প্ৰতিষ্ঠা হোৱাৰ দিনাৰ পৰাই ইমানেই চান্দা আহিছে যে টকা গণিব পৰা নাই ৰাম মন্দিৰ কৰ্তৃপক্ষই। সেয়ে ভাৰতীয় ষ্টেট বেংকৰ সহায় বিচাৰিছে ৰাম মন্দিৰৰ কৰ্তৃপক্ষই।
এাম মন্দিৰ ট্ৰাষ্টৰ বিষয়া প্ৰকাশ গুপ্তাই জনোৱা মতে, মন্দিৰ চৌহদত এছ বি আইয়ে চাৰিটা স্বয়ংক্ৰিয় ধন গণনা মেচিন স্থাপন কৰিছে।
কিন্তু ৰাম মন্দিৰে কিমান অনুদান পালে? ২২ জানুৱাৰীত মন্দিৰত প্ৰাণ প্ৰতিষ্ঠা কৰা হয়। প্ৰতিষ্ঠা হোৱাৰ এমাহৰ ভিতৰতে ৰাম মন্দিৰে লাভ কৰিছে ২৫ কোটি টকাৰ অনুদান।
প্ৰকাশ গুপ্তাই কয় যে বৰঙণিৰ ভিতৰত ২৫ কেজি সোণ আৰু ৰূপৰ অলংকাৰ, চেক, ড্ৰাফ্ট আৰু নগদ ধন আছে। লগতে বহুতে অনলাইনযোগে পোনপটীয়াকৈ ট্ৰাষ্টৰ বেংক একাউণ্টলৈ ধন প্ৰেৰণ কৰিছে, যাৰ হিচাপ এতিয়াও হোৱা নাই।
লগতে তেওঁ কয় যে শ্ৰীৰাম জন্মভূমি মন্দিৰলৈ ভক্তই আগবঢ়োৱা ৰূপ আৰু সোণৰ সামগ্ৰী মন্দিৰত ব্যৱহাৰ কৰা নহবও পাৰে। কিন্তু ভক্তসকলৰ ভক্তি বিবেচনা কৰি মন্দিৰে এই সোণ-ৰূপৰ সামগ্ৰীসমূহ গ্ৰহণ কৰি বেংকত জমা কৰি ৰাখিছে। পিছত এইবোৰ বিক্ৰী কৰি নগদ ধনলৈ পৰিণত কৰা হ’ব।
যদিও ২২ জানুৱাৰীত প্ৰাণ প্ৰতিষ্ঠা কৰা হৈছিল, তথাপিও ২৩ জানুৱাৰীত সাধাৰণ জনতাৰ বাবে মন্দিৰৰ দুৱাৰ মুকলি কৰা হৈছিল। তাৰ পিছৰে পৰা অযোধ্যাৰ ৰামলালালৈ ৬০ লাখৰো অধিক ভক্তই দৰ্শন কৰিছে বুলি ট্ৰাষ্টৰ বিষয়াসকলে জানিবলৈ দিয়ে।
ৰাম নৱমীৰ সময়ত প্ৰায় ৫০ লাখ ভক্তই অযোধ্যা ভ্ৰমণ কৰাৰ সম্ভাৱনা আছে। সেই সময়ত অনুদান বৃদ্ধি পাব। ট্ৰাষ্টে ৰচিদ প্ৰদানৰ বাবে ১২টা কম্পিউটাৰাইজড কাউণ্টাৰ স্থাপন কৰিছে। ইয়াৰ উপৰিও মন্দিৰ চৌহদত অতিৰিক্ত দান বাকচো স্থাপন কৰা হৈছে। ট্ৰাষ্টৰ সদস্যসকলে কয় যে শীঘ্ৰে ৰাম মন্দিৰ চৌহদত এটা ডাঙৰ আৰু সুসজ্জিত গণনা কক্ষ নিৰ্মাণ কৰা হ’ব।
অৱশ্যে ৰাম মন্দিৰ ট্ৰাষ্টে সোণ, ৰূপ আৰু অন্যান্য মূল্যৱান সামগ্ৰী ৰক্ষণাবেক্ষণৰ বাবে ভাৰত চৰকাৰক গতাই দিয়াৰ সিদ্ধান্ত লৈছে। ইয়াৰ বাবে অনুদান সন্দৰ্ভত এছ বি আইৰ সৈতে বুজাবুজি চুক্তি স্বাক্ষৰ কৰিছে ট্ৰাষ্টে। এই বুজাবুজি চুক্তি অনুসৰি ৰাম মন্দিৰত জমা হোৱা সকলো অনুদান, চেক, খচৰা আৰু নগদ ধন এছ বি আইৰ দ্বাৰা সংগ্ৰহ কৰা হ’ব। SBIৰ কৰ্মচাৰীয়ে এতিয়া দিনটোত দুবাৰকৈ নগদ ধনৰ অনুদান গণনা কৰি আছে।
