বিগত প্ৰায় তিনিটা দশক ধৰি ৰাজ্যসভাৰ সাংসদ হিচাপে অসমক প্ৰতিনিধিত্ব কৰি অহা প্ৰাক্তন প্ৰধান মন্ত্ৰী ড০ মনমোহন সিঙৰ সাংসদৰ কাৰ্যকালৰ আজি অন্ত পৰিব। বিধানসভাত কংগ্ৰেছৰ পৰ্যাপ্ত সদস্য নথকাৰ এইবাৰ পুনৰ অসমৰ পৰা সাংসদ হ’ব নোৱাৰিলে।
আজি আনুষ্ঠানিকভাৱে সাংসদৰ কাৰ্যকালৰ অন্ত পৰা প্ৰাক্তন প্ৰধান মন্ত্ৰী গৰাকীৰ অসমৰ সৈতে দীঘলীয়া সম্পৰ্কৰ ক্ষেত্ৰতো যতি পৰিব। আজিৰে পৰা তেওঁ হৈ পৰিব অসমৰ প্ৰাক্তন সাংসদ।
বিশ্বৰ প্ৰসিদ্ধ অৰ্থনীতিবিদ হিচাপে খ্যাতি লাভ কৰা ড০ সিঙে ১৯৯১ চনত অসমৰ পৰা ৰাজ্যসভালৈ নিৰ্বাচিত হৈ সংসদীয় ৰাজনীতিত এক নতুন অধ্যায় আৰম্ভ কৰিছিল। অসমৰ তদানীত্বন মুখ্য মন্ত্ৰী হিতেশ্ব শইকীয়াই ৰাজ্যখনৰ পৰা ড০ সিঙক ৰাজ্যসভালৈ নিৰ্বাচিত কৰি পঠিয়াই বৰ্ষীয়ান নেতাগৰাকীৰ সৈতে অসমৰ সম্পৰ্কৰ সূত্ৰ সুদৃঢ় কৰি তুলিছিল।
ইয়াৰ পাছত অসমৰ পৰাই ড০ সিঙে ক্ৰমে ১৯৯৫, ২০০১, ২০০৭ আৰু ২০১৩ চনত ৰাজ্যসভালৈ নিৰ্বাচিত হৈছিল। তাৎপৰ্যপূৰ্ভাৱে, অসমক প্ৰতিনিধিত্ব কৰিয়েই ড০ মনমোহন সিঙে দুবাৰকৈ দেশৰ প্ৰধান মন্ত্ৰী হিচাপে কাৰ্যভাৰ চলাইছিল।
প্ৰয়াত মুখ্য মন্ত্ৰী হিতেশ্বৰ শইকীয়াৰ গুৱাহাটীৰ ঘৰত ভাড়াতীয়া হিচাপে থকা ড০ সিঙে অসমত কেইবাটাও নিৰ্বাচনত ভোটদানো কৰিছে। আনকি, শেহতীয়া লোকসভাৰ নিৰ্বাচনতো তেওঁ আহি ভোটদান কৰি গৈছিল।
অসমক দ্বিতীয় ঘৰ হিচাপে অভিহিত কৰা প্ৰাক্তন প্ৰধান মন্ত্ৰী গৰাকীৰ অসমৰ পৰা সাংসদ হিচাপে বিজয়ী হোৱাৰ ধাৰাবাহিকতা ভংগ হ’ল যদিও অসমৰ ৰাজনৈতিক ইতিহাসত ড০ সিঙৰ নাম চিৰদিনৰ বাবে খোদিত হৈ ৰ’ব।