ক’ভিড সংক্ৰমণৰ দ্বিতীয় ঢৌৰ সময়ত যোৱা এপ্ৰিল মাহৰ পৰা জুলাই মাহৰ আজিৰ তাৰিখলৈকে বোকাখাত মহকুমাত ৪,২৯৯ জন লোক ক’ভিড সংক্ৰমণত আক্ৰান্ত হয় ৷
মহকুমাটোত মুঠ ৭০,৯৪৯ জন লোকৰ ক’ভিড পৰীক্ষাৰ পিছত সম্প্ৰতি মুঠ ৩৪০ জন সক্ৰিয় ক’ভিড ৰোগী আছে বুলি আজি বোকাখাতৰ মহকুমাধিপতিয়ে জনায় ৷
আজি বোকাখাতৰ মহকুমাধিপতিৰ কাৰ্যালয়ৰ সভাকক্ষত গোলাঘাটৰ উপায়ুক্ত মৃগেশ নাৰায়ন বৰুৱাৰ উপস্থিতিত এক ক’ভিড পৰিস্থিতিৰ পৰ্যালোচনা আৰু সংবাদ মেল অনুষ্ঠিত হয় ৷
মহকুমাধিপতি বিপুল দাসে বোকাখাত মহকুমাৰ ক’ভিড পৰিস্থিতিৰ ওপৰত এক সচিত্ৰ উপস্থাপন দাঙি ধৰে ৷
মহকুমাধিপতিৰ মতে বোকাখাত মহকুমাৰ শেহতীয়া পৰিস্থিতি কিছু উন্নত হৈছে যদিও সংক্ৰমণৰ হাৰ ৩ শতাংশ হৈছেগৈ ৷ জুলাই মাহৰ প্ৰথম সপ্তাহৰ আৰম্ভণিৰ পৰা আজিৰ তাৰিখলৈকে মহকুমাটোত সংক্ৰমণৰ হাৰ ৫.৮৬ ৰ পৰা ৩.৮৭ শতাংশলৈ হ্ৰাস পাইছে আৰু এই হাৰ যদি একে থাকে তেনেহ’লে এসপ্তাহৰ পিছত মহকুমাটোত ক’ভিড সংক্ৰমণ নিয়ন্ত্ৰিত হোৱাৰ সম্ভাৱনা আছে।
ক’ভিডত বোকাখাত মহকুমাত ২৩ গৰাকী লোকৰ মৃত্যু হোৱাৰ বিপৰীতে আৰোগ্যৰ হাৰ ৯২.০৯ শতাংশ বুলিও জনায় মহকুমাধিপতি গৰাকীয়ে ৷
এনে পটভুমিত বৃহস্পতিবাৰে গোলাঘাট জিলাত তিনিদিনীয়া সম্পুৰ্ণ লকডাউনৰ সময় উকলি যোৱাৰ পিছত অহা ১৬ জুলাই পৰা গোলাঘাটত পূৰ্বৰ দৰে অকল গেলামাল আৰু ঔষধৰ দোকান দিনৰ ভাগত খোলাৰ সম্ভাৱনা আছে বুলি জিলা উপায়ুক্ত মৃগেশ নাৰায়ন বৰুৱাই জনায় ৷
অসম চৰকাৰৰ নতুন এছ অ’পিৰ আধাৰতহে ১৬ তাৰিখৰ পৰা গোলাঘাট জিলাতো নতুন নীতি-নিৰ্দেশনা জাৰি কৰা হ’ব বুলি তেওঁ জনায় ৷
সংক্ৰমণৰ হাৰৰ ওপৰত নিৰ্ভৰ কৰি প্ৰয়োজনত বোকাখাতত আৰু অধিক মাইক্ৰ’ কন্টেইনমেন্ট জ’ন কৰিবৰ বাবে তেওঁ আজিৰ বৈঠকতে মহকুমা প্ৰশাসনক নিৰ্দেশো দিয়ে ৷
চাহ বাগিছাৰ প্ৰব্ৰজিত শ্ৰমিকৰ যাতায়ত কঠোৰভাৱে নিয়ন্ত্ৰণ কৰাৰ লগতে মদৰ প্ৰচলনো অতি কঠোৰভাৱে নিয়ন্ত্ৰণ কৰিবৰ বাবেও উপায়ুক্ত গৰাকীয়ে নিৰ্দেশ দিয়ে৷
উল্লেখ্য যে বোকাখাত বিধানসভা সমষ্টিত ১৮ বছৰৰ উৰ্ধৰ লোকৰ সংখ্যা ১,৪৪,০০০ জন ৷ ইয়াৰে মুঠ ৪৯,৪৪৬ জন লোকক ক’ভিডৰ প্ৰতিষেধক প্ৰদান কৰা হৈছে ৷ সমষ্টিটোত মুঠ ৩৪.৩৩ শতাংশ লোকক প্ৰতিষেধক প্ৰদান কৰিছে বুলি আজিৰ সংবাদমেলতে মহকুমা স্বাস্থ্য বিভাগে অৱগত কৰে ৷
আজিৰ সংবাদ মেলত উপায়ুক্ত আৰু মহকুমাধিপতিৰ উপৰিও অতিৰিক্ত উপায়ুক্ত কুলদ্বীপ হাজৰিকা,মহকুমা স্বাস্থ্য বিষয়া ডাঃ ভাৰত ফুকন ,আবকাৰী উপ অধীক্ষক দেৱজ্যোতি দেউৰী, খণ্ড উন্নয়ন বিষয়া দিলীপ সৰকাৰ আৰু মহকুমা তথ্য আৰু জনসংযোগ বিষয়া মামুন বৰকটকীও উপস্থিত থাকে ৷
