এইবাৰেই নহয়, পূৰ্বেও ৰেইলৰ যাত্ৰীৰ সোণ আত্মসাৎ কৰি জেইলৰ ভাত খাইছিল গুৱাহাটী ৰেইলৱে আৰক্ষীৰ নিলম্বিত আৰক্ষী উপ-পৰিদৰ্শক শ্ৰৱণ কুমাৰ ঝা।
বশিষ্ট থানাৰ এচিপি নন্দিনী কাকতিয়ে জনোৱা অনুসৰি ধৃত শ্ৰৱণ কুমাৰ ঝা চলিত বৰ্ষৰ জানুৱাৰী মাহত সোণ আত্মসাৎ কৰাৰ অভিযোগত গ্ৰেপ্তাৰ হৈছিল আৰক্ষীৰ হাতত। তাৰ পাছত সম্পূৰ্ণ তিনিমাহ জেইলৰ ভাত খাই মাৰ্চ মাহত জামিন লাভ কৰে বুলি আৰক্ষীৰ এক সুত্ৰই জানিবলৈ দিয়ে।
জানিব পৰা মতে ৰেইলৱে আৰক্ষীৰ উপ-পৰিদৰ্শকগৰাকীৰ বিৰুদ্ধে ৪৫ লাখ টকাৰ সোণ চুৰি কৰাৰ অভিযোগ উত্থাপিত হৈছিল।
জামিন লাভ কৰিছিল যদিও নিলম্বিত হৈ আছিল গুৱাহাটী ৰেইলৱে আৰক্ষীৰ উপ-পৰিদৰ্শকগৰাকী।
কথাতে কয় নহয়, চোৰে নেৰে চোৰ প্ৰকৃতি, কুকুৰে নেৰে চাই, যাৰ যি প্ৰকৃতি মৰিলে লগত যায়। ঠিক সেইদৰে আৰক্ষী উপ-পৰিদৰ্শকগৰাকীয়ে পৰিহাৰ নকৰিলে চৌৰ্য বৃত্তি।
কালি বৃহৎ পৰিমাণৰ চুৰি ধন-সোণ সৰবৰাহ কৰি থকাৰ সময়তে হাতে-লোটে ফটাশিল আৰক্ষীৰ জালত পৰিল নিলম্বিত আৰক্ষী উপ-পৰিদৰ্শকগৰাকী।
কালি নিশা প্ৰায় ১২ বজাত বৃহৎ পৰিমাণৰ ধন সোণ সৰবৰাহ কৰি ফটাশিল আৰক্ষীৰ জালত পৰিছে গুৱাহাটী ৰেইলৱে আৰক্ষীৰ নিলম্বিত আৰক্ষী উপ পৰিদৰ্শক শ্ৰৱণ কুমাৰ ঝা আৰু তেওঁৰ ভাতৃ সঞ্জয় কুমাৰ ঝা।
এখন স্প্লেন্ডাৰ বাইকৰ সৈতে প্ৰায় ৭০ লাখ টকাৰ সোণ আৰু নগদ ২২ লাখ টকাসহ ফটাশিল আৰক্ষীয়ে কৰায়ত্ত কৰে দুয়োকে। ধন-সোণ কঢ়িয়াই অনা বাইকখনৰ নম্বৰ AS-01AQ 4330।
উপ-পৰিদৰ্শকগৰাকীয়ে নিজ ভাতৃৰ সৈতে মিলি মহানগৰীৰ লালগণেশৰ উমেশ যাদৱ নামৰ লোকজনৰ ঘৰৰ পৰা লুকুৱাই ৰখা ২২ লাখ টকা ধনসহ প্ৰায় ১.৫০ কিলো ওজনৰ ১০ খন সোণৰ বিস্কুট আৰু আ-অলংকাৰ লৈ আহি আছিল। ফটাশিল আৰক্ষীয়ে সোধ-পোচৰ বাবে যাদৱকো আটক কৰিছে বুলি জানিব পৰা গৈছে।
ল’কডাউনৰ সময়ছোৱাত দিন-ৰাতি একাকাৰ কৰি জনসাধাৰণৰ সুৰক্ষাৰ স্বাৰ্থত অসম আৰক্ষীয়ে নিজকে উছৰ্গা কৰিছে। তেনে সময়তে শ্ৰৱণ কুমাৰ ঝাৰ দৰে আৰক্ষী উপ-পৰিদৰ্শকে চুৰি কাৰ্যত লিপ্ত হৈ খাকী পোছাকজোৰত কালিমা সনাত উঠি-পৰি লাগিছে।
