই অভয়াৰণ্য দুখনৰ বিলত অবৈধভাৱে মাছ ধৰাৰ পৰা আৰম্ভ কৰি বেদখল আদি উচ্ছেদ কৰাত সম্পূৰ্ণৰূপে ব্যৰ্থ হোৱা ডি এফ অ’ জিতেন্দ্ৰ কুমাৰৰ চূড়ান্ত অকৰ্মণ্যতা আৰু উদাসীনতা পোহৰলৈ আনিলে। বিগত আঠমাহ ধৰি অভয়াৰণ্য দুখনত অতিথি হৈ বিচৰণ কৰি ফুৰা গঁড়টোক চোৰাং চিকাৰীয়ে হত্যা কৰিলে নেকি বুলিও প্ৰশ্ন তুলিছে বিভিন্ন মহলে।
আনহাতে সংগীৰ অভাৱত অকলশৰীয়া হৈ বিচৰণ কৰা গঁড়টো পুনৰ ওৰাঙলৈ উভতি যোৱাৰ সম্ভাৱনীয়তাও নুই কৰিব নোৱাৰি। কিন্তু গঁড়টো নিৰাপদে ওৰাঙত প্ৰৱেশ কৰিছে নে চোৰাং চিকাৰীয়ে নিধন কৰিছে ইয়াৰে কোনো এটা প্ৰশ্নৰ উত্তৰ দিব পৰা নাই বিভাগটোৱে।
গঁড়টোক ওৰাঙলৈ খেদি পঠিয়াবলৈ বিভাগে পৰিকল্পনা গ্ৰহণ কৰিছিল যদিও লাওখোৱা-বুঢ়াচাপৰিৰ প্ৰাকৃতিক পৰিবেশৰ সৈতে অভ্যস্ত হৈ পৰাত সেই চিন্তা পৰিহাৰ কৰিছিল। বন্যপ্ৰাণী বিভাগে অহা জানুৱাৰী মাহত পুনৰ অভয়াৰণ্য দুখনত আৰু দুটা গঁড় সংস্থাপন কৰাৰ পৰিকল্পনা হাতত লৈছিল যদিও হঠাৎ যোৱা ২৪ চেপ্টেম্বৰৰ পৰা এক মাত্ৰ গঁড়টো সন্ধানহীন হৈ পৰাটো ৰহস্যজনক। সেই দিনাখন শিঙমাৰী বীট অফিচৰ আশে পাশে গঁড়টোক অন্তিমবাৰৰ বাবে প্ৰতক্ষ্য কৰিছিল।
এশিঙীয়া গঁড়ৰ বিশ্বৰ ভিতৰত আটাইতকৈ উপযুক্ত প্ৰাকৃতিক বিচৰণ ভূমি হিচাপে চিহ্নিত লাওখোৱা-বুঢ়াচাপৰিৰ পৰা হঠাৎ একমাত্ৰ গঁড়টো নিৰুদ্দেশ হোৱাক লৈ প্ৰকৃতি প্ৰেমীসকল খড়্গহস্ত হৈ পৰিছে। ইতিপূৰ্বে ২০১৬ ৰ ৩০ মাৰ্চত বুঢ়াচাপৰি অভয়াৰণ্যৰ কাছধৰা বিলৰ পাৰত ‘ইন্ডিয়ান ৰাইনো ভিজন ২০২০’ৰ অধীনত প্ৰায় ৮০ লক্ষ টকা ব্যয় সাপেক্ষ বেৰিকেড নিৰ্মাণ কৰি কাজিৰঙাৰ পৰা দুজনী মাইকী গঁড় আনি সংস্থাপন কৰিছিল। কিন্তু উপযুক্ত প্ৰাকৃতিক পৰিবেশ নোহোৱা সত্বেও গাৰ বলেৰে গঁড় সংস্থাপন কৰাৰ বাবেই অগাপিছাকৈ মাক-জীয়েক দুয়োজনী গঁড়ে মৃত্যুক আকোঁৱালি ল’বলগীয়া হৈছিল।
বন বিভাগৰ গাফিলতিৰ বাবেই অকাল মৃত্যুক সাবটি ল’বলগা হোৱাৰ ঘটনাৰ পিছত বৰ্তমান সন্ধানহীন হৈ থকা গঁড়টো নিজেই অভয়াৰণ্যখনত প্ৰৱেশ কৰি লাওখোৱা-বুঢ়া চাপৰি দুখনৰ সৌষ্ঠৱ বৃদ্ধি কৰাৰ লগতে অভয়াৰণ্য দুখনৰ বিল- জলাশয়ত গঁড়ৰ বাবে উৎকৃষ্ট খাদ্য হিচাপে স্বীকৃত ‘লোকাচা’ নামৰ শেলুৱৈ জাতীয় উদ্ভিদ প্ৰচুৰ পৰিমাণে খাই গঁড়টো স্বাস্থ্যবান হৈ পৰিছিল যদিও বন বিভাগৰ চৰম অৱহেলাৰ বাবেই হঠাৎ সন্ধানহীন হোৱা বুলি ৰাইজে অভিযোগ কৰিছে।
উল্লেখ্য যে, গঁড়টোৰ সুৰক্ষা দিয়াত চূড়ান্ত ব্যৰ্থ হোৱা নগাঁৱৰ এইগৰাকী ডি এফ অ’ জিতেন্দ্ৰ কুমাৰৰ দিনতেই বুঢ়াচাপৰিৰ দুটাকৈ গঁড়ৰ মৃত্যু হৈছিল। এতিয়া প্ৰশ্ন হয় পূৰ্বে দুটাকৈ গঁড়ৰ মৃত্যুৰ পিছত অভয়াৰণ্য খনৰ একমাত্ৰ গঁড়টোৰ সুৰক্ষা দিয়াতো চূড়ান্ত ব্যৰ্থ হোৱা বন্যপ্ৰাণী বিষয়া জিতেন্দ্ৰ কুমাৰৰ বিৰুদ্ধে কিবা ব্যৱস্থা গ্ৰহণ কৰিবলৈ বিভাগীয় মন্ত্ৰীৰ সাহস হ’ব নে বুলিও সচেতন তথা প্ৰকৃতিপ্ৰেমীয়ে মত পোষণ কৰিছে।