ৰাষ্ট্ৰীয় স্বাস্থ্য অভিযান (এন এইচ এম), অসমৰ অধীনৰ ২৪ সহস্ৰাধিক বিষয়া-কর্মচাৰীৰ কৰ্মবিৰতিত স্বাস্থ্যসেৱা প্ৰায় অচল হৈ পৰিছে। ইয়াৰ ফলত হাজাৰ হাজাৰ ৰোগী চিকিৎসা তথা অন্যান্য সেৱাৰ পৰা বঞ্চিত হৈছে। ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটিয়ে এই পৰিস্থিতিত উদ্বেগ প্ৰকাশ কৰিছে আৰু শীঘ্ৰে স্বাস্থ্য কৰ্মীসকলৰ নায্য দাবী মানি লৈ স্বাস্থ্য সেৱা নিয়মীয়া কৰিবলৈ দাবী জনাইছে।
ৰাজ্যখনৰ স্বাস্থ্যখণ্ডত এন এইছ এমৰ অধীনত এইসকল কৰ্মীয়ে ২০০৬ চনৰ পৰাই প্রায় দুই দশক ধৰি স্বাস্থ্যসেবা আগবঢ়াই আহিছে। ৰাজ্যৰ চিকিৎসা মহাবিদ্যালয়ৰপৰা আৰম্ভ কৰি জিলা চিকিৎসালয়ৰ লগতে আদর্শ চিকিৎসালয়, প্রাথমিক স্বাস্থ্যকেন্দ্র, ৰাজ্যিক চিকিৎসালয়, উপ-স্বাস্থ্যকেন্দ্র আদিত অতি ন্যূনতম দৰমহা আৰু চাকৰিৰ কোনো নিশ্চয়তা নোহোৱাকৈ স্বাস্থ্য সেৱা আগবঢ়াই আহিছে। এন এইচ এম টেকনিকেল কৰ্মচাৰী তথা বিষয়া-কৰ্মচাৰীসকলে স্বাস্থ্য বিভাগৰ আন স্থায়ী কৰ্মচাৰী সকলৰ নিচিনাকৈ সমানে কাম কৰি আহিছে যদিও স্থায়ী কৰ্মচাৰীৰ তুলনাত এন এইচ এম স্বাস্থ্য কৰ্মচাৰী সকলে অতি সামান্য দৰমহা লাভ কৰে।
স্বাস্থ্য খণ্ডৰ মেৰুদণ্ড স্বৰূপ এইসকল কৰ্মচাৰীয়ে দীর্ঘদিন ধৰি ঠিকাভিত্তিকভাৱে সেৱা আগবঢ়াই থকাৰ পাছতো চাকৰি স্থায়ী নোহোৱা বাবে অধিকাংশ কৰ্মচাৰীৰে শংকা আৰু অনিশ্চয়তাৰ মাজেৰে জীৱন অতিবাহিত কৰি আহিছে। বহু কৰ্মচাৰীৰ নিয়মীয়া চাকৰিৰ বয়সৰ ঊর্দ্ধসীমা উকলি যোৱাৰ উপক্ৰম হৈছে। স্বাস্থ্যসেৱাৰ দৰে জৰুৰীকালীন সেৱাত নিয়োজিত এইসকল কৰ্মচাৰীক অস্থায়ী আৰু অনিশ্চয়তাৰ মাজত ৰখাটো বিজেপি চৰকাৰখনৰ জনসাধাৰণৰ প্ৰতি কৰা অন্যায়ৰে অংশ।
বিগত সময়ছোৱাত স্বাস্থ্য কৰ্মীসকলে দাবী পূৰণৰ স্বাৰ্থত চৰকাৰৰ ওচৰত আৱেদন-নিবেদন কৰাৰ উপৰি গণতান্ত্ৰিক আন্দোলনৰ পথ গ্ৰহণ কৰিছিল; কিন্তু স্বাস্থ্য কৰ্মী আৰু স্বাস্থ্যসেৱাৰ প্ৰতি উদাসীন মনোভাৱ লোৱা মুখ্যমন্ত্ৰী হিমন্ত বিশ্ব শৰ্মা নেতৃত্বাধীন বিজেপি চৰকাৰে কোনো পদক্ষেপেই ন’ললে। ইয়াৰ ফলত কৰ্মবিৰতিৰ দৰে সৰ্বাত্মত আন্দোলনৰ পথ গ্ৰহণ কৰিবলগীয়া হৈছে। এনে অৱস্থাত চৰকাৰৰ অমনোযোগীতাৰ বাবেই আজি ৰাজ্যৰ প্ৰান্তে প্ৰান্তে হাজাৰ হাজাৰ লোক স্বাস্থ্য সেৱাৰ পৰা বঞ্চিত হৈছে। এয়া অত্যন্ত কৰুণ আৰু হৃদয় বিদাৰক ঘটনা।
ডি ৱাই এফ আইৰ অসম ৰাজ্যিক কমিটিয়ে স্বাস্থ্যসেৱাৰ এই অচলাৱস্থা শীঘ্ৰে অৱসানৰ বাবে উদ্যোগ লোৱাৰ লগতে কৰ্মৰত সকলো ঠিকাভিত্তিক স্বাস্থ্যকৰ্মীৰ চাকৰি চৰ্তহীনভাৱে নিয়মীয়া কৰাৰ লগতে অন্যান্য সা-সুবিধা নিশ্চিত কৰিবলৈ দাবী জনাইছে।
