তীব্ৰ বিতৰ্কৰ মাজতে দিল্লী বিশ্ববিদ্যালয়ে এল এল বিৰ প্ৰথম আৰু ষষ্ঠ ষান্মাসিকৰ পাঠ্যক্ৰমত মনুস্মৃতি অন্তৰ্ভুক্ত কৰাৰ প্ৰস্তাৱ নাকচ কৰে। কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানেও কয় যে তেওঁ কোনো বিতৰ্কিত গ্ৰন্থ পাঠ্যক্ৰমত অন্তৰ্ভুক্ত কৰিবলৈ ইচ্ছুক নহয়।
শেহতীয়াকৈ দিল্লী বিশ্ববিদ্যালয়ৰ আইন বিভাগৰ অধ্যাপকসকলে জি এন ঝাৰ ‘মেধাতিথিৰ মনুভাষ্যৰ সৈতে মনুস্মৃতি’ আৰু টি কৃষ্ণস্বামী আয়াৰৰ ‘মনুস্মৃতিৰ টীকা – স্মৃতচন্দ্ৰিকা’ এল এল বি ডিগ্ৰীৰ পাঠ্যক্ৰমত অন্তৰ্ভুক্ত কৰাৰ প্ৰস্তাৱ আগবঢ়াইছিল।
বিশ্ববিদ্যালয়খনৰ আইন বিভাগৰ এগৰাকী অধ্যাপকে কয় যে মনুস্মৃতিৰ দৰে প্ৰাচীন গ্ৰন্থ পাঠ্যক্ৰমত অন্তৰ্ভুক্ত কৰাৰ কোনো ন্যায্যতা নাই। এনে কৰিলে জাতি আৰু শ্ৰেণীৰ ভিত্তিত সমাজখন বিভক্ত হ’ব। কিয়নো এই গ্ৰন্থখনে নৱ প্ৰজন্মক প্ৰভাৱিত কৰিব পাৰে। প্ৰাচীন কালত এই সকলোবোৰ গ্ৰন্থ পিতৃতান্ত্রিক সমাজৰ সপক্ষে ৰচনা কৰা হৈছিল। এই ধৰণৰ গ্ৰন্থত নাৰীৰ স্বাধীনতা বা তেওঁলোকৰ অধিকাৰৰ সীমাবদ্ধতাৰ কথা কোৱা হয়।
বিশ্ববিদ্যালয়খনৰ এই সিদ্ধান্তৰ বিৰোধিতা কৰে বাওঁপন্থী শিক্ষক সংগঠন ছ’চিয়েল ডেম’ক্ৰেটিক টিচাৰ্ছ ফ্ৰণ্টে। তেওঁলোকৰ অভিযোগ যে আমাৰ শিক্ষা ব্যৱস্থাত মনুস্মৃতিৰ কোনো কাম নাই। সমাজত অসঙ্গতি সৃষ্টি কৰিবলৈ প্ৰাচীন গ্ৰন্থ শিকোৱাৰ সিদ্ধান্ত লোৱা হৈছে। নাৰীৰ অধিকাৰক ভেঙুচালি কৰা কিতাপ এখনৰ কি প্ৰয়োজন?
শুকুৰবাৰে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে কয় যে, “আমি সকলোৱে আমাৰ সংবিধান আৰু ভৱিষ্যতৰ দৃষ্টিভংগীৰ প্ৰতি দায়বদ্ধ। বিতৰ্কিত শিতানসমূহ পাঠ্যক্ৰমত অন্তৰ্ভুক্ত কৰাৰ কোনো প্ৰশ্নই উত্থাপন নহয়”।
অৱশ্যে বিশুদ্ধ তুলনামূলক দৃষ্টিভংগীৰ বাবে ইয়াক পাঠ্যক্ৰমত অন্তৰ্ভুক্ত কৰা হৈছে বুলি কয় আইন বিভাগৰ ডীন অধ্যাপক অঞ্জু ৱালী টিকুৱে। হিন্দু ধৰ্ম বা হিন্দু ধৰ্মৰ লগত ইয়াৰ কোনো সম্পৰ্ক নাই।
