অৱশেষত এমাহৰ পাছত ৰাজস্থান পালেগৈ দৰঙত উদ্ধাৰ হোৱা ৫ টা উট

অৱশেষত প্ৰায় এমাহৰ পাছত দৰঙত উদ্ধাৰ হোৱা ৫ টা উট ৰাজস্থান পালেগৈ।

পিপ’লচ ফৰ এনিমেলৰ সহযোগত অসম চৰকাৰৰ পশুপালন আৰু পশু চিকিৎসা বিভাগে উটকেইটা ৪ ছেপ্টেম্বৰত ৰাজস্থানলৈ প্ৰেৰণ কৰিছিল।

অসমৰ পশুপালন আৰু পশু চিকিৎসা বিভাগ আৰু পিপ’লচ ফৰ এনিমেলৰ দলটো ৯ ছেপ্টেম্বৰত উট সহ ৰাজস্থানৰ চিৰহীত উপস্থিত হয়।

অসম চৰকাৰৰ পশুপালন আৰু পশু চিকিৎসা বিভাগৰ বিষয়া ডাঃ মনোজ বৈশ্যৰ নেতৃত্বত যোৱা দলটোৱে চিৰহীত ৰাজস্থান চৰকাৰক উট পাঁচটা চমজাই দিয়ে।

ঈদৰ আগত যোৱা ১১ আগষ্টত কোৰবাণীৰ বাবে অনা ৬ টা উট দৰঙৰ ধুলা বজাৰত আৰক্ষীয়ে উদ্ধাৰ কৰিছিল ।

তাৰ পাছৰে পৰা প্ৰায় এমাহ ধৰি উটকেইটা অসমতেই আছিল। ইয়াৰ মাজতে ২৭ আগষ্টত এটা উটৰ মৃত্যু হৈছিল।

উটকেইটাক সিহঁতৰ ৰাজস্থানৰ ঘৰলৈ ওভতাই নিয়াক লৈ আদালতৰ নিৰ্দেশলৈ অপেক্ষা কৰিবলগীয়া হৈছিল।

ৰাজস্থান মৰুভূমিৰ সম্পূৰ্ণ বিপৰীত জলবায়ুৰ পৰা অসমলৈ অনা উটকেইটাক জব্দ কৰাৰ দিনাৰে পৰা ৰ’দে বৰষুণে মুকলি আকাশৰ তলত ৰখা হৈছিল।

তদুপৰি, ইয়াত উট সম্বন্ধীয় জ্ঞানযুক্ত স্থানীয় পশু চিকিৎসকো উপলব্ধ নাছিল।

২০১৪ চনত উটক ৰাজস্থানৰ ৰাজ্যিক পশু ঘোষণা কৰা হৈছিল। ৰাজস্থান বিধানসভাই উটৰ হত্যা আৰু ৰপ্তানি নিষিদ্ধ কৰি Rajasthan Camel (Prohibition of Slaughter and Regulation of Temporary Migration or Export) Bill, 2015 গৃহীত কৰিছিল।

এই আইনখনে জন্তুটো অবৈধভাৱে আন ৰাজ্যলৈ নিয়াটোও নিষিদ্ধ কৰিছিল।

অৱশেষত বাকী পাঁচটা উট সুকলমে ৰাজস্থান পোৱা বুলি ডাঃ মনোজ বৈশ্যই জানিবলৈ দিয়ে।