অসমৰ জনপ্ৰিয় শিল্পী জুবিন গাৰ্গৰ মৃত্যুৰ সৈতে জড়িত গোচৰটো এক নতুন পৰ্যায় পাইছেহি। অহা ৮ জুনৰ পৰা এই সমগ্ৰ ঘটনাৰ শুনানি প্ৰক্ৰিয়া আনুষ্ঠানিকভাৱে আৰম্ভ হ’ব। ন্যায়াধীশ শৰ্মিলা ভূঞাৰ পৰিচালনাত চলিবলগীয়া বিশেষ ফাষ্টট্ৰেক আদালতখনে প্ৰথম পৰ্যায়ত গোচৰটোৰ এজাহাৰকাৰী আৰু গুৰুত্বপূৰ্ণ সাক্ষীসকলৰ ভাষ্য লিপিৱদ্ধ কৰিব।
প্ৰথম দিনাৰ শুনানিত অংশ ল’বলৈ আদালতৰ তৰফৰ পৰা ইতিমধ্যে চাৰিজন মূল ব্যক্তিলৈ জাননী প্ৰেৰণ কৰা হৈছে।
প্ৰথম দিনা আদালতত হাজিৰ হ’বলগীয়া সাক্ষীসকল হৈছে – হেমন্ত কুমাৰ দাস(মৰিগাঁও জিলাৰ আৰক্ষী অধীক্ষক) ৰাতুল বৰা (মৰিগাঁৱৰ বাসিন্দা তথা এই সমগ্ৰ ঘটনাৰ প্ৰথমগৰাকী এজাহাৰকাৰী), প্ৰণৱ শইকীয়া (মৰিগাঁও থানাৰ তদানীন্তন ভাৰপ্ৰাপ্ত বিষয়া), ভাস্কৰ বৰ্মন (গোচৰটোৰ অন্যতম গুৰুত্বপূৰ্ণ সাক্ষী)।
উল্লেখ্য যে, জুবিন গাৰ্গৰ মৃত্যুক সহজভাৱে ল’ব নোৱাৰি মৰিগাঁৱৰ ৰাতুল বৰাই পোনপ্ৰথমে আৰক্ষীৰ ওচৰত হত্যাকাণ্ডৰ সন্দেহ প্ৰকাশ কৰি এজাহাৰ দাখিল কৰিছিল। তেওঁ অভিযোগ উত্থাপন কৰিছিল যে, শিল্পীগৰাকীৰ উন্নত চিকিৎসাৰ বাবে ছিংগাপুৰৰ চিকিৎসকে যিবোৰ সতৰ্কতা (যেনে জুই আৰু পানীৰ পৰা নিলগাই ৰখা) অৱলম্বন কৰিবলৈ পৰামৰ্শ দিছিল, অভিযুক্তসকলে তাক সম্পূৰ্ণৰূপে অৱজ্ঞা কৰিছিল।
এই গুৰুতৰ অভিযোগৰ ভিত্তিতেই ৰাজ্যিক তদন্তকাৰী সংস্থা চিআইডি (CID)-এ সমগ্ৰ বিষয়টোৰ খৰচি মাৰি অনুসন্ধান চলাইছিল। কেৱল এয়াই নহয়, এই ঘটনাক লৈ সমগ্ৰ অসমতে তীব্ৰ প্ৰতিক্ৰিয়াৰ সৃষ্টি হৈছিল আৰু বিভিন্ন প্ৰান্তৰ থানাত প্ৰায় ৮৫ খনতকৈও অধিক এজাহাৰ ৰুজু কৰা হৈছিল।
চৰকাৰী পক্ষৰ লোক অধিবক্তা জীয়াউল কামাৰৰ ভাষ্য অনুসৰি, এই গোচৰত নাম সাঙোৰ খোৱা ৭ গৰাকী অভিযুক্তৰ বিৰুদ্ধে ভাৰতীয় ন্যায় সংহিতা (BNS)–ৰ ৩৬, ৩৭ আৰু ৩৮ ধাৰাৰ অধীনত বিচাৰ প্ৰক্ৰিয়া আগবাঢ়িব।
আদালতে অহা ২০ জুনৰ ভিতৰত এজাহাৰকাৰীসকলৰ সাক্ষ্যগ্ৰহণ সম্পূৰ্ণ কৰাৰ লক্ষ্য স্থিৰ কৰিছে। ইয়াৰ উপৰি, এই সমগ্ৰ ৰহস্যঘন গোচৰটোৰ সত্যতা উদঘাটন কৰিবলৈ পৰ্যায়ক্ৰমে মুঠ ১৬১ জন সাক্ষীক আদালতলৈ তলব কৰা হ’ব বুলি জানিব পৰা গৈছে।
