ৰণোজ পেগুৰ শিক্ষা বিভাগে প্ৰাথমিক আৰু উচ্চ প্ৰাথমিক বিদ্যালয়ৰ খালীহৈ থকা ৫৫৫০টা শিক্ষক পদ পূৰণৰ বাবে ২০২৩ চনতে বিজ্ঞাপন প্ৰকাশ কৰিছিল যদিও সেই পদ পূৰণৰ ব্যৱস্থা কৰাৰ সলনি নতুনকৈ পুনৰ ৪৫০০ পদৰ বিজ্ঞাপন প্ৰকাশ কৰি চমক দেখুৱাব খোজা কাণ্ডত ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটিয়ে স্তম্ভিত হৈছে আৰু এয়া অন্যায়মূলক বুলি অভিহিত কৰিছে।
২০২৩ চনৰ ডিচেম্বৰ মাহৰ ২৬ তাৰিখে অসম চৰকাৰে এক বিজ্ঞাপন প্ৰকাশ কৰি প্ৰাথমিক বিদ্যালয়ৰ ৩৮০০ টা আৰু উচ্চ প্ৰাথমিক বিদ্যালয়ৰ ১৭৫০ টা, মুঠ ৫৫৫০ টা খালী শিক্ষক পদত নিযুক্তি দিব বুলি ঘোষণা। ২০২৪ চনৰ ২ জানুৱাৰীৰ পৰা ৰাজ্যখনৰ কেইবা হাজাৰ প্ৰাৰ্থীয়ে এই খালী পদৰ বিপৰীতে আৱেদন কৰিলে। কিন্তু চৰকাৰে প্ৰাৰ্থীৰ ভেৰিফিকেশ্বনকে ধৰি নিযুক্তি প্ৰক্ৰিয়াৰ কোনো কামেই আগবঢ়াই নিনিলে। ডি ৱাই এফ আইসহ একাংশ প্ৰাৰ্থীৰ প্ৰতিবাদৰ ফলত ২০২৪ বৰ্ষৰ শেষৰ ফালে প্ৰাৰ্থীৰ ভেৰিফিকেশ্বনৰ কাম আৰম্ভ কৰে।
কিন্তু আজি এবছৰ উকলি যোৱাৰ পাছতো এই পদসমূহত নিযুক্তিৰ ব্যৱস্থা নকৰিলে।আবেদনকাৰীসকলৰ ক্ষোভৰ প্ৰতি লক্ষ্য ৰাখি কেইমাহমান পূৰ্বে
শিক্ষামন্ত্ৰীয়ে ৫৫৫০টা পদৰ প্ৰভিজনেল মেৰিট লিষ্ট প্ৰকাশৰ সমান্তৰালকৈ ৪৫০০ টা খালী পদৰ বিজ্ঞাপন প্ৰকাশ কৰা হ’ব বুলি ঘোষণা কৰিছিল। কিন্তু যোৱা ৮ জানুৱাৰীত ৪৫০০ টা খালী পদৰ বিজ্ঞাপনহে প্ৰকাশ কৰিলে অথচ পূৰ্বৰ ৫৫৫০ পদৰ প্ৰভিজনেল মেৰিট লিষ্ট প্ৰকাশ নকৰিলে।
এয়া চূড়ান্ত প্ৰতাৰণামূলক বুলি অভিহিত কৰি ডি ৱাই এফ আইয়ে শৈক্ষিক ক্ষেত্ৰ আৰু শিক্ষিত যুৱক-যুৱতীৰ জীৱনকলৈ হেতালি নেখেলিবলৈ আহ্বান জনাইছে। চৰকাৰৰ এই অবিবেচক আৰু ষড়যন্ত্ৰমূলক কাণ্ডৰ ফলত হাজাৰ হাজাৰ ছাত্ৰ-ছাত্ৰীৰ শৈক্ষিক জীৱনত প্ৰভাৱ পৰাৰ লগতে চাকৰি প্ৰাৰ্থী যুৱক-যুৱতীসকল হতাশ হৈ পৰিছে। তাৎপৰ্যপূৰ্ণ কথা হৈছে পূৰ্বে প্ৰকাশিত বিজ্ঞাপনৰ আবেদনৰ ভিত্তিত প্ৰভিজনেল মেৰিট লিষ্ট প্ৰকাশ নকৰিলে এক নতুন ধৰণৰ অভাৰলেপিঙৰ গুৰুতৰ সমস্যা সৃষ্টি হোৱাৰ প্ৰবল সম্ভাৱনা আছে। সেয়ে তাৎক্ষণিকভাৱে পূৰ্বৰ বিজ্ঞাপনৰ ৫৫৫০ পদৰ প্ৰভিজনেল মেৰিট লিষ্ট প্ৰকাশ কৰিবলৈ ডি ৱাই এফ আইৰ অসম ৰাজ্যিক কমিটিয়ে দাবী জনাইছে।
