বিহাৰৰ মুখ্যমন্ত্ৰী নীতিশ কুমাৰৰ বিৰুদ্ধে এগৰাকী মুছলমান মহিলা চিকিৎসকৰ বোৰ্খা আঁতৰোৱাৰ গুৰুতৰ অভিযোগ উত্থাপন কৰি যোৱা শুকুৰবাৰে পিপলছ ডেম’ক্ৰেটিক পাৰ্টিৰ নেত্ৰী ইলতিজা মুফটিয়ে আৰক্ষীৰ ওচৰত এজাহাৰ দাখিল কৰে। শ্ৰীনগৰৰ কোঠীবাগ থানাত দাখিল কৰা এই অভিযোগত ইলতিজাই নীতিশ কুমাৰৰ বিৰুদ্ধে এফআইআৰ পঞ্জীয়ন কৰাৰ দাবী জনাইছে। ভাইৰেল হোৱা এটা ভিডিঅ’ৰ উদ্ধৃতি দি তেওঁ অভিযোগ কৰে যে বিহাৰৰ সচিবালয়ত নিযুক্তি পত্ৰ গ্ৰহণ কৰিবলৈ অহা এজনী যুৱ আয়ুষ চিকিৎসকৰ বোৰ্খা নীতিশ কুমাৰে ৰাজহুৱাকৈ নমাই দিছিল, যিটো সমগ্ৰ দেশৰ মহিলাৰ মৰ্যাদাৰ ওপৰত এক প্ৰচণ্ড আঘাত।
ইলতিজাই তেওঁৰ এজাহাৰত উল্লেখ কৰিছে যে এই কাণ্ডই বিশেষকৈ মুছলমান মহিলাসকলৰ মনত গভীৰ যন্ত্ৰণা আৰু শংকাৰ সৃষ্টি কৰিছে। তেওঁ মুখ্যমন্ত্ৰীগৰাকীৰ এই কাৰ্যক এগৰাকী মহিলাৰ স্বায়ত্ত্বশাসন আৰু পৰিচয়ৰ ওপৰত নৃশংস আক্ৰমণ বুলি অভিহিত কৰিছে। অভিযোগত লগতে কোৱা হৈছে যে চৰকাৰী অনুষ্ঠানত এগৰাকী যুৱ চিকিৎসক নুছৰত পাৰবীনৰ বোৰ্খা বলপূৰ্বকভাৱে আঁতৰাই নীতিশ কুমাৰে ভাৰতীয় নাৰীৰ স্বাধীনতা আৰু মৰ্যাদাক লঘূ কৰিবলৈ চেষ্টা কৰিছে। এনে কাৰ্যই সমাজৰ কিছুমান দুষ্কৃতিকাৰীক মুছলমান মহিলাক অপমান কৰিবলৈ সাহস প্ৰদান কৰিব বুলিও তেওঁ শংকা প্ৰকাশ কৰে।
এই বিতৰ্কৰ মাজতে ইলতিজাই বিজেপিৰ একাংশ মন্ত্ৰী আৰু নেতাৰ স্থিতিকো সমালোচনা কৰে। তেওঁ অভিযোগ কৰে যে এই লজ্জাজনক কাৰ্যক ক্ষমা খুজি সংশোধন কৰাৰ পৰিৱৰ্তে একাংশই ইয়াক উদযাপনহে কৰিছে। ইলতিজাৰ পূৰ্বে সমাজবাদী পাৰ্টিৰ মুখপাত্ৰ ছুমাইয়া ৰাণাইও লক্ষ্ণৌ আৰক্ষীক এই সন্দৰ্ভত এজাহাৰ দাখিল কৰিছিল। ছুমাইয়াই উত্তৰ প্ৰদেশৰ মন্ত্ৰী সঞ্জয় নিছাদৰ এই বিষয়ক আপত্তিজনক মন্তব্যৰ বিৰুদ্ধেও সোচ্চাৰ হৈছিল। ইয়াৰ উপৰিও কেন্দ্ৰীয় মন্ত্ৰী গিৰিৰাজ সিঙে এই বিষয়ত দিয়া বিতৰ্কিত মন্তব্যৰ কথা উল্লেখ কৰি ইলতিজাই তীব্র ক্ষোভ প্ৰকাশ কৰে।
জম্মু-কাশ্মীৰৰ ধৰ্মীয় নেতা মিৰৱাইজ উমৰ ফাৰুকেও শ্ৰীনগৰৰ জামিয়া মছজিদত শুকুৰবাৰৰ নামাজৰ সময়ত এই কাণ্ডক গৰিহণা দি ইয়াক ব্যক্তিগত মৰ্যাদা আৰু নৈতিক সীমাৰ গুৰুতৰ উলংঘা বুলি অভিহিত কৰে। ইফালে, জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই এই সংক্ৰান্তত মৌনতা অৱলম্বন কৰাক লৈও পিডিপি নেত্ৰীগৰাকীয়ে সমালোচনা কৰিছে। ৰাজনৈতিক ভাৱে ইটোৰ পিছত সিটো অভিযোগ উত্থাপন হোৱাৰ মাজতে এই সমগ্ৰ বিতৰ্কই এতিয়া ৰাষ্ট্ৰীয় পৰ্যায়ত চৰ্চা লাভ কৰিছে।
আনহাতে, যিগৰাকী আয়ুষ চিকিৎসক নুছৰত পাৰবীনক লৈ এই বিতৰ্কৰ সূত্ৰপাত হৈছিল, তেওঁ এতিয়াও নিজৰ কৰ্তব্যত যোগদান কৰা নাই বুলি জানিব পৰা গৈছে। চৰকাৰী সূত্ৰ অনুসৰি, শনিবাৰ আছিল তেওঁৰ চাকৰিত যোগদান কৰাৰ নিৰ্ধাৰিত শেষ তাৰিখ। স্বাস্থ্য বিভাগৰ বিষয়াসকলে জানিবলৈ দিছে যে যদি বিভাগে তেওঁৰ যোগদানৰ সময়সীমা বৃদ্ধি নকৰে, তেন্তে পৰৱৰ্তী নিৰ্দেশনা অনুসৰিয়েই ব্যৱস্থা গ্ৰহণ কৰা হ’ব। এই ঘটনাই এতিয়া সামাজিক মাধ্যমৰ লগতে ৰাজনৈতিক মহলতো এক বৃহৎ বিতৰ্কৰ ৰূপ ধাৰণ কৰিছে।
