এইবাৰ মহিলা ৰোগীৰ নিৰ্যাতনৰ বলি হ’ল পুৰুষ চিকিৎসক : কাহিনী শুনি চকু কপালত উঠিব আপোনাৰ
পুনৰ পোহৰলৈ আহিছে চৰকাৰী চিকিৎসালয়ত চিকিৎসক হাৰাশাস্তি। কৰাৰ খবৰ। এগৰাকী মহিলাই চিকিৎসকক জোতাৰে প্ৰহাৰ কৰাৰ অভিযোগ উত্থাপন হৈছে। মহিলাগৰাকীয়ে চিকিৎসক গৰাকীক প্ৰহাৰ কৰা ঘটনাৰ ভিডিঅ’ ইতিমধ্যে সামাজিক মাধ্যমত বিয়পি পৰিছে।
কৰ্ণাটকৰ চিক্কামাগালুৰুৰ এখন চৰকাৰী চিকিৎসালয়ত এই ঘটনা সংঘটিত হৈছে।
আৰক্ষীৰ সূত্ৰৰ পৰা জানিব পৰা মতে, স্বামীৰ সৈতে হৱা ঘৰুৱা হিংসাৰ ফলত আঘাতপ্ৰাপ্ত হৈ নিশা প্ৰায় ১২:৩০ বজাত জিলা চিকিৎসালয়লৈ আহিছিল এগৰাকী মহিলা। সেই সময়তে মহিলাগৰাকীৰ স্বামীযও চিকিৎসালয় খনত উপস্থিত হয়।
তাৰপিছত চিকিৎসালয়ৰ ভিতৰতে দুয়োজনে চিঞৰ বাখৰ কৰে। ইজনে সিজনৰ বিৰুদ্ধে থানাত গোচৰ ৰুজু কৰিবলৈ চিকিৎসকৰ পৰা চিকিৎসা পৰীক্ষাৰ ৰিপোৰ্ট দাবী কৰে। চিকিৎসকে প্ৰথমে দুয়োকে শান্ত কৰিবলৈ চেষ্টা কৰিছিল যদিও পৰিস্থিতি অধিক গুৰুতৰ হৈ পৰে।
ইয়াৰ মাজতে সকলোকে আচৰিত কৰি মহিলাগৰাকীয়ে হঠাতে কৰ্তব্যৰত চিকিৎসকজনক আক্ৰমণ কৰে। চিকিৎসকজনৰ ওপৰত জোতা নিক্ষেপ কৰাৰ উপৰিও তেওঁৰ ডিঙিত ধৰি টানি নিয়া বুলি অভিযোগ উঠিছে।
এই ঘটনাৰ প্ৰতিবাদত চিকিৎসক আৰু স্বাস্থ্যকৰ্মীসকলে চিকিৎসালয়খনৰ বাহিৰৰ অংশ অৱৰোধ কৰি প্ৰতিবাদ সাব্যস্ত কৰে। তথ্য লাভ কৰাৰ পিছতে তাত উপস্থিত হয় আৰক্ষী বাহিনী। অভিযুক্ত মহিলাগৰাকীক গ্ৰেপ্তাৰ কৰাৰ উপৰিও তেওঁৰ বিৰুদ্ধে এফআইআৰ ৰুজু কৰা হৈছে। এই ঘটনাৰ পিছতে জিলা প্ৰশাসনে চিকিৎসালয়খনৰ নিৰাপত্তা বৃদ্ধি কৰাৰ আশ্বাস দিছে।
ইফালে কৰ্ণাটকৰ বিজেপি নেতা চিটি ৰবিয়ে চিকিৎসকগৰাকীৰ ওপৰত হোৱা আক্ৰমণৰ এই ভিডিঅ’টো ছ’চিয়েল মিডিয়াত শ্বেয়াৰ কৰিছে। ইয়াৰ উপৰিও তেওঁ এক্স হেণ্ডেলত লিখিছে যে চিকিৎসকৰ ওপৰত এনেধৰণৰ আক্ৰমণ ৰোধৰ বাবে চৰকাৰে তাৎক্ষণিক পদক্ষেপ গ্ৰহণ কৰিব লাগে।