ৰাজ্যত অপৰাধজনিত ঘটনা উদ্বেগজনক হাৰত বৃদ্ধি পোৱাৰ সময়তে পুনৰ তিনিচুকীয়া জিলাৰ বৰডুবি অঞ্চলৰ পৰা এক জঘন্য বৰ্বৰ কাণ্ডৰ খবৰ পোহৰলৈ আহিছে। এইবাৰ তিনি পাষাণ মনোবৃত্তিৰ লোকৰ লক্ষ্য হৈ পৰিছে সপ্তম শ্ৰেণীৰ এগৰাকী স্কুলীয়া ছাত্ৰী।
তথ্য অনুসৰি, যোৱা সোমবাৰ (৩ অক্টোবৰ)ৰ দিনা শিশুটি বিদ্যালয়ৰ পৰা ঘৰলৈ উভতি আহি থকাৰ সময়তে এই ভয়ংকৰ ঘটনাটো সংঘটিত হয়। জানিব পৰা মতে, তিনিজন যুৱকে বাইকত আহি ছাত্ৰীগৰাকীক অপহৰণ কৰি এক বাগানৰ মাজলৈ লৈ যায় আৰু তাত দলবদ্ধ ধৰ্ষণ সংঘটিত কৰে।
ঘটনা সংঘটিত কৰি অভিযুক্ত তিনিজন যুৱকে লগে লগে ঘটনাস্থলীৰ পৰা পলায়ন কৰে।
ছোৱালীজনী বহু সময় ধৰি ঘৰলৈ উভতি নহাত পৰিয়ালৰ লোকৰ মাজত তীব্ৰ চিন্তাৰ সৃষ্টি হয় আৰু তেওঁলোকে বিচাৰ-খোচাৰ আৰম্ভ কৰে। পৰৱৰ্তী সময়ত, ছাত্ৰীগৰাকীক বাগানৰ মাজত মুমূৰ্ষ অৱস্থাত উদ্ধাৰ কৰা হয়।
স্থানীয় লোকে জনোৱা মতে, “আমি শিশুটিক প্ৰায় ৪.৩০ বজাত বিচাৰি পাইছিলো। সেই সময়ত তাইৰ অৱস্থা অতি বেয়া আছিল। তাই অজ্ঞান হৈ আছিল আৰু গাত কোনো কাপোৰ নাছিল।”
শিশুগৰাকীয়ে আৰক্ষীৰ ওচৰত দিয়া ভাষ্য অনুসৰি, তিনিজন যুৱকে বাইকেৰে আহি তেওঁক জোৰকৈ লৈ গৈছিল। উদ্ধাৰৰ সময়ত শিশুটীৰ দুয়োখন হাতত আঘাতৰ চিন স্পষ্ট হৈ আছিল। ততাতৈয়াকৈ শিশুটিক হাস্পাতালত ভৰ্তি কৰাই স্বাস্থ্য পৰীক্ষা কৰোৱা হয়।
এই জঘন্য কাণ্ডৰ খবৰ বিয়পি পৰাৰ লগে লগে সমগ্ৰ অঞ্চলটোত তীব্ৰ চাঞ্চল্য আৰু উত্তপ্ত পৰিস্থিতিৰ সৃষ্টি হৈছে। স্থানীয় ৰাইজে দোষীক শীঘ্ৰে গ্ৰেপ্তাৰ কৰি উচিত শাস্তি প্ৰদানৰ দাবী জনাইছে।
সমগ্ৰ ঘটনা সন্দৰ্ভত আৰক্ষীয়ে ইতিমধ্যে তদন্ত আৰম্ভ কৰিছে। আৰক্ষীয়ে ঘটনাস্থলীৰ পৰা ছাত্ৰীগৰাকীৰ স্কুল বেগ আৰু ইউনিফৰ্ম উদ্ধাৰ কৰিছে। অৱশ্যে, এই বাতৰি লিখা পৰ্যন্ত কোনো অভিযুক্তক গ্ৰেপ্তাৰ কৰিবলৈ সক্ষম হোৱা নাই। আৰক্ষীৰ নিৰন্তৰ তদন্তৰ অন্তত ঘটনা সন্দৰ্ভত সবিশেষ তথ্য পোহৰলৈ অহাৰ সম্ভাৱনা আছে।
